ഇക്കാലത്ത് മിക്ക ആളുകളുടെയും ഉറക്കത്തിന് യാതൊരു ക്രമവുമില്ല. ചിലര്ക്ക് ഉറക്കമില്ലാത്തതാണ് പ്രശ്നമെങ്കില്, മറ്റുചിലര്ക്ക് തിരക്കുകളും സമയമില്ലായ്മയും കാരണം ശരിയായ രീതിയിലുള്ള ഉറക്കക്രമം പിന്തുടരാന് കഴിയുന്നില്ല. എന്തുതന്നെ ആയാലും ആയാസപൂര്ണ്ണമായ ഒരു പകലിന് ശേഷം രാത്രിയില് നല്ല ഉറക്കം കിട്ടേണ്ടത് ശരീരത്തിന് അത്യന്താപേക്ഷിതമാണ്. ഉറങ്ങുമ്പോള് നമ്മുടെ ശരീരം മാത്രമല്ല, മനസും വിശ്രമിക്കുകയാണ്.
നമ്മുടെ തന്നെ ചില ശീലങ്ങളാണ് പലപ്പോഴും ഉറക്കത്തിന് വെല്ലുവിളിയാകുന്നത്. ഇവയൊന്ന് മാറ്റി, ചില നല്ല ഉറക്കശീലങ്ങള് വളര്ത്തിയെടുത്താല് ഉറക്കക്കുറവും അതുകൊണ്ടുള്ള ആരോഗ്യപ്രശ്നങ്ങളും പൂര്ണ്ണമായും അകറ്റാനാകും. ആയുര്വേദ ശാസ്ത്രപ്രകാരം ഉറക്കമില്ലാതാകാന് കാരണമാകുന്ന നമ്മുടെ ചില ശീലങ്ങള് നോക്കാം.
ഉച്ചയ്ക്ക് ശേഷം കഫീന് പാടില്ല
പകല് പന്ത്രണ്ടുമണിക്ക് ശേഷം കഫീന് അടങ്ങിയ ഭക്ഷണപാനീയങ്ങള് ഉപയോഗിക്കാതിരിക്കുക. അത് ഉറക്കത്തെ ഇല്ലാതാക്കും. വൈകുന്നേരങ്ങളില് കാപ്പിയും ചായയും കുടിക്കുന്നവര് ഇതിന്റെ അളവ് കുറച്ചും ഉറങ്ങുന്നതിന് പരമാവധി പത്ത് മണിക്കൂര് മുമ്പെങ്കിലും ഇവയുടെ ഉപയോഗം നിര്ത്തിയും നല്ല ഉറക്കം സംരക്ഷിക്കുക.
സൂര്യാസ്തമയത്തിന് ശേഷമുള്ള കഠിന വ്യായാമം വേണ്ട
വൈകുന്നേരങ്ങള്, പ്രത്യേകിച്ച് സൂര്യാസ്തമയത്തിന് ശേഷമുള്ള സമയം വിശ്രമത്തിനും സ്വാസ്ഥ്യത്തിനുമുള്ളതാണ്. സൂര്യാസ്തമയത്തിന് ശേഷമുള്ള കഠിനമായ വ്യായാമങ്ങള് ഉറക്കത്തെ അകറ്റും. വ്യായാമം നമ്മളെ കൂടുതല് ഊര്ജ്ജ്വസ്വലരാക്കും. ശാരീരികമായും മാനസികമായും കൂടുതല് ഊര്ജ്ജവും ഉന്മേഷവും ഉണ്ടാകുമ്പോള് നമ്മുടെ ബോധം കൂടുതല് ആക്ടീവ് ആകുകയും ഉറക്കസമയത്ത് തലച്ചോറിന് പ്രവര്ത്തനങ്ങള് നിര്ത്തിവെക്കാന് കഴിയാതെയും വരുന്നു. അതുകൊണ്ട് കഠിനമായ വ്യായാമങ്ങള് വൈകുന്നേരത്തിന് മുമ്പ് ചെയ്യാന് ശ്രമിക്കുക. നടത്തം, ധ്യാനം, പ്രാണായാമം പോലുള്ള വ്യായാമങ്ങള് ചെയ്യുന്നത് കൊണ്ട് പ്രശ്നമില്ല.
