വേനലവധി പകുതിയായിട്ടും എവിടെയും ടൂര് പോകാന് പറ്റിയില്ലെന്ന് സങ്കടപ്പെടുന്നവര്ക്ക് പെട്ടെന്നൊരു യാത്ര പോയിവരാന് പറ്റിയ ഇടമാണ് നമ്മുടെ തൊട്ടടുത്ത സംസ്ഥാനമായ കര്ണ്ണാടകയിലെ ചിക്കമംഗളൂര്. നഗരത്തിരക്കുകളില് നിന്ന് മാറി ശുദ്ധവായുവും പ്രശാന്തമായ അന്തരീക്ഷവും കൊതിക്കുന്ന പ്രകൃതി സ്നേഹികള്ക്കും സാഹസികത ഇഷ്ടപ്പെടുന്നവര്ക്കും ആവോളം ആസ്വദിക്കാനുള്ള കാഴ്ചകള് ഇവിടെയുണ്ട്. കര്ണ്ണാടകയുടെ സാംസ്കാരിക പൈതൃകത്തെ അടുത്തറിയാനുള്ള അവസരം കൂടിയാണ് ചിക്കമംഗളൂര് യാത്ര.
പശ്ചിമഘട്ടത്തിലാണ് ചിക്കമംഗളൂര് സ്ഥിതി ചെയ്യുന്നത്. അതുകൊണ്ടുതന്നെ പ്രകൃതിരമണീയമായ കാഴ്ചകളാണ് അവിടെയെങ്ങും. കാപ്പിത്തോട്ടങ്ങളും ട്രെക്കിംഗ് പാതകളും വന്യജീവി സങ്കേതങ്ങളും വെള്ളച്ചാട്ടങ്ങളും ചരിത്രപ്രാധാന്യമുള്ള സ്ഥലങ്ങളും സഞ്ചാരികളെ ചിക്കമംഗളൂരുവിലേക്ക് ആകര്ഷിക്കുന്ന ഘടകങ്ങളാണ്.
ആരെയും ആകര്ഷിക്കുന്ന പ്രകൃതിഭംഗി
പ്രകൃതിഭംഗി തന്നെയാണ് ചിക്കമംഗളൂരുവിന്റെ എടുത്തുപറയേണ്ട സവിശേഷത. പച്ച പുതച്ച കുന്നുകള്ക്ക് നടുവിലാണ് ഈ നഗരം സ്ഥിതി ചെയ്യുന്നത്. ഹെബ്ബെ വെള്ളച്ചാട്ടം, ജഹ്രി ഫാള്സ്, കല്ഹാട്ടി ഫാള്സ് തുടങ്ങി മനോഹരമായ നിരവധി വെള്ളച്ചാട്ടങ്ങള് ചിക്കമംഗളൂരുവിനെ കൂടുതല് സുന്ദരിയാക്കുന്നു.
കാപ്പിത്തോട്ടങ്ങളുടെ നഗരം
ഇന്ത്യയിലെ തന്നെ ഏറ്റവും മികച്ച കാപ്പിത്തോട്ടങ്ങളാണ് ചിക്കമംഗളൂരുവിലേത്. ഗൈഡുകളുടെ സഹായത്തോടെ കാപ്പിത്തോട്ടങ്ങള് സന്ദര്ശിക്കാനും കാപ്പിക്കുരു വിളവെടുപ്പും സംസ്കരണവും കാണുവാനും മനസിലാക്കാനും ചിക്കമംഗളൂരുവില് നിരവധി അവസരങ്ങളുണ്ട്.
ട്രെക്കിംഗ്, ഹൈക്കിംഗ്
സാഹസികത ഇഷ്ടപ്പെടുന്നവരെയും ചിക്കമംഗളൂര് നിരാശരാക്കുകയില്ല. പശ്ചിമഘട്ടത്തിലെ ഏറ്റവും മികച്ച ട്രെക്കിംഗ്, ഹൈക്കിംഗ് പാതകളാണ് ചിക്കമംഗളൂരുവിലുള്ളത്. മുള്ളയാനഗിരി ട്രെക്ക്, കുന്ദ്രേമുഖ് ട്രെക്ക്, ബാബാ ബുദംഗി ട്രെക്ക് തുടങ്ങിയവ ഇവിടുത്തെ പ്രശസ്തമായ ട്രെക്കിംഗ് പാതകളാണ്.
വന്യജീവി സങ്കേതം
ഭദ്ര വന്യജീവി സങ്കേതം, കുന്ദ്രേമുഖ് ദേശീയോദ്യാനം തുടങ്ങി നിരവധി വന്യജീവി സങ്കേതങ്ങളും ദേശീയോദ്യാനങ്ങളും ചിക്കമംഗളൂരുവിലുണ്ട്. പലതരത്തിലുള്ള വന്യമൃഗങ്ങളെയും പക്ഷികളെയും ഇവിടെ കാണാനാകും.
പൈതൃക കേന്ദ്രം
സമ്പന്നമായ ചരിത്രമാണ് ചിക്കമംഗളൂരുവിന്റേത്. നിരവധി പുരാതന ക്ഷേത്രങ്ങളും ചരിത്രപ്രാധാന്യമുള്ള സ്ഥലങ്ങളും ഇവിടെയുണ്ട്. വീരഭദ്ര ക്ഷേത്രം, ശ്രിംഗേരി ശാരദ പീഠം, ബേലാവതി ക്ഷേത്രം തുടങ്ങി ചരിത്രസ്ഥലങ്ങള് ഇഷ്ടപ്പെടുന്നവര്ക്ക് വേണ്ടുവോളം ചരിത്രമറിയാനും കാണാനും ചിക്കമംഗളൂരുവില് നിരവധി അവസരങ്ങളുണ്ട്.
Discussion about this post