പ്ലേറ്റിലെന്ത് ? ഊഹിക്കാൻ കഴിയുമോ എന്ന് സച്ചിൻ; ഹോളി ആഘോഷങ്ങള്‍ക്കിടയില്‍ ഭക്ഷണവിശേഷവുമായി ക്രിക്കറ്റ് ഇതിഹാസം

രാജ്യം ഹോളി ആഘോഷത്തിന്റെ ആവേശത്തിലാണ്. മിക്കയിടങ്ങളിലും നാളെയാണ് ഹോളി എങ്കിലും മുംബൈയിലും പൂനൈയിലും ഇന്നായിരുന്നു ആഘോഷങ്ങള്‍. സെലിബ്രിറ്റികളുടെ നഗരമായ മുംബൈയില്‍ തിരക്കിട്ട ആഘോഷങ്ങള്‍ക്കിടെ സോഷ്യല്‍മീഡിയയിലൂടെ ആരാധകര്‍ക്ക് ആശംസകള്‍ നേരാനും ഹോളി വിശേഷം പങ്കിടാനും താരങ്ങള്‍ മറന്നില്ല.

ക്രിക്കറ്റ് ഇതിഹാസം സച്ചിന്‍ ടെന്‍ഡുല്‍ക്കറും തന്റെ ഹോളി ആഘോഷത്തിന്റെ വിശേഷങ്ങള്‍ ആരാധകരുമായി പങ്കുവെക്കാനെത്തി. ട്വിറ്ററിലാണ് സച്ചിന്‍ തന്റെ ഹോളി ചിത്രം പോസ്റ്റ് ചെയ്തത്. സച്ചിന്റെ വെള്ളക്കുര്‍ത്തയും മുഖവും ഹോളി ആഘോഷത്തിന്റെ ഭാഗമായി നിറയെ മഞ്ഞയും റോസും ചുകപ്പും നിറങ്ങള്‍ കൊണ്ട് മൂടിയ നിലയിലായിരുന്നു. കയ്യില്‍ ഒരു പ്ലേറ്റും പിടിച്ചായിരുന്നു മാസ്റ്റര്‍ ബ്ലാസ്റ്ററിന്റെ നില്‍പ്പ്.

Happy Holi everyone!

Can you guess what’s on my plate? 🍽️ pic.twitter.com/dV1UxVcc9M

— Sachin Tendulkar (@sachin_rt) March 7, 2023

എല്ലാവര്‍ക്കും ഹോളി ആശംസകള്‍ നേരുന്നതിനൊപ്പം കയ്യിലെന്താണെന്ന് ഊഹിക്കാമോ എന്നും ഫോട്ടോയ്ക്ക് അടിക്കുറിപ്പായി സച്ചിന്‍ പോസ്റ്റ് ചെയ്തിരിക്കുന്നു. പുരാന്‍ പോളിയെന്നാണ് മിക്കവരും ഇതിന് മറുപടി നല്‍കിയിരിക്കുന്നത്. ചിലര്‍ പറാത്തയും പായസുവുമായിരിക്കാമെന്നും പറഞ്ഞിട്ടുണ്ട്.