ജ്യോതിശാസ്ത്ര ഗവേഷകരുടെ സ്വപ്നഭൂമിയാണ് ചൊവ്വ. ചൊവ്വയില് ജീവനുണ്ടായിരിക്കാം, ജീവന് അനുകൂലമായ സാഹചര്യങ്ങള് ഉണ്ടായിരിക്കാം എന്നുള്ള പ്രതീക്ഷകള് കാരണം ചൊവ്വയെ കേന്ദ്രീകരിച്ച് നിരവധി പര്യവേക്ഷണ ദൗത്യങ്ങളാണ് നടക്കുന്നത്. മനുഷ്യന് എന്നന്നേക്കുമായി ഭൂമി വിടേണ്ടി വന്നാല് ചൊവ്വ ഒരു അഭയസ്ഥാനമായിരിക്കുമെന്നും അവിടെ മനുഷ്യ കോളനികള് സ്ഥാപിക്കാമെന്നുമെല്ലാം നമുക്ക് പ്രതീക്ഷകളുണ്ട്. എന്തായാലും മനുഷ്യരെത്തുന്നതിന് മുന്നോടിയായി അവിടുത്തെ സാഹചര്യങ്ങള് പഠിക്കാന് മനുഷ്യ നിര്മ്മിത പര്യവേക്ഷണ വാഹനങ്ങള് ചൊവ്വയിലെത്തി കഴിഞ്ഞു. അവിശ്വസിനീയമായ പല കാഴ്ചകളും അവ പകര്ത്തുകയും ചെയ്തു.
ഇപ്പോഴിതാ, നാസയുടെ ചൊവ്വാ പര്യവേഷണ വാഹനമായ ക്യൂരിയോസിറ്റി ഇതാദ്യമായി ചൊവ്വയില് സൂര്യ രശ്മികള് വീഴുന്നതിന്റെ വ്യക്തമായ ചിത്രമെടുത്തിരിക്കുന്നു. ചുവന്ന ഗ്രഹത്തില് മനുഷ്യ നിര്മ്മിത പേടകങ്ങള് കാലങ്ങള്ക്ക് മുമ്പ് എത്തിയിരുന്നെങ്കിലും ഇതാദ്യമായാണ് ചൊവ്വയിലെ സൂര്യകിരണങ്ങളുടെ സ്വര്ഗ്ഗീയ കാഴ്ച നമുക്ക് കാണാനാകുന്നത്.
ഫെബ്രുവരി രണ്ടിന് സൂര്യന് ചക്രവാളത്തില് അസ്തമിച്ചപ്പോള് ക്യൂരിയോസിറ്റി കണ്ട കാഴ്ചയുടെ ചിത്രങ്ങളാണ് ഇപ്പോള് ലഭിച്ചിരിക്കുന്നത്. സൂര്യകിരണങ്ങള് മേഘങ്ങളെ പ്രഭാപൂരിതമാക്കിയിരിക്കുകയാണ്. ഈ സൂര്യകിരണങ്ങളെ ക്രിപ്പെസ്കുലര് രശ്മികളെന്നും വിളിക്കാറുണ്ട്. അസ്തമയ രശ്മികളുടെ (ട്വലൈറ്റ്) ലാറ്റിന് പദമാണത്.
അസ്തമയ രശ്മികളില് തിളങ്ങുന്ന മേഘങ്ങളെ സംബന്ധിച്ച് 2021ല് നടത്തിയ കണ്ടെത്തലുകളെ കുറിച്ച് സര്വ്വേ നടത്തവേയാണ് ഈ അപൂര്വ്വ ദൃശ്യം പകര്ത്താന് ക്യൂരിയോസിറ്റിക്ക് കഴിഞ്ഞത്. രാത്രിയില് പ്രഭാപൂരിതമായ മേഘങ്ങളാണ് ഇവിടെയുള്ളതെന്ന് നേരത്തേ ക്യൂരിയോസിറ്റി കണ്ടെത്തിയിരുന്നു. ചൊവ്വയിലെ മേഘങ്ങള് ഉപരിതലത്തില് നിന്നും 60 കിലോമീറ്റര് മുകളിലാണ് കാണപ്പെടുന്നതെന്നും വാട്ടര് ഐസുകളാലാണ് ഇവ നിര്മ്മിക്കപ്പെട്ടിരിക്കുന്നതെന്നുമാണ് കരുതപ്പെടുന്നത്. ചിത്രത്തില് കാണുന്ന മേഘങ്ങളും വളരെ ഉയരത്തിലാണ് കാണപ്പെടുന്നത്. അതിനാല്ത്തന്നെ ഇവിടെ പ്രത്യേകിച്ച് തണുപ്പായിരിക്കും.
ചൊവ്വയിലെ കാലാവസ്ഥ സംബന്ധിച്ച് സങ്കീര്ണ്ണമെങ്കിലും വളരെ നിര്ണ്ണായകമായ വിവരങ്ങള് നല്കുമെന്നതിനാല് അവിടെയുള്ള മേഘങ്ങളുടെ സ്വഭാവ സവിശേഷതകള് പഠിക്കുകയെന്നത് വളരെ പ്രധാനപ്പെട്ട കാര്യമാണ്. എവിടെ, എങ്ങനെ മേഘങ്ങള് രൂപപ്പെടുന്നു എന്നതറിഞ്ഞാല് ചൊവ്വയിലെ അന്തരീക്ഷ ഘടകങ്ങള് എന്തെല്ലാമാണെന്നും അവിടുത്തെ താപനില, കാറ്റ് എന്നിവയെ കുറിച്ചും ശാസ്ത്രജ്ഞര്ക്ക് അറിയാനാകും.
ജനുവരി 27ന് തൂവലിന്റെ ആകൃതിയിലുള്ള വര്ണ്ണപ്പകിട്ടോടുകൂടിയ മേഘങ്ങളുടെ ചിത്രവും ക്യൂരിയോസിറ്റി പകര്ത്തിയിരുന്നു. സൂര്യരശ്മികള് തട്ടുമ്പോള് ചില പ്രത്യേകതരം മേഘങ്ങള്ക്ക് മഴവില്ലിന് സമാനമായ ബഹുവര്ണ്ണദൃശ്യം സൃഷ്ടിക്കാനാകും. ഇത്തരമൊരു കാഴ്ച കണ്ടാല് അതിനര്ത്ഥം ആ മേഘത്തിലെ കണങ്ങളുടെ വലുപ്പം എല്ലാ ഭാഗങ്ങളിലും തുല്യമാണെന്നാണ്.
സൂര്യരശ്മികളുടെയും മഴവില്ലിന് സമാനമായ ബഹുവര്ണ്ണ ദൃശ്യത്തിന്റെയും ചിത്രങ്ങള് ഒരുമിച്ചാണ് ക്യൂരിയോസിറ്റി ഭൂമിയിലേക്ക് അയച്ചത്.
Discussion about this post