കീവ്: യുക്രെയ്ന്റെ ഹിന്ദുവിരുദ്ധ നിലപാടിനെതിരെ പ്രതിഷേധം കൊടുമ്പിരി കൊള്ളുന്നു. ട്വിറ്ററടക്കമുള്ള സമൂഹമാദ്ധ്യമങ്ങളിൽ യുക്രെയ്ൻ ഹിന്ദുവിശ്വാസികളോട് മാപ്പ് പറയണമെന്ന ആവശ്യം ശക്തമാകുകയാണ്. ഹിന്ദുക്കളെ അപമാനിച്ചതിലൂടെ ഇന്ത്യയെയും യുക്രെയ്ൻ അപമാനിച്ചെന്ന് സമൂഹമാദ്ധ്യമ ഉപയോക്താക്കൾ കുറ്റപ്പെടുത്തി.
ഹിന്ദു ദേവതയായ മഹാകാളിയെ അനുകരിച്ച് അപകീർത്തിപ്പെടുത്തുന്ന ചിത്രം പങ്കുവച്ച് യുക്രെയ്ൻ പ്രതിരോധമന്ത്രാലയത്തിന്റെ ട്വീറ്റാണ് വിവാദങ്ങൾക്ക് കാരണം. അന്തരിച്ച ഹോളിവുഡ് നടി മെർലിൻ മൺറോയുടെ കുപ്രസിദ്ധ പോസിന് സമാനമായാണ് കാളിയ്ക്ക് സമാനമായ രൂപമുള്ളത്. വർക്ക് ഓഫ് ആർട്ട് എന്ന അടിക്കുറിപ്പോടെയാണ് ഇത് പ്രസിദ്ധീകരിച്ചിരിക്കുന്നത്.
അന്ന് യുഎന്നിൽ ഞങ്ങൾക്കെതിരായി നിലകൊണ്ടു, ഇന്ത്യ ന്യൂക്ലിയർ പരീക്ഷണം നടത്തിയതിന് പിന്നാലെ യുഎൻഎസ്. സിയിൽ ഇന്ത്യക്കെതിരായി വോട്ട് ചെയ്തു. ജമ്മുകശ്മീർ വിഷയത്തിൽ ആർട്ടിക്കിൾ 370 നെ കുറ്റപ്പെടുത്തി,പാകിസ്താന് ആയുധസഹായം നൽകി, ഇന്ന് വീണ്ടും ഞങ്ങളുടെ വിശ്വാസത്തെ അപമാനിച്ചു, നിങ്ങൾക്ക് ഞങ്ങളുടെ സഹായം വേണമെന്ന് പറയുന്നു. ഇനിയും ഇന്ത്യ നിങ്ങൾക്ക് വേണ്ടി റഷ്യയോട് സംസാരിക്കണോ എന്ന് ഒരു സോഷ്യൽ മീഡിയ ഉപഭോക്താവ് ചോദിച്ചു.
യുക്രെയ്ൻ-റഷ്യ യുദ്ധത്തിൽ, ഇന്ത്യ യുദ്ധം അവസാനിപ്പിക്കാനായി സംസാരിക്കണമെന്ന് പല കോണുകളിൽ നിന്നും ആവശ്യം ഉയർന്നിരുന്നു. ഒരു വേള യുക്രെയ്നും സമാനമായ ആവശ്യവുമായി രംഗത്തെത്തിയിരുന്നു.
