ശബരിമല: മകരവിളക്ക് ദിനം ശബരീശന്റെ അനുഗ്രഹം തേടി നടൻ ജയറാമും ജയം രവിയും ശബരിമലയിൽ എത്തി. കോവിഡ് കഴിഞ്ഞുളള മകരവിളക്കായതിനാൽ വലിയ തിരക്കാണ്. ഈ തിരക്കിലും ഭക്തിനിർഭരമായ അന്തരീക്ഷത്തിൽ അയ്യപ്പ ദർശനം സാധിക്കുന്നത് ജീവിതത്തിലെ പുണ്യമായി കരുതുന്നതായി ജയറാം പറഞ്ഞു.
ദർശനം നടത്തി പ്രസാദം സ്വീകരിച്ച് ഇരുവരും മകരജ്യോതി ദർശനത്തിനും സാക്ഷികളായി.
കോവിഡിന് ശേഷം ഇതാദ്യമായിട്ടാണ് മകരവിളക്കിന് എത്തിയതെന്ന് ജയംരവി പറഞ്ഞു. അഞ്ച് വർഷങ്ങളിൽ ജയറാമിന് ഒപ്പം മകരവിളക്കിന് സന്നിധാനത്ത് എത്തിയിട്ടുണ്ട്. മകരജ്യോതി ദർശനത്തിലൂടെ മനസ് ശാന്തമാകുകയാണ് ചെയ്യുന്നതെന്നും അദ്ദേഹം പറഞ്ഞു.
എപ്പോൾ വേണമെങ്കിലും ശബരിമലയിൽ പോകണമെന്ന് തോന്നിയാൽ പറയണമെന്ന് 15 വർഷം മുൻപ് ജയറാം പറഞ്ഞിരുന്നു. അത് മനസിൽ ഉണ്ടായിരുന്നു. ജാതി, മതഭേദമില്ലാതെ എല്ലാവരും ഒരുപോലെ ഒഴുകിയെത്തുന്ന കാഴ്ചയാണ് കാണുന്നതെന്നും അദ്ദേഹം കൂട്ടിച്ചേർത്തു. ജീവിതത്തിലെ സൗഭാഗ്യമാണ് ഈ പുണ്യദിനത്തിൽ ശബരീശ സന്നിധിയിൽ നിൽക്കാൻ സാധിക്കുന്നതെന്നും ജയം രവി കൂട്ടിച്ചേർത്തു.
Discussion about this post