ഫ്‌ളാക്‌സ് സീഡ്; സ്ത്രീകളുടെ പ്രിയ കൂട്ടുകാരി; അറിയാം അത്ഭുത ഗുണങ്ങൾ

ഇന്ന് നമുക്ക് ഏറെ സുപരിചിതമായ ഒന്നാണ് ഫ്‌ളാക്‌സ് സീഡ് അഥവാ ചണവിത്ത്. പോഷകസമ്പുഷ്ടമായ കാഴ്ചയിൽ മുതിരയോട് സാമ്യം തോന്നും. ചർമ്മ,കേശ സൗന്ദര്യം ആഗ്രഹിക്കുന്നവർക്ക് ഡയറ്റിൽ ഉൾപ്പെടുത്താവുന്ന ഒന്നാണ് ഇത്. ചണവിത്തുകൾ സ്ത്രീകളുടെ അടുത്ത കൂട്ടുകാരി ആണെന്ന് വേണമെങ്കിൽ പറയാം. സ്ത്രീകൾ അനുഭവിക്കുന്ന പിസിഒഡി, ആർത്ത, ഓവുലേഷൻ എന്നിവയിലെ പ്രശ്‌നങ്ങൾ മുതലായവയ്ക്ക് ചണവിത്തുകൾ വലിയ ആശ്വാസം നൽകുന്നു.

പിസിഒഡി

ഇൻസുലിൻ റെസിസ്റ്റൻസ് വന്നാൽ സ്ത്രീകളിൽ പിസിഒഡിയ്ക്കുള്ള സാധ്യത വർദ്ധിക്കും. ഇത് പെട്ടെന്ന് വണ്ണം വയ്ക്കുന്നതിന് കാരണമാകും. ഇതിനൊരു പരിഹാരമാണ് ചണവിത്തുകൾ.ഫ്ളാക്സ് സീഡുകളിലെ ഫൈറ്റോഈസ്ട്രജനുകൾ ഈസ്ട്രജൻ ഉൽപാദനത്തിന് നല്ലതാണ്. ഇതിലൂടെ ഹോർമോൺ വ്യതിയാനം മൂലമുണ്ടാകുന്ന പ്രശ്‌നങ്ങൾക്ക് ഒരു പരിധിവരെ പരിഹാരമാകുന്നു.

ആർത്തവം

ആർത്തവത്തിനും ഓവുലേഷനും ഏറെ സഹായിയാണ് ചണവിത്തുകൾ.
ബ്രെസ്റ്റ് കാൻസർ, പ്രോസ്റ്റേറ്റ് കാൻസർ എന്നിവയെ തടുക്കാൻ നല്ലതാണെന്ന് ചില പഠനങ്ങൾ ചൂണ്ടിക്കാണിക്കുന്നു. മെനോപോസ് അടുക്കുന്ന സ്ത്രീകൾക്കുണ്ടാകുന്ന പല അസ്വസ്ഥതകൾക്കും ഏറെ ഗുണകരമാണ് ഇവ.

ചണവിത്ത് ഡയറ്റിൽ ഉൾപ്പെടുത്തുന്നത് ഉയർന്ന രക്തസമ്മർദ്ദത്തെ നിയന്ത്രിക്കാൻ സഹായിക്കും. രക്തത്തിലെ പഞ്ചസാരയുടെ അളവിനെ നിയന്ത്രിക്കാനുള്ള കഴിവും ഇവയ്ക്കുണ്ട്. അതിനാൽ ടൈപ്പ് 2 പ്രമേഹ രോഗികൾക്കും ഫ്ളാക്സ് സീഡ് ഡയറ്റിൽ ഉൾപ്പെടുത്താം.

സൗന്ദര്യസംരക്ഷണം

ചണവിത്തിൽ ആന്റിഓക്സിഡന്റുകളും ഒമേഗ 3 ഫാറ്റി ആസിഡുകളും ഉയർന്ന അളവിൽ അടങ്ങിയിട്ടുണ്ട്, ഇത് പാടുകൾ കുറയ്ക്കുകയും, ചർമ്മത്തെ കൂടുതൽ മിനുസമാർന്നതും തിളക്കമുള്ളതുമാക്കുകയും ചെയ്യുന്നു. ഫ്‌ളാക്‌സ് സീഡ് ഒരേ സമയം നിർജ്ജീവ ചർമ്മത്തെ പുറംതള്ളാനും ചർമ്മത്തിന് ഈർപ്പം പകരുവാനും സഹായിക്കുന്നു.

കഴിക്കുന്ന രീതി

ചണവിത്ത് പാലിലിട്ടോ വെള്ളത്തിലിട്ടോ ഒക്കെ വേവിച്ച് കഴിക്കാം.
ഇങ്ങനെ കഴിയ്ക്കുമ്പോൾ ഇതിലെ ഫൈറ്റിക് ആസിഡ് എ്ന്ന ഘടകം നീക്കം ചെയ്യപ്പെടുന്നു. ഫൈറ്റിക് ആസിഡ് മറ്റു പോഷകങ്ങളുടെ ആഗിരണം തടയുന്നു. പ്രമേഹമുള്ളവർ ഉലുവ, ജീരകം, ഫ്ളാക്സ് സീഡ് എന്നിവ ചേർത്തു കഴിയ്ക്കാം. ഏറെ നല്ലതാണ്. ഗർഭിണികളും മുലയൂട്ടുന്നവരും ഇത് കഴിയ്ക്കുന്നത് ഒഴിവാക്കുന്നതാണ് ആരോഗ്യകരമെന്ന് ചില പഠനങ്ങൾ പറയുന്നു. ചണവിത്ത് പൊടിച്ച് ഉപ്പുമാവിലോ ദോശമാവിലോ ചേർത്ത് കഴിക്കാം. ചണവിത്ത് പൊടിച്ചതിൽ നെയ്യും മധുരവും ചേർത്ത് സ്വീറ്റായും കഴിക്കാവുന്നതാണ്.ഫ്‌ളാക്‌സ് സീഡ് ഓയിലാണെങ്കിൽ ചൂടാക്കാതെ സാലഡിൽ എല്ലാം ചേർത്ത് കഴിക്കാം.