വൈകിയുള്ള, അമിതമായ അത്താഴം വില്ലനാണ്
സൂര്യാസ്തമയത്തിന് ശേഷം ദഹനപ്രക്രിയ മന്ദഗതിയിലായിരിക്കും. അതുകൊണ്ട് അത്താഴം ലഘുവാക്കുകയാണ് ഉചിതം. അല്ലെങ്കില് സൂര്യാസ്തമയത്തിന് മുമ്പോ സൂര്യാസ്തമയത്തിന് ഒന്നു രണ്ടു മണിക്കൂറിനുള്ളിലോ കഴിക്കുക. ഒരിക്കലും രാത്രി ഒമ്പതുമണിക്ക് ശേഷം അത്താഴം കഴിക്കാതിരിക്കുക. രാത്രി വൈകി, അമിതമായി അത്താഴം കഴിക്കുന്നത് മന്ദത, അസ്വസ്ഥതകള്, ഉദരപ്രശ്നങ്ങള്,ദഹന പ്രശ്നങ്ങള്, വയറില് കൊഴുപ്പ് അടിയല്, ഫാറ്റി ലിവര്, അധിക കൊളസ്ട്രോള് എന്നിവയ്ക്ക് കാരണമാകും.
ഉറങ്ങുന്നതിന് മുമ്പ് മൊബൈലും മറ്റ് ഗാഡ്ജറ്റുകളും ഉപയോഗിക്കരുത്
ഉറങ്ങുന്നതിന് ഒരുമണിക്കൂര് മുമ്പെങ്കിലും മൊബൈലും മറ്റ് ഗാഡ്ജെറ്റുകളും ഉപയോഗിക്കുന്നത് നിര്ത്തുക. മനസിന് സ്വാസ്ഥ്യം ലഭിക്കാനും അത് ആവശ്യമാണ്. മാത്രമല്ല, ഇത്തരം ഉപകരണങ്ങളില് നിന്നുള്ള നീലവെളിച്ചം ശരീരത്തില് മെലടോണിന് എന്ന ഹോര്മോണിന്റെ അളവ് കുറയ്ക്കും. ഗാഢനിദ്ര സാധ്യമാക്കുന്നതിന് മെലാടോണിന് മതിയായ അളവില് ആവശ്യമാണ്. ഉറക്കത്തിന് വളരെ മുമ്പ് സ്ക്രീനുകള് നോക്കുന്നത് നിര്ത്തുന്നത് സ്ട്രെസ്സ് ഹോര്മോണ് ആയ കോര്ട്ടിസോളിന്റെ അളവ് കുറയ്ക്കാനും സഹായിക്കും. ഇത് ശാന്തമായ നിദ്ര സാധ്യമാക്കും.
പകല്വെളിച്ചം കൊള്ളാതിരിക്കുന്നത്
സൂര്യോദയ സമയത്തും സൂര്യാസ്തമയത്തിന് തൊട്ടുമുമ്പ് അല്പ്പം സൂര്യപ്രകാശം കൊള്ളുന്നത് നല്ല ഉറക്കം ലഭിക്കാന് സഹായിക്കും. ശരീരത്തിലെ ജൈവഘടികാരമായ സിക്കാര്ഡിയന് ക്ലോക്ക് ക്രമീകരിക്കാന് സഹായിക്കുമെന്നത് കൊണ്ടാണ് രാവിലെയും വൈകുന്നേരവും സൂര്യപ്രകാശം കൊള്ളാന് ആയുര്വേദം നിര്ദ്ദേശിക്കുന്നത്.
Discussion about this post