ലോകത്തിലെ ഏറ്റവും ചെറിയ ത്വക്കിലെ അര്ബുദം അമേരിക്കയില് കണ്ടെത്തി. കേവലം 0.65 മില്ലിമീറ്റര് ആണ് അതിന്റെ വലുപ്പം. കണ്ണിനടിയില് വര്ഷങ്ങളായുള്ള ഒരു ചെറിയ ചുവപ്പ് കുത്ത് ചികിത്സിക്കാന് ത്വക് രോഗ വിദഗ്ധനെ കാണാനെത്തിയ ക്രിസ്റ്റി സ്റ്റാറ്റ്സ് എന്ന സ്ത്രീയിലാണ് ലോകത്തിലെ ഏറ്റവും ചെറിയ ത്വക്കിലെ അര്ബുദം കണ്ടെത്തിയത്. ക്രിസ്റ്റിയുടെ ത്വക്ക് പരിശോധിക്കുന്നതിനിടെ അവരുടെ വലത്തേ കവിളില് ഒരു ചെറിയ അര്ബുദ വളര്ച്ച ഡോക്ടര് കണ്ടെത്തുകയായിരുന്നു. നഗ്നനേത്രം കൊണ്ട് കാണാന് പോലും സാധിക്കാത്തത്ര ചെറിയ ആ കുത്ത് വളരെ മാരകമായ വിഭാഗത്തില് പെടുന്ന ത്വക്കിലെ അര്ബുദമായ മെലനോമയാണെന്ന് ഒറിഗണ് ഹെല്ത്ത് ആന്ഡ് സയന്സ് യൂണിവേഴ്സിറ്റിയിലെ വിദഗ്ധര് പിന്നീടാണ് തിരിച്ചറിഞ്ഞത്.
കോവിഡ് കാലത്താണ് താന് ആരോഗ്യകാര്യത്തില് ശ്രദ്ധാലുവായതെന്ന് ക്രിസ്റ്റി പറയുന്നു. ഒരു ദിവസം വസ്തുക്കളെ വലുതാക്കി കാണിക്കുന്ന കണ്ണാടിയില് (മാഗ്നിഫയിംഗ് മിറര്) നോക്കവേയാണ് ഒരു ചെറിയ കുത്ത് ശ്രദ്ധയില് പെടുന്നത്. അങ്ങനെയാണ് ക്രിസ്റ്റി ഡോക്ടറെ കാണാന് തീരുമാനിക്കുന്നത്.. ഗിന്നസ് ബുക്കില് ഇടം നേടാന് പാകത്തില് അത്രയും ചെറിയ കുത്തായിരുന്നു അതെന്ന് ഒറിഗണ് ഹെല്ത്ത് ആന്ഡ് സയന്സ് യൂണിവേഴ്സിറ്റി വെബ്സൈറ്റ് വ്യക്തമാക്കുന്നു. മെയ് ഒന്നിന് ഗിന്നസ് വേള്ഡ് റെക്കോഡില് നിന്നുമുള്ള ഒരു ജഡ്ജ് എത്തി ഇക്കാര്യം ഉറപ്പിച്ച് അവാര്ഡ് നല്കുകയും ചെയ്തു. അങ്ങനെ ജനുവരിയില് കണ്ടെത്തിയ മുഖത്തെ ആ കുത്തിന് മെയില് ഗിന്നസ് അവാര്ഡും കിട്ടി.
കൂടുതല് ഇടങ്ങളിലേക്ക് പടരുന്നതിന് മുമ്പ് ആ ആ മെലനോമ ചികിത്സിക്കാന് കഴിഞ്ഞുവെന്നതാണ് ഈ കണ്ടെത്തല് കൊണ്ടുള്ള ഏറ്റവും വലിയ ഗുണമെന്ന് അര്ബുദം തിരിച്ചറിഞ്ഞ ഒറിഗണ് ഹെല്ത്ത് ആന്ഡ് സയന്സ് യൂണിവേഴ്സിറ്റിയിലെ അസിസ്റ്റന്റ് പ്രഫസര് ഡോ.അലക്സാണ്ടര് വിത്കോവ്സ്കി പറയുന്നു. ഡെര്മോസ്കോപ്പിയും റിഫ്ളക്റ്റന്സ് കോണ്ഫോക്കല് മൈക്രോസ്കോപ്പിയും ഉപയോഗിച്ചാണ് ഇത്രയും സൂക്ഷ്മമായ അര്ബുദം കണ്ടെത്താന് ഡോക്ടര്ക്കും സംഘത്തിനും സാധിച്ചത്. അമേരിക്കന് ഗവണ്മെന്റിന്റെ നാഷണല് ലൈബ്രറി ഓഫ് മെഡിസിനില് ഈ കണ്ടെത്തല് സംബന്ധിച്ച വാര്ത്ത പ്രസിദ്ധീകരിച്ചിട്ടുണ്ട്.
Discussion about this post