വില്‍ സ്മിത്തും ക്രിസ് റോക്കും തമ്മിലുള്ള മുഖത്തടി വിവാദത്തിന് ഏറെമുമ്പ് നമ്മള്‍ ഇന്ത്യക്കാര്‍ സമാനമായ ഒരു വിവാദത്തിന് സാക്ഷികളായിട്ടുണ്ട്. 2008ലായിരുന്നു അത്. മുംബൈ ഇന്ത്യന്‍സും പഞ്ചാബ് കിംഗ്‌സും തമ്മിലുള്ള മത്സരത്തിനിടെ ഹര്‍ഭജന്‍ സിംഗ് മലയാളികളുടെ സ്വന്തം എസ് ശ്രീശാന്തിനെ മുഖത്തടിച്ചു. അതൊക്കെ കഴിഞ്ഞിട്ട് കുറേയായില്ലേ, ഇപ്പോള്‍ വീണ്ടും കുത്തിപ്പൊക്കിയെടുക്കണോ എന്ന് ചോദിക്കരുത്. ഇപ്പോളവര്‍ വീണ്ടും ‘അടി’യായിരിക്കുകയാണ്. പക്ഷേ ഇത്തവണ അത് അഭിനയമാണെന്ന് മാത്രം.
സൊമാറ്റോയുടെ ഒരു പുതിയ പരസ്യത്തിലാണ് ഹര്‍ഭജന്‍ സിംഗും ശ്രീശാന്തും തമ്മില്‍ വീണ്ടും വഴക്കിട്ടിരിക്കുന്നത്. സൊമാറ്റോയുടെ ഉച്ചാരണം സംബന്ധിച്ചാണ് പരസ്യത്തില്‍ ഇരുവരും കലഹിക്കുന്നത്. ഹര്‍ഭജന്‍ “Zomaato” എന്ന് പറയുമ്പോള്‍ ശ്രീശാന്ത് “Zomaito” എന്ന് പറയുന്നു. എന്തായാലും പരസ്യം വന്‍ഹിറ്റായിരിക്കുകയാണ്.
Can’t believe Bhajji pa and Sree fought once again 😪@harbhajan_singh @sreesanth36 #zomatovszomato #Ad pic.twitter.com/sVvIoT9tvL
— Rishabh Pant (@RishabhPant17) April 12, 2023
ശ്രീശാന്തും ഭാജി പായും വീണ്ടും അടിയായെന്ന് വിശ്വസിക്കാനാകുന്നില്ലെന്ന അടിക്കുറിപ്പോടെ ഋഷഭ് പന്ത് പരസ്യ വീഡിയോ ട്വിറ്ററില്‍ പങ്കുവെച്ചു. സൊമാറ്റോയും പന്തിന്റെ ഈ ട്വീറ്റ് ഷെയര്‍ ചെയ്തിട്ടുണ്ട്.’ 2008-2023 ചില കാര്യങ്ങള്‍ ഒരിക്കലും മാറില്ല’ എന്ന നര്‍മ്മത്തില്‍ ചാലിച്ച തലക്കെട്ടാണ് സൊമാറ്റോയും ഈ ട്വീറ്റിന് നല്‍കിയിരിക്കുന്നത്. ക്രിക്കറ്റ് ആരാധകരും മറ്റ് സോഷ്യല്‍ മീഡിയ ഉപയോക്താക്കളും വീഡിയോയ്ക്ക് കമന്റുകളുമായി രംഗത്തെത്തിയിട്ടുണ്ട്.
2008ല്‍ കളിക്കിടെ ശ്രീശാന്തിനെ മര്‍ദ്ദിച്ചതിന് ഹര്‍ഭജന്‍ സിംഗിന് അഞ്ചുകളികളില്‍ ബിസിസിഐ വിലക്കേര്‍പ്പെടുത്തിയിരുന്നു. അന്നത്തെ സംഭവത്തില്‍ തനിക്ക് കുറ്റബോധമുണ്ടെന്ന് ഹര്‍ഭജന്‍ നിരവധി തവണ വ്യക്തമാക്കുകയും പല വേദികളിലും പരസ്യമായി മാപ്പുപറയുകയും ചെയ്തു.
Discussion about this post