ന്യൂഡൽഹി : ഇന്ത്യക്കെതിരെ പ്രത്യേക അജണ്ടകളോടെ പ്രവർത്തിക്കുന്ന വിദേശ മാദ്ധ്യമങ്ങൾ ജനാധിപത്യം പഠിപ്പിക്കാൻ വരേണ്ടെന്ന് കേന്ദ്രമന്ത്രി അനുരാഗ് ഠാക്കൂർ. കശ്മീരിൽ പത്രസ്വാതന്ത്ര്യമില്ലെന്ന ന്യൂയോർക്ക് ടൈംസിന്റെ അഭിപ്രായത്തോട് പ്രതികരിക്കുകയായിരുന്നു അദ്ദേഹം. ഇന്ത്യ പക്വതയുള്ള രാഷ്ട്രമാണ്. സ്ഥാപിത താത്പര്യങ്ങളോടെ പ്രവർത്തിക്കുന്ന ഇത്തരം മാദ്ധ്യമങ്ങൾ രാജ്യത്തിന്റെ ആഭ്യന്തര കാര്യങ്ങളിൽ ഇടപെടേണ്ടെന്നും അദ്ദേഹം വ്യക്തമാക്കി.
ഇന്ത്യയെക്കുറിച്ച് എന്ത് പറയുമ്പോഴും നിഷ്പക്ഷത മാറ്റിവെക്കുന്ന ഒരു മാദ്ധ്യമമാണ് ന്യൂയോർക്ക് ടൈംസ്. മറ്റ് ചില മാദ്ധ്യമങ്ങളെപ്പോലെ പ്രധാനമന്ത്രി നരേന്ദ്രമോദിക്കെതിരേയും രാജ്യത്തിനെതിരേയും വിദ്വേഷം വളർത്തുക എന്നതാണ് ന്യൂയോർക്ക് ടൈംസിന്റെയും പ്രധാന അജണ്ട. ഇത്തരം പച്ചക്കള്ളങ്ങൾ ഇന്ത്യയിലെ ജനങ്ങൾ വെച്ചു പൊറുപ്പിക്കില്ലെന്നും അദ്ദേഹം ചൂണ്ടിക്കാട്ടി.കശ്മീരിലെ പോലെ പത്രസ്വാതന്ത്ര്യം മറ്റ് സംസ്ഥാനങ്ങളിലും ഇല്ലാതെയാകുമെന്നും ന്യൂയോർക്ക് ടൈംസിലെ ലേഖനത്തിൽ പറഞ്ഞിരുന്നു.
ന്യൂയോർക്ക് ടൈംസിൽ വന്ന പരാമർശം സംശയാസ്പദവും കള്ളക്കഥയുമാണെന്നും അദ്ദേഹം ചൂണ്ടിക്കാട്ടി. രാജ്യത്തിനു പുറത്തു പോയി രാജ്യത്തിനെതിരെ അപവാദ പ്രചാരണം നടത്തുന്ന കോൺഗ്രസ് നേതാവ് രാഹുൽ ഗാന്ധിയേയും അദ്ദേഹം വിമർശിച്ചു.
