തെന്നിന്ത്യൻ ബോക്സോഫീസിലേക്ക് വില്ലുകുലച്ച് മാളികപ്പുറം; തെലുങ്ക് ട്രെയിലറിന് വൻ വരവേൽപ്പ്; പ്രദർശനത്തിനെത്തിക്കുന്നത് കാന്താരയും മഗധീരയും ഗജിനിയും തിയേറ്ററുകളിൽ എത്തിച്ച അല്ലു അർജുന്റെ ഗീത ആർട്ട്സ്

സൂപ്പർ ഹിറ്റിൽ നിന്നും മെഗാ ഹിറ്റിലേക്ക് കുതിക്കുന്ന ഉണ്ണി മുകുന്ദൻ ചിത്രം മാളികപ്പുറത്തിന്റെ തെലുങ്ക് ട്രെയിലർ പുറത്തിറങ്ങി. പതിനാറ് മണിക്കൂറിനുള്ളിൽ ഒരു ലക്ഷത്തോളം പേരാണ് ട്രെയിലർ കണ്ടിരിക്കുന്നത്. ചിത്രം തെലുങ്കിൽ വിതരണം ചെയ്യുന്നത് കാന്താരയും മഗധീരയും ഗജിനിയും ഉൾപ്പെടെയുള്ള മെഗാ ഹിറ്റുകൾ പ്രദർശനത്തിനെത്തിച്ച ഗീത ആർട്സാണ്. അല്ലു അരവിന്ദ് സ്‌ഥാപിച്ച ഗീത ആർട്സിന് നേതൃത്വം നൽകുന്നത് തെലുങ്ക് സൂപ്പർ തരാം അല്ലു അർജുനാണ്.

2022 ഡിസംബർ 30ന് പ്രദർശനത്തിനെത്തി സൂപ്പർ ഹിറ്റിൽ നിന്നും മെഗാ ഹിറ്റിലേക്ക് കുതിക്കുകയാണ് മാളികപ്പുറം. വലിയ പ്രേക്ഷക പിന്തുണയാണ് ചിത്രത്തിന് ഇപ്പോഴും തിയേറ്ററുകളിൽ നിന്നും ലഭിക്കുന്നത്. റിലീസ് ചെയ്ത് ഒരു മാസത്തിനുള്ളിൽ നാൽപ്പത് കോടിക്ക് മുകളിൽ കളക്ഷനാണ് ചിത്രം നേടിയിരിക്കുന്നത്. ചിത്രം ജനുവരി 26ന് തെലുങ്കിൽ റിലീസ് ചെയ്യും എന്നാണ് വിവരം.

വിഷ്ണു ശശി ശങ്കറാണ് മാളികപ്പുറം സംവിധാനം ചെയ്തിരിക്കുന്നത്. കാവ്യ ഫിലിം കമ്പനി, ആൻ മെഗാ മീഡിയ എന്നിവയുടെ ബാനറിൽ പ്രിയാ വേണു, നീറ്റ പിന്റോ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. അഭിലാഷ് പിള്ളയാണ് ചിത്രത്തിന്റെ തിരക്കഥാകൃത്ത്. വിഷ്ണു നാരായണൻ ഛായാഗ്രഹണവും ഷമീർ മുഹമ്മദ് എഡിറ്റിംഗും നിർവഹിച്ചിരിക്കുന്ന ചിത്രത്തിന്റെ സംഗീത സംവിധായകൻ രഞ്ജിൻ രാജാണ്.

ഉണ്ണി മുകുന്ദനും ബാലതാരങ്ങളായ ദേവനന്ദന, ശ്രീപഥ് എന്നിവർക്കുമൊപ്പം മനോജ് കെ ജയൻ, ആൽഫി പഞ്ഞിക്കാരൻ, ടിജി രവി, സൈജു കുറുപ്പ്, രമേഷ് പിഷാരടി, ശ്രീജിത്ത് രവി, രൺജി പണിക്കർ തുടങ്ങിയ താരനിരയും ചിത്രത്തിൽ അഭിനയിച്ചിരിക്കുന്നു. മമ്മൂട്ടി ചിത്രമായ നൻപകൽ നേരത്ത് മയക്കം റിലീസിനെത്തിയെങ്കിലും, സ്റ്റെഡി കളക്ഷനിൽ മുന്നേറുന്ന മാളികപ്പുറത്തിന് പ്രധാന കേന്ദ്രങ്ങളിലെല്ലാം വാരാന്ത്യ ബുക്കിംഗ് ഇപ്പോഴേ നിറയുകയാണ്.