ശുക്രനും വ്യാഴവും ആകാശത്ത് ഒന്നിച്ചെത്തി ദൃശ്യവിസ്മയം തീര്‍ത്ത് ആഴ്ചകള്‍ തികയുന്നതിന് മുമ്പ് വാനനിരീക്ഷകര്‍ക്ക് ആകാശ വിരുന്ന് തന്നെ തീര്‍ക്കാനുള്ള ഒരുക്കത്തിലാണ് അഞ്ചുഗ്രഹങ്ങള്‍. മാര്‍ച്ച് 25നും 30നും ഇടയില്‍ രാത്രിയില്‍ അഞ്ച് ഗ്രഹങ്ങളുടെ അപൂര്‍വ്വ പരേഡ് ആകാശത്ത് കാണാം. ഭൂമി എക്വിനോക്‌സിലേക്ക്് (സൂര്യന്‍ ഒരു അയനത്തില്‍ നിന്നും മറ്റേതിലേക്ക് കടക്കുന്ന സമയം, അല്ലെങ്കില്‍ ഭൂമിയില്‍ തുല്യ ദിന-രാത്രങ്ങള്‍ ഉള്ള ദിവസങ്ങള്‍, വിഷുവം, സമരാത്ര ദിനങ്ങള്‍ എന്നും അറിയപ്പെടുന്നു) പ്രവേശിക്കുന്നതിന്റെ ഫലമായി വ്യാഴം, ബുധന്‍, ശുക്രന്‍, യുറാനസ്, ചൊവ്വ എന്നീ ഗ്രഹങ്ങളാണ് ആകാശത്ത് ഒന്നിച്ചെത്താന്‍ പോകുന്നത്.
ഇവര്‍ക്കൊപ്പം ഭൂമിയുടെ സ്വന്തം ഉപഗ്രഹമായ ചന്ദ്രനും കൂടി ആകാശത്ത് ഹാജരാകുന്നതോടെ ഒരു അപൂര്‍വ്വ കാഴ്ചയ്ക്കുള്ള ഭാഗ്യമാണ് വാനനിരീക്ഷകര്‍ക്ക് കൈവരുന്നത്. മാര്‍ച്ച് അവസാനം വരെ ഈ അഞ്ച് ഗ്രഹങ്ങളും ആകാശത്ത് അടുത്തടുത്തായി ഉണ്ടാകുമെങ്കിലും മാര്‍ച്ച് 28ന് ഇവയെ വളരെ വ്യക്തമായി കാണാനാകും. സൂര്യാസ്തമയത്തിന് തൊട്ടുപിന്നാലെ ആയിരിക്കും ഇവയെ ആകാശത്ത് ദൃശ്യമാകുക. പക്ഷേ ഇവ നേര്‍രേഖയില്‍ ആയിരിക്കില്ല.
സൂര്യാസ്തമയം കഴിഞ്ഞ് നിമിഷങ്ങള്‍ക്കുള്ളില്‍ ചക്രവാളത്തിന് തൊട്ടുമുകളിലായി വില്ലിന്റെ ആകൃതിയിലാകും ഇവ പ്രത്യക്ഷപ്പെടുക. ശുക്രന്‍, വ്യാഴം, ചൊവ്വ എന്നീ ഗ്രഹങ്ങളെ വ്യക്തമായി തന്നെ കാണുമെങ്കിലും ഭൂമിയില്‍ നിന്നും താരതമ്യേന വിദൂരത്തിലുള്ള യുറാനസിനെയും ബുധനെയും കാണുക പ്രയാസകരമായിരിക്കും. ശുക്രന്റെ പ്രഭ കാരണം നഗ്ന നേത്രങ്ങള്‍ കൊണ്ടുതന്നെ ശുക്രനെ കാണാനാകും. ഈയിടയായി തിളക്കത്തോടെ ആകാശത്ത് കാണുന്നവയില്‍ ഒന്ന് ശുക്രനാണ്.
മാനം നല്ല തെളിഞ്ഞിരിക്കുകയാണെങ്കില്‍ ദൂരദര്‍ശിനികളിലൂടെ ആകാശത്തെ ഈ അപൂര്‍വ്വ പരേഡ് കാണാന്‍ നിങ്ങള്‍ക്കും സാധിക്കും.
Discussion about this post