കൊല്ലം: മാളികപ്പുറം സിനിമയെ അഭിനന്ദിച്ചു കൊണ്ട് വീണ്ടും ഫേസ്ബുക്കിൽ പോസ്റ്റിട്ട് കോൺഗ്രസ് നേതാവ് ബിന്ദു കൃഷ്ണ. ചിത്രത്തെ അഭിനന്ദിച്ച് ആദ്യമിട്ട പോസ്റ്റ് ബിന്ദു കൃഷ്ണ ഡിലീറ്റ് ചെയ്തിരുന്നു. ഇത് സാമൂഹിക മാദ്ധ്യമങ്ങളിൽ ചർച്ചയായിരുന്നു.
നിങ്ങൾ ആരെ ഭയന്നാണ് ഫേസ്ബുക്ക് പോസ്റ്റ് ഡിലീറ്റ് ചെയ്തതെന്നും, കേരളം പാകിസ്താനിലാണെന്ന് കരുതിയാണോ പോസ്റ്റ് ഡിലീറ്റ് ചെയ്തതെന്നും വരെ ചോദ്യങ്ങൾ ഉയർന്നിരുന്നു. ഇതിനെ തുടർന്നാണ് ഫേസ്ബുക്കിൽ വീണ്ടും പുതിയ പോസ്റ്റുമായി ബിന്ദു കൃഷ്ണ രംഗത്തെത്തിയിരിക്കുന്നത്. ആദ്യത്തെ പോസ്റ്റിന് റീച്ച് കുറവായതിനാലാണ് അത് ഡിലീറ്റ് ചെയ്തതെന്നും ബിന്ദു കൃഷ്ണ ന്യായീകരിക്കുന്നു. ഇതേ പോസ്റ്റ് മുൻപ് രണ്ട് തവണ ഡിലീറ്റ് ചെയ്തിരുന്നു. റീച്ച് കുറവായാൽ ഇനിയും ഡിലീറ്റ് ചെയ്തിട്ട് വീണ്ടും പോസ്റ്റ് ചെയ്യുമെന്നും ബിന്ദു കൃഷ്ണ ന്യായീകരണ കമന്റിൽ പറയുന്നു.
അതേസമയം, ചിത്രത്തെ കുറിച്ച് വളരെ നല്ല അഭിപ്രായങ്ങളാണ് ബിന്ദു കൃഷ്ണ ഫേസ്ബുക്കിൽ കുറിച്ചിരിക്കുന്നത്. മകൻ ശ്രീകൃഷ്ണയ്ക്കൊപ്പം കൊല്ലം കാർണിവലിലാണ് താൻ സിനിമ കണ്ടതെന്ന് ബിന്ദു കൃഷ്ണ പറയുന്നു. മുരളിയും മാധവിയും അഭിനയിച്ച സിബി മലയിൽ ചിത്രം ആകാശദൂതിനോട് മാളികപ്പുറത്തെ ബിന്ദു കൃഷ്ണ താരതമ്യം ചെയ്തത്.
ഉണ്ണി മുകുന്ദന്റെ അഭിനയം പ്രതീക്ഷകൾക്കതീതമായിരുന്നുവെന്നും ബിന്ദു കൃഷ്ണ ഫേസ്ബുക്ക് പോസ്റ്റിൽ കുറിക്കുന്നുണ്ട്. ചിത്രത്തിന്റെ തിരക്കഥാകൃത്ത് അഭിലാഷ് പിള്ളയെയും സംവിധായകൻ വിഷ്ണു ശശിശങ്കറിനെയും നടീനടന്മാരെയും അണിയറ പ്രവർത്തകരെയുമെല്ലാം ഫേസ്ബുക്ക് പോസ്റ്റിൽ ബിന്ദു കൃഷ്ണ അഭിനന്ദിക്കുന്നു.
ഇനിയും കണ്ടിട്ടില്ലാത്ത എന്റെ അയ്യപ്പനെ ഒരു നാൾ ഞാനും കാണും എന്ന വരികളോടെ അവസാനിക്കുന്ന ഫേസ്ബുക്ക് പോസ്റ്റാണ് ബിന്ദു കൃഷ്ണ പിൻവലിച്ച ശേഷം വീണ്ടും പോസ്റ്റ് ചെയ്തിരിക്കുന്നത്.
Discussion about this post