ഫോട്ടോഷോപ്പല്ല, ഈ സുന്ദരക്കാഴ്ചകൾ സത്യമാണ്! രാത്രിയിൽ തിളങ്ങുന്ന ലോകത്തിലെ അഞ്ച് ബീച്ചുകൾ

കടൽസൗന്ദര്യം എത്ര നുകർന്നാലും മതിവരാത്ത ഒന്നാണ്. പ്രത്യേകിച്ച്, വെള്ളപ്പരവതാനി കണക്കെ തീരവും നീലപ്പളുങ്ക് പോലുള്ള വെള്ളവുമായി തീരത്തേക്ക് നുരഞ്ഞെത്തുന്ന തിരമാലകളും പ്രശാന്ത സുന്ദരമായ കാലാവസ്ഥയും ഉള്ള കടൽത്തീരങ്ങൾ എപ്പോഴും നമ്മളെ മാടിവിളിച്ചുകൊണ്ടിരിക്കും.  രാത്രിയായാൽ കടലിന് വശ്യതയേറും. ആളും ബഹളവുമില്ലാതെ കടൽക്കാറ്റേറ്റ് , തിരമാലകളുടെ ചിരികൾക്ക് കാതോർത്ത്, മനസിനെ അലസമായ ചിന്തകളിൽ അലയാൻ വിട്ട് അങ്ങനെ  വെറുംമണലിൽ കിടക്കണം.

ഇതുമാത്രമല്ല, രാത്രിയിൽ ചില മായാജാലങ്ങൾ കാണിക്കുന്ന കടലുകളും ഈ ലോകത്തുണ്ട്, രാത്രിയിൽ തിളങ്ങുന്ന കടലുകൾ. കടലിന്റെ മായാജാലമെന്നൊക്കെ ആലങ്കാരികമായി വിളിക്കാമെങ്കിലും ബയോലൂമിനെസൻസ് എന്ന പ്രതിഭാസം ആണിത്. കവര് എന്ന് പറഞ്ഞാൽ നമുക്ക് പെട്ടെന്ന് മനസിലാകും. കേരളത്തിൽ ആലപ്പുഴയിലും കൊച്ചിയിലുമൊക്കെ കടലിനോട് ചേർന്ന് കിടക്കുന്ന കായലുകളിൽ ഈ പ്രതിഭാസം ഉണ്ടാകാറുണ്ട്.  കുമ്പളങ്ങി നെറ്റ്സ് എന്ന സിനിമയിൽ മിക്കവരും കവരിന്റെ സൗന്ദര്യം അറിഞ്ഞിട്ടുണ്ടാകും.

എന്താണ് കവര്?

ബയോലൂമിസെനസ് അഥവാ കവര് എന്ന പ്രതിഭാസം വെള്ളത്തിലെ ചില  ജീവജാലങ്ങൾ പ്രകാശം പുറപ്പെടുവിപ്പിക്കുകയും അത് പുറത്തേക്ക് ദൃശ്യമാക്കുകയും ചെയ്യുന്നത് കൊണ്ട് സംഭവിക്കുന്നതാണ്. ഈ ജീവജാലങ്ങളുടെ ഉള്ളിൽ നടക്കുന്ന രാസപ്രക്രിയകളുടെ ഫലമായി ഉൽപ്പാദിപ്പിക്കപ്പെടുന്ന ഊർജ്ജമാണ് ഈ പ്രകാശത്തിന് കാരണം. സമുദ്രങ്ങളിൽ ബാക്ടീരിയകൾ മുതൽ സ്രാവുകൾ വരെ ഇത്തരത്തിൽ പ്രകാശം പുറപ്പെടുവിക്കാറുണ്ട്.

മിക്ക കടൽത്തീരങ്ങളിലും ഫൈറ്റോപ്ലാങ്ക്ടൺ എന്ന മൈക്രോആൽഗ ജലോപരിതലത്തിൽ പൊങ്ങിക്കിടക്കാറുണ്ട്. ഇവയാണ് രാത്രിയാകുമ്പോൾ കടലിന് രാത്രിയിൽ ബയോലൂമിസെൻസിലൂടെ ഫ്ളൂറസെന്റ് നീലനിറം നൽകുന്നത്.  നീലനിറത്തിൽ തിളങ്ങുന്ന തിരമാലകൾ അലയടിക്കുന്ന കടൽത്തീരങ്ങൾ എത്ര കണ്ടാലും മതിവരാത്ത കാഴ്ചയാണ്.  ലോകത്തിലെ അത്തരത്തിലുള്ള അഞ്ച് കടൽത്തീരങ്ങളെ പരിചയപ്പെടാം.

