വെല്ലിംഗ്ടൺ: പുരുഷ അന്താരാഷ്ട്ര ക്രിക്കറ്റ് മത്സരം നിയന്ത്രിക്കുന്ന ആദ്യ വനിത എന്ന പേരിൽ റെക്കോർഡ് ബുക്കിൽ ഇടം നേടി ന്യൂസിലൻഡുകാരിയായ കിം കോട്ടൺ. ഓവലിൽ ന്യൂസിലൻഡും ശ്രീലങ്കയും തമ്മിൽ നടന്ന രണ്ടാം ട്വന്റി 20 മത്സരം നിയന്ത്രിച്ചാണ് കിം ഈ നേട്ടം സ്വന്തമാക്കിയത്.
മറ്റൊരു ന്യൂസിലൻഡ് അമ്പയർ വെയ്ൻ നൈറ്റ്സിനൊപ്പമാണ് കിം മത്സരം നിയന്ത്രിച്ചത്. ചരിത്രത്തിൽ ആദ്യമായി പുരുഷ അന്താരാഷ്ട്ര മത്സരം നിയന്ത്രിക്കുക എന്ന നേട്ടത്തിനുടമയായ കിമ്മിനെ ഐസിസി അഭിനന്ദിച്ചു. നേട്ടം അഭിമാനകരമാണെന്നും ഐസിസി ട്വീറ്റ് ചെയ്തു. വനിതകൾക്ക് ആദ്യമായി വോട്ടവകാശം നൽകിയ ന്യൂസിലൻഡിൽ തന്നെയാണ് ആദ്യ വനിത, പുരുഷ അന്താരാഷ്ട്ര മത്സരം നിയന്ത്രിച്ചത് എന്നതും അപൂർവതയായി.
മത്സരത്തിൽ ന്യൂസിലൻഡ് ശ്രീലങ്കക്കെതിരെ അനയാസ ജയം നേടി. ശ്രീലങ്ക ഉയർത്തിയ 142 റൺസ് വിജയലക്ഷ്യം ന്യൂസിലൻഡ് 14.4 ഓവറിൽ ഒരു വിക്കറ്റ് മാത്രം നഷ്ടത്തിൽ മറികടന്നു. നിലവിൽ മൂന്ന് മത്സരങ്ങളുടെ പരമ്പര 1-1ന് സമനിലയിലാണ്. ടൈയിൽ അവസാനിച്ച ആദ്യം മത്സരത്തിൽ, സൂപ്പർ ഓവറിൽ ശ്രീലങ്ക വിജയം നേടിയിരുന്നു. ഏപ്രിൽ 8ന് ക്യൂൻസ് ടൗണിലാണ് അവസാന മത്സരം.
Discussion about this post