‘ഗോസ്റ്റ് ഓഫ് മൗണ്ടെയ്ന്സ്’ അഥവാ പര്വ്വതത്തിലെ പിശാച്- ഹിമപ്പുലി അറിയപ്പെടുന്നത് അങ്ങനെയാണ്. ഹിമാലയത്തിലെ മഞ്ഞുമൂടിക്കിടക്കുന്ന ഗിരിശൃംഗങ്ങളില് വിലസുന്ന, അത്ര പെട്ടെന്നൊന്നും കാണാന് പോലും പിടിതരാത്ത കൂട്ടരാണ് ഇവര്. വളരെ അപൂര്വ്വമായി മാത്രം കണ്മുന്നില് വരുന്ന ഇവരെയൊന്ന് ക്യാമറയില് പകര്ത്താന് കണ്ണിലെണ്ണയൊഴിച്ച് കാത്തിരിക്കുന്ന ഫോട്ടോഗ്രാഫര്മാരുണ്ട്.
എന്തായാലും ഹിമപ്പുലികളെ കാണാന് കാത്തിരുന്നവര്ക്ക് കഴിഞ്ഞ കുറച്ച് നാളുകളായി ലോട്ടറി അടിച്ച അവസ്ഥയാണ്. കുറച്ച് നാളുകള്ക്ക് മുമ്പ് ഒരു അമ്മ ഹിമപ്പുലിയുടെയും രണ്ട് മക്കളുടെയും സ്നേഹപ്രകടനത്തിന്റെ ദൃശ്യങ്ങള്ക്ക് പിന്നാലെ, ഇപ്പോഴിതാ ലഡാക്കിലെ മലനിരകളില് ഇരയെ വേട്ടയാടുന്ന മറ്റൊരു ഹിമപ്പുലിയുടെ ദൃശ്യവും ഇന്റെര്നെറ്റ് ആഘോഷമാക്കുകയാണ്. ചെങ്കുത്തായ മലഞ്ചെരുവിലൂടെ ഇരയ്ക്ക് പിന്നാലെ അനായാസം പായുന്ന പുള്ളിപ്പുലിയുടെ ദൃശ്യങ്ങള് കണ്ട് അത്ഭുതസ്തബ്ധരാകുകയാണ് ഇന്റെര്നെറ്റ് ലോകം.
Ghost of the mountains. Most Agile hunters. Snow leopard hunting near Ullay a Shyapu Ladakh Urial on 13th March. Sharing as received. pic.twitter.com/XginjJNOSS
— The Wild India (@the_wildindia) March 15, 2023
സാധാരണക്കാര്ക്ക് അന്യമായ കാട്ടിലെയും പര്വ്വതങ്ങളിലെയും ഇത്തരം അപൂര്വ്വകാഴ്ചകള് സാമൂഹ്യമാധ്യമങ്ങളിലൂടെ പങ്കുവെച്ച് ലോകത്തെ കാണിക്കാന് നിരവധി ഐഎഫ്എസ് ഓഫീസര്മാര് ഇപ്പോള് മുന്കൈ എടുക്കുന്നുണ്ട്. ലഡാക്കിലെ വേട്ടയില് വ്യാപൃതനായ ഹിമപ്പുലിയുടെ ദൃശ്യവും ട്വിറ്ററില് പങ്കുവെച്ചിരിക്കുന്നത് ഒരു ഐഎഫ്എസ് ഓഫീസറാണ്. എത്ര സമര്ത്ഥനായ വേട്ടക്കാരന് എന്ന അടിക്കുറിപ്പോടെയാണ് പ്രവീണ് സ്വാഹ, ഐഎഫ്എസ് ഈ വീഡിയോ ട്വിറ്ററില് ഷെയര് ചെയ്തിരിക്കുന്നത്.
കുറച്ച് ദിവസങ്ങള്ക്ക് മുമ്പാണ് ഒരു ഹിമപ്പുലിയുടെയും രണ്ട് പുലിക്കുട്ടികളുടെയും വീഡിയോ ഇതേ ഐഎഫ്എസ് ഓഫീസര് ട്വിറ്ററില് പങ്കുവെച്ചത്. ഉയര്ന്ന, തണുപ്പുള്ള മേഖലകാളാണ് ഹിമപ്പുലികള്ക്ക് അനുയോജ്യമായ വാസസ്ഥലങ്ങളെന്നും ചെങ്കുത്തായ ചെരിവുകളിലൂടെ ഓടാനും ലോങ്ജമ്പിനും പേരുകേട്ടവരാണ് ഇവരെന്നും അന്ന് അദ്ദേഹം ട്വിറ്ററില് എഴുതിയിരുന്നു. ലഹൗള്-സ്പിതിയില് നിന്നുള്ള ഹിമപ്പുലികളുടെ ദൃശ്യമായിരുന്നു അന്നദ്ദേഹം പങ്കുവെച്ചത്.
The ghost of the mountains. A snow #leopard family captured by good friend @irsankurrapria. They are one of the most agile hunters on #earth. pic.twitter.com/ylFhmw5DvN
— Parveen Kaswan, IFS (@ParveenKaswan) March 6, 2023
ഡബ്യൂഡബ്ല്യൂഎഫ് വെബ്സൈറ്റിലെ വിവരം അനുസരിച്ച്, ഹിമപ്പുലികള് മധ്യേഷ്യയിലെ 12 രാജ്യങ്ങളിലാണ് കാണപ്പെടുന്നത്. ഉയര്ന്ന, വരണ്ട മലമേഖലകളിലാണ് ഇവയുടെ വാസം. ഇന്ത്യയില് ജമ്മു-കശ്മീര്, ഹിമാചല് പ്രദേശ്, ഉത്തരാഖണ്ഡ്, സിക്കിം, അരുണാചല് പ്രദേശ് എന്നീ സംസ്ഥാനങ്ങളിലെ പര്വ്വതമേഖലകളിലാണ് ഹിമപ്പുലികള് ഉള്ളത്. പൊതുവേ ഒറ്റയ്ക്ക് നടക്കുന്ന ഇവ, ഇരകളെ പിടിക്കുന്നതില് മിടുമിടുക്കരാണ്. വെല്ലുവിളി നിറഞ്ഞ ഭൂപ്രദേശങ്ങളില് പോലും തങ്ങളേക്കാള് മൂന്നിരട്ടി ഭാരമുള്ള ഇരകളെ ഇവര് വേട്ടയാടി കൊന്നുതിന്നും.
Discussion about this post