ആർആർആറിലെ നാട്ടു നാട്ടു എന്ന ഗാനത്തിന് ഓസ്കർ പുരസ്‌കാരം ലഭിച്ചതിന് പിന്നാലെ ചിത്രത്തിന്റെ രണ്ടാം ഭാഗവുമായി ബന്ധപ്പെട്ട് പ്രതികരണവുമായി സംവിധായകൻ എസ്എസ് രാജമൗലി. ആർആർആറിന് ഒരു സീക്വൽ ഉണ്ടാകുമെന്ന് കഴിഞ്ഞ വർഷം തന്നെ സംവിധായകൻ വ്യക്തമാക്കിയിരുന്നു. എന്നാൽ ഇപ്പോഴിതാ ആരാധകരെ ആകാക്ഷയിലാഴ്ത്തുന്ന പ്രതികരണവുമായി എത്തിയിരിക്കുകയാണ് അദ്ദേഹം.
ആർആർആറിന്റെ രണ്ടാം ഭാഗത്തിന്റെ തിരക്കഥയുടെ പണികൾ വേഗത്തിലാക്കുമെന്ന് രാജമൗലി പറഞ്ഞു.
പിതാവുമായി ആർആർആറിന്റെ രണ്ടാം ഭാഗത്തേക്കുറിച്ച് ചർച്ച നടത്തിയിരുന്നുവെന്ന് നേരത്തെ രാജമൗലി വ്യക്തമാക്കിയിരുന്നു. അദ്ദേഹം കഥ വികസിപ്പിച്ചുവരികയാണെന്നാണ് പറഞ്ഞത്. നിലവിൽ ഓസ്കർ നേട്ടമാണ് ജോലികൾ വേഗത്തിലാക്കാനുള്ള കാരണമായി അദ്ദേഹം ചൂണ്ടിക്കാട്ടുന്നത്.
സ്വാതന്ത്ര്യസമര സേനാനികളായ അല്ലൂരി സീതാരാമരാജു, കൊമരം ഭീം എന്നിവരുടെ കഥയാണ് ആർആർആർ എന്ന ചിത്രത്തിൽ അവതരിപ്പിച്ചത്. രാംചരൺ തേജയും ജൂനിയർ എൻ.ടി.ആറുമാണ് കേന്ദ്ര കഥാപാത്രങ്ങൾ. അജയ് ദേവ്ഗൺ, ആലിയാ ഭട്ട്, ശ്രീയാ ശരൺ, സമുദ്രക്കനി, ഒലിവിയാ മോറിസ്, റേ സ്റ്റീവൻസൺ എന്നിവരാണ് മറ്റുവേഷങ്ങളിലെത്തിയത്.
Discussion about this post