ഇസ്ലാമാബാദ് : മതനിന്ദയാരോപിച്ച് വിക്കിപീഡിയയുടെ സേവനങ്ങൾ പൂർണ്ണമായും വിലക്കിയിരിക്കുകയാണ് പാകിസ്താൻ. മതവിദ്വേഷം പടർത്തുന്ന ഉള്ളടക്കങ്ങൾ പ്രചരിപ്പിച്ചെന്നും അത് നീക്കം ചെയ്തില്ലെന്നും ആരോപിച്ചാണ് വിലക്ക്. പാകിസ്താൻ ടെലികമ്മ്യൂണിക്കേഷൻ അതോറിറ്റിയുടെ മുന്നറിയിപ്പിനെ തുടർന്നാണ് നടപടി. എന്നാൽ വിക്കിപീഡയിൽ നിന്ന് എന്താണ് നീക്കം ചെയ്യാൻ ആവശ്യപ്പെട്ടത് എന്ന കാര്യം വ്യക്തമല്ല. സാമ്പത്തിക പ്രതിസന്ധി മൂലം ആളുകൾ പട്ടിണി കിടക്കുന്ന അവസ്ഥയിലേക്ക് കൂപ്പുകുത്തുമ്പോഴാണ് പാകിസ്താൻ ഇത്തരം നിയമങ്ങൾ കടുപ്പിക്കുന്നത് എന്നത് ചർച്ചയാവുകയാണ്.
കഴിഞ്ഞ മാസമാണ് പാക് സർക്കാർ മതനിന്ദ നിയമങ്ങൾ കൂടുതൽ കടുപ്പിച്ചത്. ഇസ്ലാമിനെയോ മുഹമ്മദ് നബിയെയോ അവഹേളിച്ചതിന് കുറ്റക്കാരെന്ന് കണ്ടെത്തുന്നവർക്ക് വധശിക്ഷ നൽകുന്നതാണ് നിയമം. എന്നാൽ ഇപ്പോൾ മുഹമ്മദ് നബിയുമായി ബന്ധപ്പെട്ടവരെ അപമാനിക്കുന്നതും കടുത്ത ശിക്ഷ ലഭിക്കുന്ന കുറ്റമായി മാറിയിരിക്കുകയാണ്. ഇത് രാജ്യത്തെ ന്യൂനപക്ഷങ്ങളെ പീഡിപ്പിക്കാൻ കൂടുതൽ അവസരങ്ങൾ ഒരുക്കിക്കൊടുക്കുകയാണ്.
രാജ്യം ഒന്നുമില്ലായ്മയിലേക്ക് വീഴുമ്പോഴും മതവിദ്വേഷം പ്രചരിപ്പിച്ചുവെന്ന് ആരോപിച്ച് ജനങ്ങളെ ഒന്നൊന്നായി ഇല്ലാതാക്കാനാണ് പാക് സർക്കാർ ശ്രമിക്കുന്നത്. ഇത് രാജ്യത്ത് തന്നെ വ്യാപക വിമർശനങ്ങൾക്ക് വഴിവെക്കുന്നുണ്ട്. വിക്കിപീഡിയ പോലുള്ള ഓൺലൈൻ പ്ലാറ്റ്ഫോമുകളെ വിലക്കുന്നതിലൂടെ രാജ്യത്തെ രഹസ്യങ്ങൾ പുറത്ത് വിടാതിരിക്കാനുള്ള ശ്രമമാണ് പാക് ഭരണകൂടം നടത്തുന്നത് എന്നാണ് ആക്ഷേപം. ഇത് സർക്കാരിന്റെ ഗൂഢാലോചനയുടെ ഭാഗമാണെന്ന സൂചനകളും ലഭിക്കുന്നുണ്ട്.
Discussion about this post