ഇസ്ലാമാബാദ് : പാകിസ്താൻ ഇന്ന് ഇന്ത്യയുടെ മുന്നിൽ നാണം കെടുകയാണെന്ന് മുൻ പാക് പ്രധാനമന്ത്രി ഇമ്രാൻ ഖാൻ. രാജ്യത്തെ ഇല്ലാതാക്കിക്കൊണ്ടിരിക്കുന്ന സാമ്പത്തിക മാന്ദ്യം ചൂണ്ടിക്കാണിച്ചുകൊണ്ടാണ് ഇമ്രാൻ ഖാന്റെ പരാമർശം. പാകിസ്താൻ ഇത്രയധികം വെല്ലുവിളികൾ നേരിടേണ്ടി വരാൻ കാരണം മുൻ സൈനിക മേധാവിയും രാജ്യത്തെ അധികാര മാറ്റവുമാണെന്നും ഇമ്രാൻ ഖാൻ കുറ്റപ്പെടുത്തി.
ഹിന്ദുസ്ഥാനിലെ ടിവി കാണുക, അവർ ഇന്ത്യയിൽ പാകിസ്താനെ എങ്ങനെ പരിഹസിക്കുന്നുവെന്ന് മനസിലാകും.. പാകിസ്താൻ നാശത്തിലേക്ക് പോകുന്നത് അവർ ആഘോഷിക്കുകയും ലോകത്തെ മുഴുവൻ അറിയിക്കുകയും ചെയ്യുന്നു എന്നും ഇമ്രാൻ ഖാൻ പറഞ്ഞു.
”ഞങ്ങൾ എന്തിനാണ് രാജ്യത്തിന്റെ സുരക്ഷയിൽ ശ്രദ്ധ കേന്ദ്രീകരിച്ചത്? എന്തിനാണ് സൈന്യത്തെ സൃഷ്ടിച്ചത്? ഞങ്ങളുടെ ഭക്ഷണം വരെ കുറച്ച് സൈന്യത്തെ ഉയർത്തിക്കൊണ്ടുവന്നു. എല്ലാം ഉണ്ടായിട്ടും ശക്തമായ ഒരു നിയമവാഴ്ച കൊണ്ടുവരാൻ നമുക്ക് സാധിച്ചില്ല” എന്നും ഇമ്രാൻ ഖാൻ പറഞ്ഞു.
അതേസമയം ഇമ്രാൻ ഖാനെതിരെ രാജ്യത്ത് നിരവധി കേസുകൾ രജിസ്റ്റർ ചെയ്തിട്ടുണ്ട്. കഴിഞ്ഞ ഞായറാഴ്ച, ഇമ്രാനെ അറസ്റ്റ് ചെയ്യാൻ ഇസ്ലാമാബാദ് പോലീസ് ലാഹോറിലെ വസതിയിൽ എത്തിയിരുന്നു. എന്നാൽ ഇമ്രാൻ വീട്ടിൽ ഉണ്ടായിരുന്നില്ല. അറസ്റ്റിൽ നിന്ന് രക്ഷപ്പെടാൻ ലാഹോറിലെ തന്റെ വീടിന് സമീപമുള്ള അയൽവാസിയുടെ വീട്ടിലേക്ക് മതിൽ ചാടി പോയെന്നാണ് പാക് ആഭ്യന്തര മന്ത്രി റാണ സനാഉല്ല പറഞ്ഞത്.
Discussion about this post