തിരുവനന്തപുരം: നൂറ് കോടി ക്ലബും കടന്ന തിയേറ്ററിൽ ചരിത്ര വിജയമായി മാറിയ ഉണ്ണി മുകുന്ദൻ ചിത്രം ‘മാളികപ്പുറം‘ ഒടിടി റിലീസിന് തയ്യാറായി. ഇന്ന് അർദ്ധരാത്രി മുതലാണ് ചിത്രം ഒടിടിയിൽ പ്രദർശനം ആരംഭിക്കുന്നത്. ഡിസ്നി പ്ലസ് ഹോട്ട്സ്റ്റാറാണ് മാളികപ്പുറത്തിന്റെ ഒടിടി സംപ്രേഷണാവകാശം സ്വന്തമാക്കിയിരിക്കുന്നത്.
ഡിസംബർ 30ന് റിലീസ് ചെയ്ത മാളികപ്പുറം വൻ സൈബർ ആക്രമണങ്ങളെ നേരിട്ട് മൗത്ത് പബ്ലിസിറ്റിയിലൂടെയാണ് ചരിത്ര വിജയമായി മാറിയത്. വിഷ്ണു ശശി ശങ്കറാണ് മാളികപ്പുറം സംവിധാനം ചെയ്തിരിക്കുന്നത്. കാവ്യ ഫിലിം കമ്പനി, ആൻ മെഗാ മീഡിയ എന്നിവയുടെ ബാനറിൽ പ്രിയാ വേണു, നീറ്റ പിന്റോ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. അഭിലാഷ് പിള്ളയാണ് ചിത്രത്തിന്റെ തിരക്കഥാകൃത്ത്. വിഷ്ണു നാരായണൻ ഛായാഗ്രഹണവും ഷമീർ മുഹമ്മദ് എഡിറ്റിംഗും നിർവഹിച്ചിരിക്കുന്ന ചിത്രത്തിന്റെ സംഗീത സംവിധായകൻ രഞ്ജിൻ രാജാണ്.
ഉണ്ണി മുകുന്ദനും ബാലതാരങ്ങളായ ദേവനന്ദന, ശ്രീപഥ് എന്നിവർക്കുമൊപ്പം മനോജ് കെ ജയൻ, ആൽഫി പഞ്ഞിക്കാരൻ, ടിജി രവി, സൈജു കുറുപ്പ്, രമേഷ് പിഷാരടി, ശ്രീജിത്ത് രവി, രൺജി പണിക്കർ തുടങ്ങിയ താരനിരയും ചിത്രത്തിൽ അഭിനയിച്ചിരിക്കുന്നു.
