നാഗാലാൻഡിലും ബിജെപി സഖ്യം; മേഘാലയയിൽ എൻ.പി.പി; കോൺഗ്രസ് ചിത്രത്തിലില്ലെന്ന് എക്സിറ്റ് പോൾ

ന്യൂഡൽഹി : നാഗാലാന്റിൽ ഇത്തവണയും ബിജെപി -എൻഡിപിപി സഖ്യം അധികാരത്തിലേറുമെന്ന് എക്‌സിറ്റ് പോൾ ഫലങ്ങൾ. 60 സീറ്റുകളുള്ള അസംബ്ലിയിൽ 35-43 സീറ്റുകൾ വരെ സഖ്യം നേടുമെന്നാണ് സൂചന. നാഗാ പീപ്പിൾസ് ഫ്രണ്ട് 2-5 വരെ സീറ്റുകൾ നേടും. കോൺഗ്രസ് 1-3 സീറ്റിൽ ഒതുങ്ങുമെന്നും എക്‌സിറ്റ് പോൾ ഫലങ്ങൾ സൂചന നൽകുന്നു. സീ ന്യൂസ് നടത്തിയ സർവേയിലാണ് ഇക്കാര്യങ്ങൾ വ്യക്തമാക്കുന്നത്.

മേഘാലയയിൽ തൃണമൂലിന് 8 മുതൽ 13 സീറ്റുകൾ വരെ ലഭിക്കുമെന്നാണ് സീ ന്യൂസ് എക്‌സിറ്റ്‌പോൾ പറയുന്നത്. ബിജെപിക്ക് 6 മതുൽ 11 വരെ സീറ്റുകളും ലഭിക്കും. മേഘാലയയിൽ 60 അംഗ സഭയിൽ ഭരണകക്ഷിയായ എൻപിപിക്ക് 21 മുതൽ 26 വരെ സീറ്റുകൾ ലഭിക്കുമെന്നും സീ ന്യൂസ് സർവ്വെ പറയുന്നു.

അതേസമയം സിപിഎമ്മിന്റെ കോട്ടയായിരുന്ന ത്രിപുരയിൽ ഇത്തവണയും കാവിക്കൊടി പാറും എന്ന് എക്‌സിറ്റ് പോൾ ഫലങ്ങൾ വ്യക്തമാക്കുന്നു. 36-45 സീറ്റുകൾ വരെ നേടിക്കൊണ്ട് ബിജെപി ഭരണം നിലനിർത്തുമെന്നാണ് സൂചിപ്പിക്കുന്നത്. ഇടത്-കോൺഗ്രസ് സഖ്യം തകർന്നടിയുമെന്നും ഇന്ത്യ ടുഡേ-മൈ ആക്‌സിസ് ഇന്ത്യ എക്സിറ്റ് പോൾ ഫലം വ്യക്തമാക്കുന്നു.

വടക്കുകിഴക്കൻ സംസ്ഥാനങ്ങളിൽ മേഘാലയയിലും നാഗാലാന്റിലും ഇന്ന് വോട്ടെടുപ്പ് നടന്നപ്പോൾ ത്രിപുരയിൽ ഫെബ്രുവരി 16-നാണ് വോട്ടെടുപ്പ് നടന്നത്. ഓരോ സംസ്ഥാനങ്ങൾക്കും അറുപത് വീതം, ആകെ 180 നിയമസഭാ മണ്ഡലങ്ങളാണുള്ളത്.