കല്‍പറ്റ: വിദ്യാലയമുറ്റത്ത് സഹപാഠിയ്ക്ക് വേണ്ടി പാട്ട് പാടിയ ഷഹ്ന ഷാജഹാനെന്ന ഏഴാം ക്ലാസുകാരിയെ കാണാന്‍ സംവിധായകന് മേജര്‍ രവി എത്തി. പാട്ട് യൂട്യൂബില്‍ ഹിറ്റായതോടെ യെയാണ് അദ്ദേഹം ഷഹ്ന ഷാജഹാനെ കാണാനെത്തിയത്.
കൈനിറയെ ചോക്കലേറ്റുമായി ഷഹ്ന പഠിക്കുന്ന ചുണ്ടേല്‍ ആര്‍.സി ഹൈസ്‌കൂളിലത്തെിയ മേജര്‍ രവി ഈ കുഞ്ഞു ഗായികക്ക് വലിയൊരു സമ്മാനം തന്നെ നല്‍കി. തന്റെ അടുത്ത പടങ്ങളിലൊന്നില്‍ ഷഹ്നക്കു വേണ്ടി ഒരു പാട്ടുണ്ടെന്ന പ്രഖ്യാപനമായിരുന്നു അത്.
ജോണ്‍പോള്‍ തിരക്കഥയെഴുതുന്ന ചിത്രത്തിലാണ് ഷഹ്ന പിന്നണി ഗായികയാവുന്നത്. എന്നു സ്വന്തം മൊയ്തീന്‍ എന്ന ചിത്രത്തിലെ ‘കാത്തിരുന്ന് കാത്തിരുന്ന്….’ എന്ന ഗാനം സ്‌കൂള്‍ അസംബ്‌ളിയില്‍ ആലപിച്ചതിന്റെ വിഡിയോ, മലയാളം അധ്യാപകന്‍ എം.സി. മനോജ് സ്‌കൂളിന്റെ ഫേസ്ബുക് പേജില്‍ പോസ്റ്റ് ചെയ്യുകയായിരുന്നു. ജില്ലാ സ്‌കൂള്‍ കലോത്സവത്തില്‍ ലളിതഗാനം, മാപ്പിളപ്പാട്ട്, പദ്യം ചൊല്ലല്‍ തുടങ്ങിയവക്ക് ഈ കൊച്ചുമിടുക്കി സമ്മാനങ്ങള്‍ നേടിയിട്ടുണ്ട്.
മൂന്നു വര്‍ഷമായി കല്‍പറ്റ കലാകേന്ദ്രയില്‍ സംഗീതം അഭ്യസിക്കുകയാണ്. ഉച്ചയോടെ സ്‌കൂളിലത്തെിയ മേജര്‍ രവി ഷഹ്നയോട് വിശേഷങ്ങളെല്ലാം ചോദിച്ചറിഞ്ഞു. കെട്ടിട നിര്‍മാണ കരാറുകാരനായ ഷാജഹാന്റെയും സുലൈഖയുടെയും മൂന്ന് പെണ്‍മക്കളില്‍ ഇളയവളാണ് ഷഹ്ന. ചേച്ചിമാരായ സജ്‌ലയും സമിജയും അനുജത്തിയെപ്പോലെ പാട്ടുകാര്‍ തന്നെ.
മേജര്‍ രവി വരുന്നതറിഞ്ഞ് തലേന്ന് ഉറക്കം കിട്ടിയില്ലെന്നാന്നായിരുന്നു സംവിധായകനോട് ഷഹ്നയുടെ പ്രതികരണം. ജീവിതത്തിലെ അഭിമാന നിമിഷങ്ങളിലൊന്നാണിതെന്ന് പ്രതികരിച്ച ഷാജഹാന്‍, കുഞ്ഞുനാളിലേ മകള്‍ക്ക് ലഭിച്ച ഭാഗ്യത്തില്‍ ഏറെ സന്തോഷമുണ്ടെന്നും പറഞ്ഞു.
Discussion about this post