ആഫ്രിക്കൻ കാടുകളിലെവിടെയെങ്കിലും വച്ച് ഒരു ഹിപ്പൊപ്പട്ടാമസിന്റെ മുന്നിൽ പെട്ടാൻ നിങ്ങൾ എന്തു ചെയ്യും? സസ്യഭുക്കായ, കണ്ടാലൊരൽപ്പം പാവമാണെന്നു തോന്നുന്ന ഹിപ്പൊയുടെ അടുത്ത് നിന്ന് ഒരു സെൽഫിയെടുത്തേക്കാം എന്നൊക്കെയാണ് ചിന്തിക്കുന്നതെങ്കിൽ സൂക്ഷിക്കണം; ആഫ്രിക്കൻ വനാന്തരങ്ങളിൽ ഏറ്റവും കൂടുതൽ മനുഷ്യനെ കൊല്ലുന്ന ജീവിയാണ് ഹിപ്പൊ. അപ്പോൾ ഒന്നും ആലോചിക്കേണ്ട ജീവനും കൊണ്ട് ഓടിക്കോണം.
കരയിൽ മണിക്കൂറിൽ 30 കിലോമീറ്റർ വരെ വേഗതയിൽ ഓടാനുള്ള കഴിവ് ഹിപ്പോയിക്കുണ്ട്. ആഴം കുറഞ്ഞ ജലാശയങ്ങളും ഒഴുക്കു കുറഞ്ഞ ഭാഗങ്ങളുമാണ് ഇവയുടെ വാസസ്ഥലങ്ങൾ. വെള്ളത്തിനടിയിലൂടെ നടക്കാനും കുതിയ്ക്കാനും ഹിപ്പോയ്ക്ക് സാധിക്കും. 10-15അംഗങ്ങളടങ്ങിയ ചെറിയ സംഘങ്ങളായാണ് സാധാരണ ഇവ കാണപ്പെടുന്നത്. പകൽ സമയങ്ങളിൽ വിശ്രമിയ്ക്കുന്ന ഇവ രാത്രിസമയങ്ങളിൽ ഭക്ഷണം തേടി യാത്ര ആരംഭിക്കും. ആൺഹിപ്പോകൾക്ക് ശരാശരി 1.5മീറ്റർ ഉയരവും 4.5മീറ്റർ നീളവും 1500 മുതൽ 1800 വരെ കി.ഗ്രാം ഭാരവും ഉണ്ടായിരിയ്ക്കും.
മൂർച്ചയുളള പല്ലുകളാണ് ഇവയുടെ ആയുധം. ശത്രുക്കളെ ആക്രമിക്കാൻ വേണ്ടിയാണ് പല്ലുകൾ കൂടുതലായും ഉപയോഗിക്കുക. ഒരൊറ്റ കടികൊണ്ട് മനുഷ്യശരീരത്തെ രണ്ടാക്കി മുറിയ്ക്കാൻ ഇവയ്ക്ക് സാധിക്കും. എല്ലുകൾ ഒടിക്കുകയും മാംസം കീറി മുറിക്കുകയും വളരെ നിസ്സാരം. തനിക്ക് ഭീഷണിയെന്ന് തോന്നുന്ന ഒന്നിനെയും ആക്രമിക്കാൻ ഹിപ്പോകൾ മടിക്കാറില്ല. മറ്റേതൊരു മൃഗത്തേക്കാളും ആഫ്രിക്കയിൽ കൂടുതൽ മനുഷ്യമരണങ്ങൾക്ക് ഉത്തരവാദിയും ഹിപ്പോകൾ തന്നെയാണ്.
ഹിപ്പോകളുടെ ശക്തി അവിശ്വസനീയമാണ്. കൂടാതെ, വളരെ അടുത്ത് വരുന്ന ബോട്ടുകളെയും വള്ളങ്ങളെയും ഇവ ആക്രമിക്കാറുണ്ട്. കണക്കുകൾ പ്രകാരം, ആഫ്രിക്കയിൽ ഹിപ്പോകൾ ഓരോ വർഷവും 500 പേരെയാണ് കൊല്ലുന്നത്. ആന, സിംഹം, മുതല, എന്നിവയെല്ലാം ചേർന്ന് ഒരു വർഷം കൊല്ലുന്ന മനുഷ്യരുടെ എണ്ണത്തേക്കാൾ വളരെ കൂടുതലാണിത്.
സ്വന്തം സാമ്രാജ്യം സംരക്ഷിക്കുന്ന കാര്യത്തിൽ സദാ ജാഗരൂകരായ ആൺ ഹിപ്പൊകൾ പെൺ ഹിപ്പോകളെ ആകർഷിക്കുന്നതിനായി പരസ്പരം ഏറ്റുമുട്ടാറുണ്ട്; ഇത് പലപ്പോഴും ഗുരുതരമായ പരുക്കുകൾ ഉണ്ടാക്കാനോ മരണത്തിനോ തന്നെ കാരണമാകും. പെൺ ഹിപ്പോകൾ ഓരോ രണ്ട് വർഷത്തിലും ഒരു കുട്ടിയെ പ്രസവിക്കും. ഏകദേശം 8 മാസത്തെ ഗർഭാവസ്ഥയ്ക്ക് ശേഷം കുഞ്ഞിനു ജന്മം കൊടുക്കുന്ന അമ്മ ഹിപ്പോകൾ, അടുത്ത മൂന്നു വർഷം വരെ കുഞ്ഞുങ്ങളെ പരിപാലിക്കും. ഈ കാലത്ത് സാധാരണയിലും അപകടകാരികളാണ് പെൺ ഹിപ്പോകൾ. കണ്ണടച്ച് തുറക്കും മുന്നെ അവർ അക്രമിച്ചുകളയും.
അതുകൊണ്ട് തന്നെ ഹിപ്പോകളെ കാണുമ്പോൾ അലസനാണ്, മടിയനാണ് എന്നൊക്കെ കരുതി അടുത്ത് ചെന്ന് ഡാൻസ് കളിക്കരുത് .. പണി പാളും – ജീവിതം തീരുമാനമാകും .
