കൊച്ചി : സംസ്ഥാനത്ത് സ്വർണവില സർവ്വകാല റെക്കോർഡിൽ. ഒരു ദിവസത്തിനിടെ 1200 രൂപയാണ് വർദ്ധിച്ചത്. ഇതോടെ ഒരു പവൻ സ്വർണത്തിന്റെ വില 44,240 രൂപയായി. ഗ്രാമിന് 150 രൂപ കൂടി 5530 രൂപയായി. ഒരാഴ്ചക്കിടെ 3,520 രൂപയുടെ വർദ്ധനവാണ് രേഖപ്പെടുത്തിയത്.
യുഎസിലും യൂറോപ്പിലും സാമ്പത്തിക പ്രതിസന്ധി രൂക്ഷമായതും ബാങ്കുകൾ തകർച്ച നേരിട്ടതുമാണ് സ്വർണവില വർദ്ധനവിന് കാരണം. പവന് 45,000 രൂപ എന്ന നിലയിലേക്ക് ഉയരാൻ ഇനി അധികസമയം വേണ്ടി വരില്ലെന്നാണ് വിലയിരുത്തൽ.
ഇത് ആദ്യമായാണ് സ്വർണവില ഇത്രയും ഉയർന്ന നിരക്കിൽ എത്തുന്നത്. ഇന്നലെയും സ്വർണത്തിന്റെ വില വർദ്ധിച്ചിരുന്നു. പവന് 43,040 രൂപയായിരുന്നു വിപണിവില. ഏറ്റവും ഉയർന്ന മൂന്നാമത്തെ വില ഫെബ്രുവരി 2ന് രേഖപ്പെടുത്തിയ ഗ്രാമിന് 5,360 രൂപയും പവന് 42,880 രൂപയുമാണ്.