മാട്ടു ബീച്ച്, ഉഡുപ്പി, കർണ്ണാടക

ഉഡുപ്പിയിൽ നിന്നും പത്ത് കിലോമീറ്റർ അകലെയുള്ള മാട്ടുബീച്ച് ഇന്ത്യക്കാർക്ക്, പ്രത്യേകിച്ച് മലയാളികളായ നമുക്ക് തിളങ്ങുന്ന കടൽക്കാഴ്ച കാണാൻ ഏറ്റവും അടുത്തുള്ള ബീച്ച് ആണ്. നൊക്ടിലൂക എന്ന സൂക്ഷ്മജീവിയിൽ നിന്നുള്ള ബയോലൂമിസെൻസ് കൊണ്ടാണ് ഇവിടെ കടൽ രാത്രിയിൽ തിളങ്ങുന്നത്. സീ സ്പാർക്കിൾ എന്നും ഈ കടൽജീവിക്ക് പേരുണ്ട്.

ഒകയാമ, ജപ്പാൻ

കടലിനോട് ചേർന്ന പാറക്കൂട്ടങ്ങളും തീരവും  നീലനിറത്തിൽ മിന്നുന്ന അതിമനോഹര കാഴ്ചയാണ് ജപ്പാനിലെ ഒകയാമ കടൽത്തീരത്ത് കാണാൻ കഴിയുക. മൂന്ന് മില്ലിമീറ്റർ മാത്രം വലുപ്പമുള്ള ചെറുചെമ്മീനുകളാണ് ഇവിടെ ബയോലൂമിസെൻസ് ഉണ്ടാക്കുന്നത്. കടലിലെ മിന്നാമിനുങ്ങുകൾ എന്നാണ് ഇവയെ വിളിക്കുന്നത് തന്നെ. രാത്രിയാകുമ്പോഴാണ് ഇവ ഭക്ഷണം തേടിയിറങ്ങുന്നത്. ഇതിനായി രാത്രിയിൽ തീരത്തിനടുത്തേക്ക് നീന്തിയെത്തും.  ഏതാണ്ട് 20-30 മിനിട്ട് ഇവ പ്രകാശിക്കും. വെള്ളം ദേഹത്ത് വീഴുമ്പോൽ ഈ തിളക്കും വീണ്ടും ദൃശ്യമാകും.

ഹെർമോസ ബീച്ച്, കാലിഫോർണിയ

കാലിഫോർണിയയിലെ ഹെർമോസ ബീച്ചിൽ ചെന്നാൽ തിളക്കമുള്ള നീലത്തിരമാലകൾ കാണാം.  ലിങ്കലോഡിനിയം പോളിഹെഡ്ര എന്ന ഫൈറ്റോപ്ലാങ്ക്ടൺ വിഭാഗത്തിലുള്ള  സൂക്ഷ്മ ജീവജാലമാണ് ഇവിടെ ബയോലൂമിസെൻസ് ഉണ്ടാക്കുന്നത്. ലൂസിഫെറിൻ എന്ന പ്രകാശം പുറപ്പെടുവിക്കുന്ന തന്മാത്ര ഇവയുടെ ശരീരത്തിലുണ്ട്.

ജെർവിസ് ബേ, ഓസ്ട്രേലിയ

പലതരത്തിലുള്ള പ്രത്യേകതകൾ കൊണ്ട് പ്രശസ്തമാണ് ഓസ്ട്രേലിയയിലെ ജെർവിസ് ബേ, വെള്ളമണൽ, പളുങ്ക് പോലെ സുതാര്യമായ വെള്ളം, തിമിംഗലക്കാഴ്ച തുടങ്ങി സഞ്ചാരികൾക്ക് കൺനിറയെ, മനംനിറയെ കാഴ്ചവസന്തമൊരുക്കുന്ന ഈ കടൽത്തീരത്തെ ഏറ്റവും മനോഹരമായ കാഴ്ച കവരാണെന്നതിൽ ഒരു സംശയവും ഇല്ല. ഇരുട്ട് പരന്നാൽ തിളങ്ങുന്ന നീലപ്പട്ട് പുതച്ച് അതിസുന്ദരിയാകും ഇവിടുത്തെ കടൽ.

യെല്ലോ സീ ഡലിയൻ, ലിയോണിംഗ്, ചൈന

ചൈനയിലും ഉണ്ട് രാത്രിയിൽ  നീലനിറത്തിൽ തിളങ്ങുന്ന കടൽ. ഫ്ളഗെല്ലേ എന്ന് പേരുള്ള പ്ളാങ്ക്ടൺ ആണ്  ഇതിന് കാരണമെന്ന് വിദഗ്ധർ പറയുന്നു. അന്തരീക്ഷ സ്ഥിതിയിൽ വ്യത്യാസങ്ങൾ ഉണ്ടാകുമ്പോഴാണ് ഇവ പ്രകാശം പുറപ്പെടുവിപ്പിക്കുക. തിരമാലകൾ ശക്തമാകുമ്പോൾ പ്രകാശത്തിനും തീവ്രതയേറും.