ട്വിറ്ററിന് പുതിയ സിഇഒയെ കണ്ടെത്തി എലോൺ മസ്ക്. അത് ഒരു മനുഷ്യനല്ല, നായയാണ്. മസ്കിന്റെ സ്വന്തം വളർത്തുനായ ഫ്ളോക്കിയെയാണ് സിഇഒയായി പ്രഖ്യാപിച്ചിരിക്കുന്നത്. ഇവൻ മറ്റെയാളേക്കാൾ എന്തുകൊണ്ടും മികച്ചതാണെന്നും മുൻ മേധാവി പരാഗ് അഗ്രവാളിനെ പരോക്ഷമായി വിമർശിച്ചുകൊണ്ട് മസ്ക് ട്വീറ്റ് ചെയ്തു.
44 ബില്യൺ ഡോളർ ഇടപാടിൽ കമ്പനി ഏറ്റെടുത്തതിന് പിന്നാലെയാണ് മസ്ക് പരാഗ് അഗ്രവാളിനെ പുറത്താക്കിയത്. പിന്നാലെ ട്വിറ്ററിന്റെ ലീഗൽ ഹെഡ് വിജയ ഗാഡ്ഡെ, സിഎഫ്ഒ നെൽ സെഗാൾ എന്നിവരെയും പിരിച്ചുവിട്ടിരുന്നു.
ശിബ ഇനു വിഭാഗത്തിൽ പെട്ട ഫ്ളോക്കി സിഇഒയുടെ കസേരയിൽ ഇരിക്കുന്ന ചിത്രം മസ്ക് ട്വിറ്ററിൽ പങ്കുവെച്ചിട്ടുണ്ട്. ചിത്രത്തിൽ, ഫ്ളോക്കി, സിഇഒ എന്നെഴുതിയ കറുത്ത ടീ-ഷർട്ട് ധരിച്ചിരിക്കുന്നത് കാണാം. മേശപ്പുറത്ത് രണ്ട് രേഖകളും ട്വിറ്റർ ലോഗോ ഉള്ള ഒരു ചെറിയ ലാപ്ടോപ്പുമുണ്ട്.
The new CEO of Twitter is amazing pic.twitter.com/yBqWFUDIQH
— Elon Musk (@elonmusk) February 15, 2023
”ട്വിറ്ററിന്റെ പുതിയ സിഇഒ അതിശയിപ്പിക്കുന്നയാളാണ്” എന്നാണ് മസ്ക് കുറിച്ചത്. മറ്റൊരു ട്വീറ്റിൽ, ”പുതിയ സിഇഒ മറ്റേയാളേക്കാൾ മികച്ചവനാണ്” എന്നും അദ്ദേഹം കൂട്ടിച്ചേർത്തു. മുൻ ട്വിറ്റർ സിഇഒ പരാഗ് അഗർവാളിനെയാണ് മസ്ക് പരാമർശിച്ചത്.
അടുത്തിടെ, താൻ കമ്പനിയുടെ സിഇഒ ആയി തുടരുന്നതിനെ എത്ര പേർ അംഗീകരിക്കുന്നു എന്നറിയാൻ മസ്ക് ഒരു ട്വിറ്റർ പോൾ നടത്തിയിരുന്നു. എന്നാൽ ഭൂരിഭാഗം പേരും അദ്ദേഹം ട്വിറ്റർ മേധാവി ആവേണ്ട എന്നാണ് അഭിപ്രായപ്പെട്ടത്. ഇതോടെ ട്വിറ്ററിന്റെ സിഇഒ ആവാൻ മാത്രം വിഡ്ഡിയായ ഒരാളെ ലഭിച്ചാൽ താൻ ഉടൻ സ്ഥാനമൊഴിയും എന്നായിരുന്നു അദ്ദേഹം പ്രതികരിച്ചിരുന്നു.
Discussion about this post