കേപ് ടൗൺ: എട്ടാമത് ഐസിസി വനിതാ ട്വന്റി 20 ലോകകപ്പ് ക്രിക്കറ്റിന് ഫെബ്രുവരി 10ന് ദക്ഷിണാഫ്രിക്കയിൽ തുടക്കമാകും. കേപ് ടൗണിൽ നടക്കുന്ന ഉദ്ഘാടന മത്സരത്തിൽ ശ്രീലങ്കയാണ് ആതിഥേയരുടെ എതിരാളികൾ.
പത്ത് ടീമുകളാണ് ഈ വർഷത്തെ ടൂർണമെന്റിൽ മാറ്റുരയ്ക്കുന്നത്. ഫെബ്രുവരി 26നാണ് ഫൈനൽ. ഫെബ്രുവരി 12ന് കേപ് ടൗണിൽ ബദ്ധവൈരികളായ പാകിസ്താനെതിരെയാണ്, ഹർമൻപ്രീത് കൗർ നയിക്കുന്ന ഇന്ത്യൻ ടീമിന്റെ ആദ്യ ഗ്രൂപ്പ് മത്സരം.
അഞ്ച് വീതം ടീമുകൾ അടങ്ങുന്ന രണ്ട് ഗ്രൂപ്പുകളായാണ് ടീമുകളെ തരം തിരിച്ചിരിക്കുന്നത്. നിലവിലെ ചാമ്പ്യന്മാരായ ഓസ്ട്രേലിയ, ബംഗ്ലാദേശ്, ന്യൂസിലൻഡ്, ദക്ഷിണാഫ്രിക്ക, ശ്രീലങ്ക എന്നിവരാണ് എ ഗ്രൂപ്പിൽ. ഇംഗ്ലണ്ടിനും അയർലൻഡിനും പാകിസ്താനും വെസ്റ്റ് ഇൻഡീസിനുമൊപ്പം ഗ്രൂപ്പ് ബിയിലാണ് ഇന്ത്യ.
ലീഗ് റൗണ്ടിൽ, ഗ്രൂപ്പിലെ ഓരോ ടീമുകളും പരസ്പരം ഓരോ തവണ ഏറ്റുമുട്ടും. ഇരു ഗ്രൂപ്പുകളിൽ നിന്നും പോയിന്റ് നിലയിൽ മുന്നിലെത്തുന്ന രണ്ട് ടീമുകൾ വീതം നോക്കൗട്ട് ഘട്ടത്തിൽ ഏറ്റുമുട്ടും. ഇവിടെ നിന്നും ജയിച്ച് സെമി ഫൈനലിൽ എത്തുന്ന നാലിൽ, വിജയികളാകുന്ന രണ്ട് ടീമുകൾ കിരീടത്തിനായി ഫെബ്രുവരി 26ന് കേപ് ടൗണിൽ കൊമ്പ് കോർക്കും.
ആകെ 23 മത്സരങ്ങളാണ് ടൂർണമെന്റിൽ ഉള്ളത്. കേപ് ടൗണിലെ ന്യൂലാൻഡ്സ് ക്രിക്കറ്റ് ഗ്രൗണ്ടിന് പുറമെ, പാളിലെ ബൊലാൻഡ് പാർക്ക്, പോർട്ട് എലിസബത്തിലെ സെന്റ് ജോർജ്സ് പാർക്ക് എന്നിവിടങ്ങളിലാണ് മത്സരങ്ങൾ നടക്കുക.
Discussion about this post