ഹുരുൺ ലോക സമ്പന്നരുടെ എണ്ണത്തിൽ ഇന്ത്യ മൂന്നാമത്; ആദ്യ പത്തിൽ മുകേഷ് അംബാനി

2023 M3M ഹുരുണ്‍ ലോക സമ്പന്ന പട്ടികയില്‍ ഇന്ത്യയില്‍ നിന്ന് റിലയന്‍ഡ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനി ആദ്യ പത്ത് ശതകോടീശ്വരരുടെ പട്ടികയില്‍ ഇടം നേടി. പട്ടികയില്‍ ഇടം നേടിയ ഏക ഇന്ത്യക്കാരനാണ് മുകേഷ് അംബാനി. 82 ബില്യണ്‍ ഡോളറാണ് മുകേഷ് അംബാനിയുടെ ആസ്തി. ഇതോടെ തുടര്‍ച്ചയായ മൂന്നാംവര്‍ഷവും ഏഷ്യയിലെ ഏറ്റവും വലിയ പണക്കാരനെന്ന സ്ഥാനം മുകേഷ് അംബാനി നിലനിര്‍ത്തി. പട്ടികയിലെ ഏറ്റവും സമ്പന്നനായ ടെലികോം സംരംഭകനും അംബാനിയാണ്.

ഹിന്‍ഡന്‍ബര്‍ഗ് റിപ്പോര്‍ട്ടിലെ പരാമര്‍ശങ്ങളെ തുടര്‍ന്ന് ആസ്തിയില്‍ ഇടിവുണ്ടായ ഗൗതം അദാനി ആദ്യ പത്ത് ലോക സമ്പന്നരുടെ പട്ടികയില്‍ ഇടം നേടിയില്ല. അതേസമയം ലോകത്തിലെ മൂന്നാമത്തെ സമ്പന്നനായ ഊര്‍ജ്ജ സംരംഭകന്‍ അദാനിയാണ്. ജനുവരിയില്‍ അമേരിക്കന്‍ ഷോര്‍ട്ട് സെല്ലറായ ഹിന്‍ബര്‍ഗിലെ റിപ്പോര്‍ട്ടിലെ പരാമര്‍ശങ്ങളെ തുടര്‍ന്ന് അദാനിയുടെ ആസ്തിയില്‍ 60 ശതമാനം ഇടിവാണ് ഉണ്ടായത്. റിപ്പോര്‍ട്ട് പുറത്തുവരുന്നതിന് മുമ്പ് ലോകത്തിലെ രണ്ടാമത്തെ കോടീശ്വരന്‍ അദാനി ആയിരുന്നുവെന്ന് ഹുരുണ്‍ റിപ്പോര്‍ട്ടില്‍ പറയുന്നു.

ശതകോടീശ്വരരുടെ എണ്ണത്തില്‍ ഇന്ത്യ മൂന്നാമത്

ഈ വര്‍ഷത്തെ ഹുരുണ്‍ സമ്പന്ന പട്ടികയില്‍, ശതകോടീശ്വരരുചെ എണ്ണത്തില്‍ അമേരിക്കയ്ക്കും ചൈനയ്ക്കും ശേഷം ഇന്ത്യ മൂന്നാംസ്ഥാനത്താണ്. എന്നാല്‍ കഴിഞ്ഞ വര്‍ഷത്തെ അപേക്ഷിച്ച് രാജ്യത്തെ ശതകോടീശ്വരരുടെ എണ്ണത്തില്‍ നേരിയ ഇടിവ് ഉണ്ടായിട്ടുണ്ട്. കഴിഞ്ഞ വര്‍ഷം 215 ശതകോടീശ്വരരാണ് ഇന്ത്യയില്‍ ഉണ്ടായിരുന്നതെങ്കില്‍ ഈ വര്‍ഷം അത് 187 ആയി. ഇന്ത്യന്‍ വംശജരായ ശതകോടീശ്വരയെും ചേര്‍ത്താല്‍ ഇന്ത്യന്‍ ബില്യണയര്‍മാരുടെ എണ്ണം 217 ആയി ഉയര്‍ന്നിട്ടുണ്ട്.

ഇന്ത്യയില്‍ മുംബൈ ആണ് ശതകോടീശ്വരരുടെ തട്ടകം. 66 ശതകോടീശ്വരരാണ് മുംബൈയിലുള്ളത്. 39ഉം, 21ഉം ശതകോടീശ്വരരുമായി ന്യൂഡെല്‍ഹിയും ബെംഗളൂരുവുമാണ് രണ്ടും മൂന്നും സ്ഥാനങ്ങളില്‍.

കഴിഞ്ഞ അഞ്ചുവര്‍ഷത്തിനിടെ ഇന്ത്യക്കാരായ 2023 പട്ടികയിലെ ശതകോടീശ്വരര്‍ അവരുടെ സമ്പത്തിലേക്ക് 361 ബില്യണ്‍ ഡോളര്‍ കൂട്ടിച്ചേര്‍ത്തു. ഹോങ്കോംഗിന്റെ മൊത്തം ആഭ്യന്തര ഉല്‍പ്പാദനത്തിന് തുല്യമാണിതെന്ന രസകരമായ വസ്തുതയും റിപ്പോര്‍ട്ടിലുണ്ട്.

ലോകത്ത് 3,112 ശതകോടീശ്വരര്‍

ഹുരുണ്‍ പട്ടിക പ്രകാരം ലോകത്ത് 3,112 ശതകോടീശ്വരരാണ് ഉള്ളത്. എന്നാല്‍ മുന്‍വര്‍ഷത്തേക്കാള്‍ കുറവാണിത്. കഴിഞ്ഞ വര്‍ഷം ഓരോ ആഴ്ചയിലും ലോകത്തിന് അഞ്ച് ബില്യണയര്‍മാരെ വീതം നഷ്ടപ്പെട്ടു. പത്ത് വര്‍ഷത്തിനിടെ ഇത് രണ്ടാം തവണയാണ് ലോക ശതകോടീശ്വരരുടെ എണ്ണത്തില്‍ ഇടിവുണ്ടാകുന്നത്. കഴിഞ്ഞ വര്‍ഷം ലോകത്ത് 3,384 ശതകോടീശ്വരര്‍ ഉണ്ടായിരുന്നു.