ഗർഭാശയ ഗള കാൻസറിനെ തുടക്കത്തിലേ നുള്ളാം; ഇന്ത്യയുടെ അത്ഭുത മരുന്ന് വരുന്നു, ലക്ഷക്കണക്കിന് സ്ത്രീകൾക്ക് ഇനി ആശ്വസിക്കാം

ഇന്ത്യയിലെ ലക്ഷക്കണക്കിന് സ്ത്രീകളുടെ ജീവന് ഭീഷണിയുയർത്തുന്ന ഗർഭാശയ ഗള കാൻസറിനെ (Cervical Cancer) തുടക്കത്തിലേ തടഞ്ഞുനിർത്താൻ ശേഷിയുള്ള ഒരു അത്ഭുത മരുന്ന് ഇന്ത്യയിൽ യാഥാർത്ഥ്യമാകുന്നു. കാൻസറായി മാറാൻ സാധ്യതയുള്ള കോശങ്ങളെ ശരീരത്തിൽ വെച്ചുതന്നെ പൂർണ്ണമായി നശിപ്പിക്കാൻ ശേഷിയുള്ള ‘SHetA2’ എന്ന പുത്തൻ ഗുളികയുടെ വികസനത്തിനാണ് ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ICMR) തുടക്കമിട്ടിരിക്കുന്നത്. രോഗം വരാതെ തടയുന്ന വാക്സിനുകളും പരിശോധനകളും നിലവിലുണ്ടെങ്കിലും, സാമ്പത്തികവും സാമൂഹികവുമായ കാരണങ്ങളാൽ ഇന്ത്യയിലെ ഭൂരിഭാഗം സാധാരണക്കാരായ സ്ത്രീകൾക്കും ഇവ ഇന്നും പ്രാപ്യമല്ല. കൃത്യമായ സമയത്ത് രോഗനിർണ്ണയം സാധ്യമാകാത്തതുകൊണ്ട് മാത്രം ആയിരക്കണക്കിന് അമ്മമാരുടെയും സഹോദരിമാരുടെയും ജീവനാണ് ഓരോ വർഷവും രാജ്യത്ത് പൊലിയുന്നത്. എന്നാൽ കാൻസർ രംഗത്തെ ഈ ഇന്ത്യൻ വിപ്ലവം വരുംദിവസങ്ങളിൽ ചികിത്സാരീതികളെയാകെ മാറ്റിമറിക്കുമെന്നാണ് വിദഗ്ദ്ധർ ചൂണ്ടിക്കാണിക്കുന്നത്.

ഹ്യൂമൻ പാപ്പിലോമ വൈറസ് (HPV) എന്ന അതിശക്തനായ വില്ലനാണ് സ്ത്രീകളിൽ ഗർഭാശയ ഗള കാൻസറിന് പ്രധാന കാരണമാകുന്നത്. ഈ വൈറസ് ബാധ വിട്ടുമാറാതെ ശരീരത്തിൽ തുടരുമ്പോഴാണ് അത് പതുക്കെ കാൻസർ കോശങ്ങളായി പരിണമിക്കുന്നത്. നിലവിൽ കാൻസറിന് തൊട്ടുമുൻപുള്ള ഈ പ്രീ-കാൻസർ ഘട്ടത്തിൽ എത്തുന്ന കോശങ്ങളെ മാറ്റാൻ ശസ്ത്രക്രിയയിലൂടെ ആ ഭാഗം നീക്കം ചെയ്യുക മാത്രമാണ് ഏക വഴി. എന്നാൽ ഇന്ത്യയുടെ സ്വന്തം കണ്ടെത്തലായ ‘SHetA2’ എന്ന മരുന്ന് ഇതിൽ നിന്നൊക്കെ തികച്ചും വ്യത്യസ്തമാണ്. ഇതൊരു ടാർഗെറ്റഡ് തെറാപ്പി ആയിട്ടാണ് പ്രവർത്തിക്കുന്നത്. അതായത് ശരീരത്തിലെ ആരോഗ്യവതികളായ നല്ല കോശങ്ങളെ ഒട്ടും നശിപ്പിക്കാതെ, കാൻസറിന് കാരണമാകുന്ന എച്ച്.പി.വി ബാധിത കോശങ്ങളെ മാത്രം ഈ മരുന്ന് കൃത്യമായി കണ്ടെത്തി ഇല്ലാതാക്കും.

രാജ്യത്തെ പരമോന്നത മെഡിക്കൽ ഗവേഷണ സ്ഥാപനമായ ഐ.സി.എം.ആർ (ICMR) ഈ അത്ഭുത മരുന്നിന്റെ ലൈസൻസ് പ്രമുഖ ഇന്ത്യൻ ഔഷധ നിർമ്മാണ കമ്പനിയായ എംക്യൂർ ഫാർമസ്യൂട്ടിക്കൽസിന് (Emcure Pharmaceuticals) കൈമാറിക്കഴിഞ്ഞു. മരുന്നിന്റെ കൂടുതൽ വികസനത്തിനും വാണിജ്യാടിസ്ഥാനത്തിലുള്ള ഉത്പാദനത്തിനുമായാണ് കരാർ ഒപ്പിട്ടിരിക്കുന്നത്. വരുംദിവസങ്ങളിൽ വിപുലമായ ക്ലിനിക്കൽ ട്രയലുകൾ പൂർത്തിയാക്കി ഈ ഗുളിക വിപണിയിൽ എത്തുന്നതോടെ ലോകത്തിന് തന്നെ മാതൃകയാക്കാവുന്ന തരത്തിൽ കുറഞ്ഞ ചിലവിലുള്ള ഒരു പ്രതിരോധ മാർഗ്ഗമായി ഇത് മാറും. ഗർഭാശയ ഗള കാൻസറിനെ ഒരു മാരക രോഗമെന്ന അവസ്ഥയിൽ നിന്നും ഒരു സാധാരണ ഗുളികയിലൂടെ മാറ്റിയെടുക്കാവുന്ന ഘട്ടത്തിലേക്ക് എത്തിക്കാൻ ഈ വലിയ ചുവടുവെപ്പിന് സാധിക്കുമെന്നാണ് വൈദ്യശാസ്ത്ര ലോകം ഒന്നടങ്കം വിലയിരുത്തുന്നത്.