എറണാകുളം: സംസ്ഥാനത്തെ മൂന്ന് ജില്ലകളിൽ ഇന്ന് താലനില ഉയരാൻ സാദ്ധ്യത. കൊച്ചി സർവ്വകലാശാലയുടെ കാലാവസ്ഥാ വകുപ്പാണ് ഇതുമായി ബന്ധപ്പെട്ട മുന്നറിയിപ്പ് പുറപ്പെടുവിച്ചിട്ടുള്ളത്. ജനങ്ങൾ ജാഗ്രത പാലിക്കണമെന്നും വകുപ്പ് നിർദ്ദേശിച്ചിട്ടുണ്ട.
കോഴിക്കോട്, പാലക്കാട്, തൃശ്ശൂർ എന്നീ ജില്ലകളിലാണ് കഠിനമായ ചൂട് അനുഭവപ്പെടുക. ജില്ലകളിൽ താപസൂചിക 58 ഡിഗ്രി സെൽഷ്യസ് ആയി ഉയരും. അന്തരീക്ഷ ഈർപ്പം, താപനില എന്നിവ കണക്കിലെടുത്ത് അനുഭവപ്പെടുന്ന ചൂട് രേഖപ്പെടുത്തുന്നതാണ് താപസൂചിക. അതേസമയം ചിലയിടങ്ങളിൽ ഒറ്റപ്പെട്ട മഴ ലഭിക്കുമെന്നും കാലാവസ്ഥാ വകുപ്പ് അറിയിച്ചു.
ഉയർന്ന ചൂട് അനുഭവപ്പെടുന്നതിനാൽ പകൽ സമയങ്ങളിൽ, പ്രത്യേകിച്ച് ഉച്ച സമയങ്ങളിൽ ജനങ്ങൾ പുറത്തിറങ്ങരുതെന്ന് കാലാവലസ്ഥാ വകുപ്പ് അറിയിച്ചു. അടിയ്ക്കടി വെള്ളം കുടിച്ച് നിർജ്ജലീകരണം ഒഴിവാക്കണം. പുറത്തിറങ്ങുമ്പോൾ കുട കയ്യിൽ കരുതണം. ഇത് വഴി നേരിട്ട് ശരീരത്തിലേക്ക് വെയിൽ ഏൽക്കുന്നത് തടയാം. സൂര്യരശ്മികളിൽ നിന്നും ശരീരത്തെ സംരക്ഷിക്കാൻ അനുയോജ്യമായ ക്രീമുകൾ ഉപയോഗിക്കാമെന്നും കാലാവസ്ഥാ വകുപ്പ് നിർദ്ദേശിച്ചിട്ടുണ്ട്.
അതേസമയം സംസ്ഥാനത്തെ മറ്റ് ജില്ലകളിലും ചൂട് വർദ്ധിക്കും. കൊല്ലം മുതൽ കോഴിക്കോടുവരെയുള്ള സ്ഥലങ്ങളിൽ താപനില 38 ഡിഗ്രി സെൽഷ്യസ് വരെ ഉയരാമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.
Discussion about this post