കോഴിക്കോട്: കോഴിക്കോട് മേപ്പയ്യൂരിൽ നിന്ന് കാണാതായ യുവാവിനെ ഗോവയിൽ നിന്ന് കണ്ടെത്തി. പ്രവാസിയായിരുന്ന ദീപക്കിനെ കഴിഞ്ഞ ജൂൺ 7നാണ് മേപ്പയ്യൂരിലെ വീട്ടിൽ നിന്ന് കാണാതാകുന്നത്. കുടുംബം പോലീസിൽ പരാതി നൽകിയെങ്കിലും ഇയാളെ കുറിച്ച് വിവരമൊന്നും ലഭിച്ചിരുന്നില്ല. ഇതിനിടെ ദീപക്കിന്റേത് എന്നു കരുതി മറ്റൊരു മൃതദേഹം വീട്ടുകാർ ഏറ്റുവാങ്ങുകയും സംസ്‌കരിക്കുകയും ചെയ്തിരുന്നു.
ജൂലൈ 17നാണ് ദീപക്കിനോട് സാദൃശ്യമുള്ള മൃതദേഹം കൊയിലാണ്ടി തീരത്ത് അടിഞ്ഞത്. ദീപക്കിന്റേതാണ് എന്ന നിഗമനത്തിൽ വീട്ടുകാർ ഇത് ഏറ്റുവാങ്ങുകയും സംസ്‌കരിക്കുകയും ചെയ്തിരുന്നു. എന്നാൽ ദീപക്കിന്റെ ബന്ധുക്കളിൽ ചിലർ സംശയം പ്രകടിപ്പിച്ചതോടെ ഡിഎൻഎ സാംപിൾ പരിശോധനയ്ക്ക് അയച്ചു.
സ്വർണക്കടത്ത് സംഘം തട്ടിക്കൊണ്ടു പോയി കൊലപ്പെടുത്തിയ പന്തിരിക്കര സ്വദേശി ഇർഷാദിന്റെ മൃതദേഹമായിരുന്നു ഇതെന്ന് കണ്ടെത്തി. തുടർന്ന് ദീപക്കിനെ കണ്ടെത്താനുള്ള അന്വേഷണം ഊർജ്ജിതമാക്കിയിരുന്നു. ഇതിനിടെയാണ് ദീപക്കിനെ ഗോവയിൽ നിന്ന് കണ്ടെത്തിയത്. അന്വേഷണ സംഘം ഗോവയിലേക്ക് തിരിച്ചിട്ടുണ്ട്.
Discussion about this post