കോട്ടയം: പ്രധാനമന്ത്രി നരേന്ദ്രമോദിയെ അവഹേളിക്കുന്ന ബിബിസി ഡോക്യുമെന്ററി പരസ്യമായി പ്രദർശിപ്പിക്കുമെന്ന വെല്ലുവിളിയുമായി സിപിഎം നേതാവ്. സിപിഎം സംസ്ഥാന സമിതിയംഗമായ കെ അനിൽകുമാർ ആണ് ചാനൽ ചർച്ചയ്ക്കിടെ വെല്ലുവിളി നടത്തിയത്. ഡോക്യുമെന്ററി ഡൗൺലോഡ് ചെയ്ത് സൂക്ഷിച്ചിട്ടുണ്ടെന്നും അനിൽകുമാർ ചർച്ചയിൽ പറഞ്ഞു.
മീഡിയവൺ ചാനലിൽ നടന്ന ചർച്ചയിലായിരുന്നു സിപിഎം നേതാവിന്റെ വെല്ലുവിളി. ഡോക്യുമെന്ററി രാജ്യമാകെ പ്രദർശിപ്പിക്കും. നിരോധിക്കുന്നതിന് മുൻപ് ഡൗൺലോഡ് ചെയ്ത് എടുത്തുവെന്നും അനിൽകുമാർ പറഞ്ഞു. ഡോക്യുമെന്ററിയെ കുറിച്ച് ചർച്ചയിൽ പറയവേ താങ്കൾ കണ്ടിരുന്നോ എന്ന അവതാരികയുടെ ചോദ്യത്തോടായിരുന്നു മറുപടി.
പൂർണമായി കാണാൻ കഴിഞ്ഞില്ല, താൻ ബംഗലൂരുവിലായിരുന്നുവെന്നും ഇന്നാണ് കേരളത്തിൽ എത്തിയതെന്നും അനിൽകുമാർ പറയുന്നുണ്ട്. ഞങ്ങൾ ഡൗൺലോഡ് ചെയ്ത് സൂക്ഷിച്ചിട്ടുണ്ട്. കേരളത്തിൽ പരസ്യമായി പ്രദർശിപ്പിക്കുമെന്നും കൂട്ടിച്ചേർക്കുന്നു.
സിപിഎം നിലപാടാണോ എന്ന ചോദ്യത്തിന് സംശയമെന്താണ്, അതിൽ അറച്ചുനിൽക്കേണ്ട കാര്യം എന്താണന്നും ലോകത്ത് എല്ലായിടത്തും അറിയേണ്ട കാര്യമാണിതെന്നും അനിൽകുമാർ ആവർത്തിച്ചു. പ്രദർശനത്തിന് അനുവാദത്തിന് കാത്തുനിൽക്കേണ്ട ആവശ്യമില്ലെന്നും സിപിഎം നേതാവ് മറുപടി നൽകുന്നുണ്ട്.
പ്രധാനമന്ത്രിയെ അവഹേളിക്കുന്ന തരത്തിൽ തയ്യാറാക്കിയ ഡോക്യുമെന്ററിക്കെതിരെ ശക്തമായ പ്രതിഷേധം ഉയരുന്നതിനിടെയാണ് സിപിഎം നേതാവിന്റെ വെല്ലുവിളി. ഇന്ത്യ ജി 20 അദ്ധ്യക്ഷപദം ഏറ്റെടുത്തതിന് പിന്നാലെ പുറത്തുവിട്ട ഡോക്യുമെന്ററിയുടെ ഉദ്ദേശ്യശുദ്ധി തന്നെ അന്താരാഷ്ട്ര തലത്തിൽ ചോദ്യം ചെയ്യപ്പെടുകയാണ്. ഇതിനിടയിലാണ് ഡോക്യുമെന്ററി രാജ്യമൊട്ടാകെ പ്രദർശിപ്പിക്കുമെന്ന് സിപിഎം നേതാവ് ചാനൽ ചർച്ചയിൽ വെല്ലുവിളി നടത്തിയിരിക്കുന്നത്.
Discussion about this post