ന്യൂഡൽഹി: ദേശീയ വനവാസി മഹോത്സവം ‘ആദി മഹോത്സവ്‘ ഉദ്ഘാടനം ചെയ്ത് പ്രധാനമന്ത്രി നരേന്ദ്ര മോദി. ഡൽഹിയിലെ മേജർ ധ്യാൻചന്ദ് സ്റ്റേഡിയത്തിലായിരുന്നു ഉദ്ഘാടനം. ചടങ്ങിൽ സ്വാതന്ത്ര്യ സമര സേനാനി ബിർസ മുണ്ടയ്ക്ക് അദ്ദേഹം പുഷ്പാർച്ചന നടത്തി. കേന്ദ്ര വനവാസികാര്യ വകുപ്പ് മന്ത്രി അർജുൻ മുണ്ടയും ചടങ്ങിൽ പങ്കെടുത്തു.
രാജ്യത്തിന്റെ വനവാസി സംസ്കാരം ദേശീയ ശ്രദ്ധയിലേക്ക് എത്തിക്കുക എന്ന ലക്ഷ്യത്തോടെയാണ് ആദി മഹോത്സവ് സംഘടിപ്പിച്ചിരിക്കുന്നത്. വനവാസി സംസ്കാരത്തിന്റെയും കരകൗശല വൈദഗ്ധ്യത്തിന്റെയും പരമ്പരാഗത കലകളുടെയും സംഗമമായിരിക്കും ആദി മഹോത്സവ്. ഫെബ്രുവരി 27നാണ് സമാപനം.
രാജ്യത്തെ വനവാസി വിഭാഗത്തിന്റെ ക്ഷേമത്തിന് ഉയർന്ന പരിഗണനയാണ് കേന്ദ്ര സർക്കാർ നൽകുന്നതെന്ന് പ്രധാനമന്ത്രി പറഞ്ഞു. രാജ്യത്തിന്റെ വളർച്ചയ്ക്കും പുരോഗതിക്കും വനവാസി സമൂഹം നൽകുന്ന സംഭാവനകൾ വിലമതിക്കാനാകാത്തതാണെന്നും അദ്ദേഹം പറഞ്ഞു. വനവാസി സമൂഹത്തിന്റെ വിഭവങ്ങൾ വിപണിയിലെത്തിച്ച്, രാജ്യത്തിന്റെ വിലയേറിയ പരമ്പരാഗത രുചികളും ഔഷധങ്ങളും ജനങ്ങൾക്ക് അനുഭവവേദ്യമാക്കുവാനും അതുവഴി വനവാസികൾക്ക് വരുമാനം ഉറപ്പാക്കാനുമുള്ള വാർഷിക വിപണന മേളകൾ ആദി മഹോത്സവിന്റെ ഭാഗമായി സംഘടിപ്പിക്കുമെന്ന് വനവാസികാര്യ മന്ത്രാലയം അറിയിച്ചു.
Discussion about this post