അഭിനയ രംഗത്ത് സജീവമല്ലെങ്കിലും മലയാളി സിനിമാ പ്രേക്ഷകരുടെ പ്രിയപ്പെട്ട നടിയാണ് ശോഭന. കാലവും സിനിമയും മാറിയിട്ടും, മലയാള സിനിമയിൽ
നായികമാർ മാറി മാറി രംഗപ്രവേശനം നടത്തിയിട്ടും ശോഭനയെന്ന നായിക ജീവൻ നൽകിയ കഥാപാത്രങ്ങൾ ഇപ്പോഴും മലയാളികളുടെ മനസ്സിലുണ്ട് . അന്യഭാഷാ ചിത്രങ്ങളിലും ശ്രദ്ധേയമായ വേഷങ്ങൾ കൈകാര്യം ചെയ്യാൻ താരത്തിന് ആയി. വർഷങ്ങൾക്ക് ശേഷം ‘വരനെ ആവശ്യമുണ്ട്’ എന്ന ചിത്രത്തീലുടെ വീണ്ടും സിനിമയിൽ തന്റെ സ്ഥാനം ഉറപ്പിക്കാൻ ശോഭനയ്ക്ക് കഴിഞ്ഞു.
സിനിമാ രംഗത്ത് സജീവമല്ലാത്ത ശോഭനയുടെ ശ്രദ്ധ മുഴുവൻ ഇപ്പോൾ നൃത്തത്തിലാണ്. സ്വന്തമായി നൃത്ത വിദ്യാലയം നടത്തുന്ന ശോഭന നിരവധി സ്റ്റേജ് ഷോകളിലാണ് പങ്കെടുക്കാറുള്ളത്. ഇതിന്റെയെല്ലാം വിശേഷം ശോഭന സമൂഹമാദ്ധ്യമത്തിലൂടെ തന്റെ ആരാധകരെ അറിയിക്കാറുമുണ്ട്. അത്തരത്തിൽ താരം പങ്കുവെച്ച ചിത്രമാണ് ഇപ്പോൾ സമൂഹമാദ്ധ്യമം ഏറ്റെടുത്തിരിക്കുന്നത്.
സിനിമാ ആരാധകരുടെ പ്രിയ നടനും നർത്തകനുമായ വിനീതിനൊപ്പമുള്ള ശോഭനയുടെ ചിത്രമാണ് സോഷ്യൽ മീഡിയയിൽ വൈറൽ ആയിരിക്കുന്നത്. ഇൻസ്റ്റ ഗ്രാമിലാണ് ശോഭന ചിത്രം പങ്കുവച്ചിരിക്കുന്നത്. ലോക പ്രശസ്ത നർത്തകി പത്മ സുബ്രമഹ്ണ്യത്തെ ആദരിക്കുന്ന ചടങ്ങിൽ ഇരുവരും ചേർന്ന് നൃത്തം അവതരിപ്പിച്ചിരുന്നു. ഇതിന് മുന്നോടിയായി എടുത്ത ചിത്രമാണ് ശോഭന പങ്കുവച്ചത്. ‘ എന്റെ സഹോദരനും ഞാനും’ എന്ന അടിക്കുറിപ്പോടെയാണ് ശോഭന ചിത്രം പങ്കുവച്ചിരിക്കുന്നത്.
ഏറെ നാളുകൾക്ക് ശേഷമാണ് പ്രേഷകർ ഇരുവരെയും ഒന്നിച്ച് കാണുന്നത്. നൃത്ത പരിപാടികളിലെ മികച്ച ജോഡിയായിരുന്നു വിനീതും ശോഭനയും. അതുകൊണ്ടു തന്നെ നിരവധി പേരാണ് സന്തോഷം പ്രകടമാക്കി രംഗത്ത് എത്തിയിരിക്കുന്നത്.
