ന്യൂഡൽഹി: കർണാടക മുഖ്യമന്ത്രിയായി സത്യപ്രതിജ്ഞ ചെയ്തതിന് പിന്നാലെ ജനങ്ങളെ കയ്യിലെടുക്കാനുള്ള ശ്രമങ്ങൾ തുടർന്ന് സിദ്ധരാമയ്യ. വൈകാരികമായുള്ള പ്രതികരണങ്ങൾ കൊണ്ടാണ് ജനങ്ങൾക്കിടയിൽ മതിപ്പുളവാക്കാൻ സിദ്ധരാമയ്യ ശ്രമിക്കുന്നത്. കഴിഞ്ഞ ദിവസം തനിക്കുള്ള സീറോ ട്രാഫിക് പ്രോട്ടോകോൾ റദ്ദാക്കാൻ അദ്ദേഹം നിർദ്ദേശം നൽകിയത് വലിയ വാർത്തയായിരുന്നു. ഇതിന് പിന്നാലെയാണ് വൈകാരികമായ പ്രതികരണവുമായി രംഗത്ത് എത്തിയിരിക്കുകയാണ് അദ്ദേഹം.
തനിക്ക് പൂച്ചെണ്ടിന് പകരം പുസ്തകങ്ങൾ സമ്മാനിച്ചാൽ മതിയെന്നാണ് സിദ്ധരാമയ്യയുടെ പുതിയ പ്രഖ്യാപനം. ബഹുമാനത്തിന്റെ പേരിൽ ജനങ്ങൾ നൽകുന്ന പൂച്ചെണ്ടുകളോ, പൊന്നാടകളോ താൻ ഇനി സ്വീകരിക്കുന്നതല്ലെന്ന് സിദ്ധരാമയ്യ വ്യക്തമാക്കി. അത് സ്വകാര്യ ചടങ്ങുകളിൽ ആണെങ്കിലും പൊതുചടങ്ങുകളിൽ ആണെങ്കിലും. തന്നോട് നിങ്ങൾക്ക് സ്നേഹം ഉണ്ടെങ്കിൽ പുസ്തകങ്ങൾ നൽകൂ. ഈ സ്നേഹം ഇക്കാലവും തുടരണമെന്നാണ് പറയാനുള്ളതെന്നും സിദ്ധരാമയ്യ പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.
കഴിഞ്ഞ ദിവസം സീറോ ട്രാഫിക് പ്രോട്ടോകോൾ റദ്ദാക്കാനുള്ള പ്രഖ്യാപനം സിദ്ധരാമയ്യ നടത്തിയതും ട്വിറ്ററിലൂടെയാണ്. സീറോ ട്രാഫിക് പ്രോട്ടോകോൾ റദ്ദാക്കാൻ താൻ ബംഗളൂരു സിറ്റി പോലീസ് കമ്മീഷണർക്ക് നിർദ്ദേശം നൽകിയിട്ടുണ്ട്. തന്റെ വാഹനം കടന്നു പോകുമ്പോൾ മറ്റ് വാഹന യാത്രികർക്ക് വലിയ ബുദ്ധിമുട്ട് ഉള്ളതായി കണ്ടു. ഇതോടെയാണ് ഇത്തരമൊരു തീരുമാനം എടുത്തത് എന്നും സിദ്ധരാമയ്യ പറഞ്ഞിരുന്നു. ശനിയാഴ്ചയാണ് സിദ്ധരാമയ്യ കർണാടക മുഖ്യമന്ത്രിയായി അധികാരമേറ്റത്
Discussion about this post