തിരുവനന്തപുരം : ഉപരാഷ്ട്രപതി ജഗ്ദീപ് ധൻകർ ഇന്ന് കേരളത്തിൽ എത്തും. വൈകീട്ട് 4.40 ന് തിരുവനന്തപുരത്ത് എത്തുന്ന അദ്ദേഹം അഞ്ച് മണിക്ക് ശ്രീ പത്മനാഭസ്വാമി ക്ഷേത്രത്തിൽ ദർശനം നടത്തും. തുടർന്ന് രാജ്ഭവനിലേക്ക് പോകും. പത്നി ഡോ.സുധേഷ് ധൻകറും ഉപരാഷ്ട്രപതിക്കൊപ്പമുണ്ടാകും.
രാജ്ഭവനിൽ സന്ദർശകരെ കണ്ട ശേഷം രാത്രി ഗവർണർ ആരിഫ് മുഹമ്മദ് ഖാൻ ഒരുക്കുന്ന വിരുന്നിലും അദ്ദേഹം പങ്കെടുക്കും. പുതുതായി നവീകരിച്ച വിവിഐപി സ്വീറ്റിലാകും താമസം.
നാളെ രാവിലെ 9 ന് ക്ലിഫ് ഹൗസിൽ വെച്ച് മുഖ്യമന്ത്രി പിണറായി വിജയന് ഒപ്പം പ്രഭാത ഭക്ഷണം. ആരിഫ് മുഹമ്മദ് ഖാനും ഇതിൽ പങ്കെടുക്കും. 10.30ന് നിയമസഭാ മന്ദിരത്തിന്റെ രജതജൂബിലി ആഘോഷം ഉദ്ഘാടനം ചെയ്യും.
തുടർന്ന് 12 മണിക്ക് കണ്ണൂരിലേക്കു പോകും. തലശ്ശേരിയിലേക്കു പോകുന്ന ഉപരാഷ്ട്രപതി, തന്റെ അധ്യാപികയായിരുന്ന രത്ന നായരെ സന്ദർശിക്കും. കണ്ണൂർ വിമാനത്താവളത്തിൽ എത്തിയ ശേഷം ഹെലികോപ്റ്ററിൽ ഏഴിമല നാവിക അക്കാദമിയിലേക്ക് പോകും. സന്ദർശനത്തിന് പിന്നാലെ വൈകീട്ട് 6.20ന് ഡൽഹിയിലേക്ക് മടങ്ങും.
Discussion about this post