ചെന്നൈ: മുൻ ഇന്ത്യൻ നായകനും ചെന്നൈ സൂപ്പർ കിംഗ്സ് താരവുമായ എംഎസ് ധോണിയെ പുകഴ്ത്തി തമിഴ്നാട് മുഖ്യമന്ത്രി എംകെ സ്റ്റാലിൻ. തമിഴ്നാടിന്റെ ദത്തുപുത്രൻ ആണ് ധോണിയെന്നും താനും ധോണിയുടെ ആരാധകനാണെന്നും സ്റ്റാലിൻ പറഞ്ഞു. തമിഴ്നാട് ചാമ്പ്യൻഷിപ്പ് ഫൗണ്ടേഷന്റെ ഉദ്ഘാടന ചടങ്ങിലായിരുന്നു ധോണിയെ സാക്ഷിയാക്കി മുൻ ഇന്ത്യൻ നായകനെ സ്റ്റാലിൻ വാനോളം പുകഴ്ത്തിയത്.
ചെന്നൈ സൂപ്പർ കിംഗ്സിനൊപ്പം ധോണി തുടർന്നും കളിക്കണമെന്നും മുഖ്യമന്ത്രി അഭ്യർത്ഥിച്ചു.
കായികരംഗത്ത് മികച്ച താരങ്ങളെ കണ്ടെത്താനും അവരെ വളർത്തിക്കൊണ്ടുവരാനും ലക്ഷ്യമിട്ടാണ് തമിഴ്നാട് ചാമ്പ്യൻഷിപ്പ് ഫൗണ്ടേഷൻ ആരംഭിച്ചത്. ക്രിക്കറ്റിൽ മാത്രമല്ല മറ്റ് കായിക ഇനങ്ങളിലും തമിഴ്നാട്ടിൽ നിന്ന് കൂടുതൽ ധോണിമാരെ സൃഷ്ടിക്കുകയാണ് ഫൗണ്ടേഷന്റെ ലക്ഷ്യമെന്ന് സ്റ്റാലിൻ പറഞ്ഞു.
കായിക മേഖലയെ പൊതു -സ്വകാര്യ പങ്കാളിത്തത്തോടെ കൂടുതൽ ഉയരങ്ങളിലെത്തിക്കുകയാണ് ഇതിലൂടെ ലക്ഷ്യം വെയ്ക്കുന്നതെന്ന് തമിഴ്നാട് കായിക വകുപ്പ് വ്യക്തമാക്കി. മെയ് മൂന്നിനായിരുന്നു ഫൗണ്ടേഷന്റെ പ്രീ ലോഞ്ച്. അഞ്ച് ദിവസം കൊണ്ടു തന്നെ 23.50 കോടി രൂപ സമാഹരിച്ചതായി അധികൃതർ വ്യക്തമാക്കി. ചീഫ് മിനിസ്റ്റേഴ്സ് ട്രോഫിയുടെ ലോഗോയും ചടങ്ങിൽ പ്രകാശനം ചെയ്തു.
