ശ്രീനഗർ: മികച്ച വിദ്യാഭ്യാസത്തിനായി നല്ലൊരു സ്കൂൾ ലഭിക്കാൻ പ്രധാനമന്ത്രിയോട് അഭ്യർത്ഥന നടത്തിയ എട്ടുവയസുകാരിയുടെ ആഗ്രഹത്തിന് ചിറക് മുളച്ചു. ജമ്മുകശ്മീരിലെ എട്ടുവയസുകാരി സീരത് നാസിന്റെ സ്കൂളിന്റെ നവീകരണ പ്രവർത്തനങ്ങൾ ആരംഭിച്ചു. സ്കൂളിന്റെ ശോചനീയാവസ്ഥ ചൂണ്ടിക്കാട്ടി നല്ലൊരു സ്കൂൾ നൽകണമെന്ന് സീരത് നാസ് വീഡിയോ സന്ദേശത്തിലൂടെ പ്രധാനമന്ത്രി നരേന്ദ്രമോദിയോട് അഭ്യർത്ഥിച്ചിരുന്നു. പ്രിയപ്പെട്ട മോദിജി, എനിക്ക് നല്ലൊരു സ്കൂൾ അനുവദിച്ച് തന്നാലും എന്ന് പറഞ്ഞ്, സ്കൂളിലെ തകർന്ന കെട്ടിടങ്ങളും പടവുകളും ചൂണ്ടിക്കാട്ടിയായിരുന്നു പെൺകുട്ടിയുടെ അഭ്യർത്ഥന.
വീഡിയോ വൈറലായതോടെ പ്രധാനമന്ത്രിയുടെ ശ്രദ്ധയിൽപ്പെടുകയും, സീരതിന്റെ സ്കൂൾ ഉടനടി നവീകരിക്കാൻ അദ്ദേഹം നിർദ്ദേശം നൽകുകയുമായിരുന്നു. അധികം വൈകാതെ തന്നെ അധികൃതർ സ്കൂളിലെത്തുകയും നവീകരണ പ്രവർത്തനങ്ങൾ ആരംഭിക്കുകയും ചെയ്തു.
സ്കൂളിൽ ഉദ്യോഗസ്ഥർ സന്ദർശിക്കുന്നതിനിടയിൽ എട്ടുവയസുകാരി പകർത്തിയ വീഡിയോ ഇപ്പോൾ വൈറലാവുന്നുണ്ട്. കണ്ടോ, മോദിസർ അയച്ചതാണ് അവരെ, സ്കൂളിലെത്തി സ്ഥിതിഗതികൾ വിലയിരുത്തി അവർ, ഇപ്പോൾ എന്റെ സ്കൂൾ നോക്കൂ എന്നാണ് വീഡിയോയിൽ കുട്ടി പറയുന്നത്.
തനിക്ക് ഐഎഎസ് ഓഫീസറാകണമെന്നാണ് ആഗ്രഹമെന്നും അതിലൂടെ രാജ്യത്തെ സേവിക്കാനും മാതാപിതാക്കൾക്ക് അഭിമാനമാണമെന്നും പെൺകുട്ടി പറയുന്നു. പെൺകുട്ടികൾ ആൺകുട്ടികളേക്കാൾ മോശക്കാരല്ലെന്ന് ഇതിലൂടെ തെളിയിക്കാനും കഴിയുമെന്ന് അവൾ പറഞ്ഞു.
Discussion about this post