ഒന്ന് വാരിപുണരാൻ, ചേർത്ത് പിടിക്കാൻ ഇഷ്ടപ്പെടാത്ത ആരുണ്ട് ഈ ലോകത്ത്.. സ്നേഹപ്രകടനങ്ങളിൽ ഏറ്റവും മനോഹരമായ ഒന്ന് തന്നെയാണ് ആലിംഗനം എന്നതിൽ തർക്കമില്ല. സ്നേഹത്തോടെയുള്ള ആലിംഗനവും സ്പർശവും വൈകാരിക സുരക്ഷിതത്വം മാത്രമല്ല, ആരോഗ്യസംരക്ഷണവും നൽകുമെന്നാണ് പഠനങ്ങൾ ചൂണ്ടിക്കാണിക്കുന്നത്. മൂഡ് മാറ്റാനും സന്തോഷത്തോടെയിരിക്കാനും സുരക്ഷിതരാണെന്ന തോന്നലുണ്ടാക്കാനും കേവലം ഒരു ആലിംഗനത്തിലൂടെ സാധ്യമാകുമത്രേ. സ്നേഹത്തോടെ ആലിംഗനം ചെയ്യുമ്പോൾ തലച്ചോറിലെ ഡോപമീൻ, സെറോടോണിൻ തുടങ്ങിയ രാസവസ്തുക്കളുടെ പ്രവർത്തനം മൂലം ശരീരത്തിലെ രക്തസമ്മർദ്ദം കുറയുകയും ദഹനം നന്നായി നടക്കുകയും മിതമായ ശരീരഭാരം കാത്തുസൂക്ഷിക്കാൻ സാധിക്കുകയും ചെയ്യുന്നുവത്രേ. കൊഗ്നിറ്റീവ് പവറിനെ പുഷ്ടിപ്പെടുത്താനും ആലിംഗനം നമ്മെ സഹായിക്കും.
ഈ ആലിംഗനം പശുക്കളോടാണെങ്കിലോ? അയ്യേ എന്ന് പറയാൻ വരട്ടെ, മാസികപിരിമുറുക്കത്തിൽ നിന്ന് രക്ഷ തേടാൻ പശുക്കളെ കെട്ടിപിടിക്കുന്നതും സ്നേഹ പ്രകടനം നടത്തുന്നതുമെല്ലാം വിദേശികൾ അംഗീകരിച്ച ശാസ്ത്രീയമായ രീതികളാണ്.
കൊറോണ മഹാമാരിക്കാലത്താണ് ഇത് കൂടുതൽ പ്രചാരം നേടിയത്. അൽപ്പം ആശ്വാസത്തിനായി വളർത്തുമൃഗങ്ങളെ കെട്ടിപ്പിടിക്കുന്ന ട്രൻഡ് പിന്നെ പഠനവിധേയമാക്കുകയായിരുന്നു. അമേരിക്കയിൽ ഈ രീതി വിജയിച്ചതോടെ പശു ഫാമുകൾ ഇത് വലിയ തോതിൽ ഏറ്റെടുത്തു. ഒരു മണിക്കൂർ നേരം പശുക്കളെ വാരിപുണരാനും സ്നേഹിക്കാനും ഏകദേശം 75 ഡോളറാണ് ഈടാക്കുന്നത്. ഇന്ത്യൻ രൂപയിൽ ഏതാണ്ട് 6100 രൂപയോളം വരും ഇത്.
പശുക്കളെ ആലിംഗനം ചെയ്യുക മാത്രമല്ല. അവയുടെ തല എടുത്ത് മടിയിൽ വച്ച് തഴുകുക, വശങ്ങളിലൂടെ കെട്ടിപ്പിടിക്കുക തുടങ്ങിയവയെല്ലാം അമേരിക്കക്കാർ വളരെ സാധാരണയായി ഇപ്പോൾ ചെയ്യുന്ന കാര്യങ്ങളാണ്. മാനസിക പിരിമുറുക്കം നേരിടുന്ന പലരും ഇപ്പോൾ ഈ തൊറാപ്പിക്കായി ഡോളറുകൾ ചെലവഴിക്കുന്നു. ബുക്ക് ചെയ്താണ് പലരും ഫാം ഹൗസുകളിലെ പശുക്കളുടെ സേവനം തേടുന്നത്. പശുവിന്റെ ശരീരത്തിലെ ഊഷ്മളമായ ശരീര താപനില, മന്ദഗതിയിലുള്ള ഹൃദയമിടിപ്പ്, വലുപ്പം എന്നിവയാൽ അവയെ ആലിംഗനം ചെയ്യുമ്പോൾ അവിശ്വസനീയമാംവിധം മനസിന് ശാന്തി അനുഭവപ്പെടുന്നു എന്നാണ് അനുഭവസ്ഥർ പറയുന്നത്.
നെതർലാൻഡിലെ ജനങ്ങൾ കൗ നഫ്ളെൻ എന്ന ഒരു തെറാപ്പിയാണ് നടത്തുന്നത്. പശുവിനെ ആലിംഗനം ചെയ്യുക, പശുവിനോടൊത്ത് സമയം ചെലവഴിക്കുക എന്നിവയാണ് ഈ തെറാപ്പിയിൽ ഉൾപ്പെട്ടിട്ടുള്ളത്. പശുക്കളെ വളർത്തുന്ന ഫാമിലേയ്ക്ക് ഒരു ടൂർ നടത്തിക്കൊണ്ടാണ് തെറാപ്പി ആരംഭിക്കുന്നത്. ആദ്യം രണ്ട്, മൂന്ന് മണിക്കൂർ പശുവിനോടൊപ്പം വിശ്രമിക്കുന്നു.പിന്നീട് പശുക്കളെ തലോടിയും മടിയിൽ തല വച്ച് കിടത്തി തഴുകിയും ആലിംഗനം ചെയ്തും തെറാപ്പി പുരോഗമിക്കുകയാണ് ചെയ്യുന്നത്.
മനുഷ്യൻ സാമൂഹ്യമായി ഇടപഴകുമ്പോൾ നമ്മുടെ ശരീരം ഉത്പാദിപ്പിക്കുന്ന ഓക്സിടോസിൻ വർദ്ധിപ്പിക്കാൻ പശു ആലിംഗനത്തിന് കഴിയുമെന്നും,അതുവഴി സമ്മർദ്ദം കുറയ്ക്കാൻ ഇതിനാകുമെന്നുമാണ് പഠനങ്ങൾ വ്യക്തമാക്കുന്നത്. ഇതാണ് വിദേശീയർ പശുക്കളെ വാരിപണരാൻ ഡോളറുകളൊഴുക്കുന്നത്.
Discussion about this post