കേപ് ടൗൺ: വനിതാ ട്വന്റി 20 ലോകകപ്പ് ഫൈനലിൽ ദക്ഷിണാഫ്രിക്കക്കെതിരെ ഓസ്ട്രേലിയക്ക് മികച്ച സ്കോർ. തകർപ്പൻ ഫോമിൽ ബാറ്റ് വീശുന്ന ഓപ്പണർ ബെഥ് മൂണിയുടെ അർദ്ധ സെഞ്ച്വറിയുടെ കരുത്തിൽ, ടോസ് നേടി ബാറ്റിംഗ് തിരഞ്ഞെടുത്ത ഓസീസ് 20 ഓവറിൽ 6 വിക്കറ്റ് നഷ്ടത്തിൽ 156 റൺസെടുത്തു.
53 പന്തിൽ 74 റൺസുമായി പുറത്താകാതെ നിന്ന മൂണിയാണ് ഓസ്ട്രേലിയയുടെ ടോപ് സ്കോറർ. ആഷ്ലി ഗാർഡ്നർ 21 പന്തിൽ 29 റൺസ് നേടി. എന്നാൽ, മറ്റ് ഓസീസ് ബാറ്റർമാരെ അധികം റൺസ് നേടുന്നതിൽ നിന്നും തടഞ്ഞു നിർത്താൻ ആഫ്രിക്കൻ ബൗളർമാർക്ക് സാധിച്ചു. ദക്ഷിണാഫ്രിക്കക്ക് വേണ്ടി ശബ്നിം ഇസ്മയിൽ, മരിസാനെ കാപ്പ് എന്നിവർ 2 വിക്കറ്റുകൾ വീതം വീഴ്ത്തി.
മറുപടി ബാറ്റിംഗിൽ, കരുതലോടെ ചേസിംഗ് ആരംഭിച്ച ദക്ഷിണാഫ്രിക്ക 8 ഓവർ പിന്നിടുമ്പോൾ 1 വിക്കറ്റ് നഷ്ടത്തിൽ 40 റൺസ് നേടിയിട്ടുണ്ട്. 19 റൺസുമായി ഓപ്പണർ ലോറ വോൾവാർട്ടും 9 റൺസുമായി മരിസാനെ കാപ്പുമാണ് ക്രീസിൽ. 10 റൺസ് നേടിയ ഓപ്പണർ തസ്മിൻ ബ്രിട്ട്സ് ആണ് പുറത്തായത്.
Discussion about this post