ന്യൂഡൽഹി: രാജ്യത്ത് പുരുഷ കമ്മീഷൻ രൂപീകരിക്കണമെന്നാവശ്യപ്പെട്ട് സുപ്രീം കോടതിയിൽ ഹർജി. ഗാർഹിക പീഡനത്തിന് ഇരയാകുന്ന വിവാഹിതരായ പുരുഷന്മാരുടെ ആത്മഹത്യ പോലുള്ള കേസുകൾ കൈകാര്യം ചെയ്യാൻ മാർഗനിർദേശങ്ങൾ രൂപീകരിക്കണമെന്നാണ് ആവശ്യം. അഭിഭാഷകനായ മഹേഷ് കുമാർ തിവാരിയാണ് ഹർജി സമർപ്പിച്ചത്.
ദേശീയ ക്രൈം റെക്കോർഡ്സ് ബ്യൂറോ പ്രസിദ്ധീകരിച്ച കണക്കുകൾ ഉദ്ധരിച്ച് അഭിഭാഷകനായ മഹേഷ് കുമാർ തിവാരി സമർപ്പിച്ച ഹർജിയിൽ കഴിഞ്ഞ വർഷം വർഷം രാജ്യത്തുടനീളം 1,64,033 പേർ ആത്മഹത്യ ചെയ്തുവെന്ന് ചൂണ്ടിക്കാണിക്കുന്നു.ഇവരിൽ 81,063 പേർ വിവാഹിതരായ പുരുഷന്മാരും 28,680 പേർ വിവാഹിതരായ സ്ത്രീകളുമാണ്. 2021ൽ 33.2 ശതമാനം പുരുഷൻമാർ കുടുംബപ്രശ്നങ്ങൾ കാരണവും 4.8 ശതമാനം പേർ വിവാഹ സംബന്ധമായ കാരണങ്ങളാലും ജീവനൊടുക്കിയെന്നും റിപ്പോർട്ടിലുണ്ട്.
വിവാഹിതരായ പുരുഷന്മാരുടെ ആത്മഹത്യാ കേസുകൾ കൈകാര്യം ചെയ്യാനും ഗാർഹിക പീഡനം അനുഭവിക്കുന്ന പുരുഷന്മാരുടെ പരാതികൾ സ്വീകരിക്കാനും ദേശീയ മനുഷ്യാവകാശ കമ്മീഷനോട് നിർദേശിക്കണമെന്നും ദേശീയ പുരുഷ കമ്മീഷൻ രൂപീകരിക്കണമെന്നും ഹർജിയിൽ ആവശ്യപ്പെട്ടിട്ടുണ്ട്.
Discussion about this post