കാലിഫോർണിയ: കാൻസർ രോഗനിർണ്ണയത്തിൽ നിർണ്ണായകമായ കണ്ടെത്തലുമായി അമേരിക്കയിലേയും ബ്രിട്ടനിലേയും ഗവേഷകർ. അർബുദ രോഗം വർഷങ്ങൾക്ക് മുൻപേ കണ്ടെത്താനാകുന്ന നൂതനമായ ഒരു രക്ത പരിശോധനയാണ് കാലിഫോർണിയയിലെ ഗ്രെയിൽ ബയോ കമ്പനിയിലെ ഗവേഷകർ വികസിപ്പിച്ചിരിക്കുന്നത്. ബ്രിട്ടനിലെ ആരോഗ്യ വകുപ്പിൻ്റെ കീഴിലുള്ള ആശുപത്രികളിൽ നടത്തിയ ആദ്യ ഘട്ട പരീക്ഷണം വൻ വിജയമാണെന്ന് അന്താരാഷ്ട്ര മാദ്ധ്യമങ്ങൾ റിപ്പോർട്ടു ചെയ്യുന്നു.
ഗല്ലേരി പരിശോധന (Galleri test) എന്നാണ് ഈ പുതിയ രക്ത പരിശോധനയുടെ പേര്. രോഗിയിൽ നിന്ന് അൽപ്പം രക്തം ഏത് ചെറിയ ക്ലിനിക്കിൽ വച്ചും ശേഖരിക്കാവുന്നതാണ്. അങ്ങനെ കുത്തിയെടുക്കുന്ന ഒരൽപ്പം രക്തം ലബോറട്ടറിയിലയച്ച് പരിശോധിക്കുന്നത് വഴി അൻപതോളം അർബുദങ്ങൾ വളരെ തുടക്കത്തിൽ തന്നെ വേർതിരിച്ചറിയാനാകും എന്നാണ് ഈ പരിശോധനയുടെ പ്രത്യേകത.
ശരീരത്തിലെ ഏത് ഭാഗത്തുള്ള എത്ര ചെറിയ കാൻസർ ആയാലും അതിൽ നിന്ന് വളരെ ചെറിയ അളവിൽ ജനിതക കഷണങ്ങൾ രക്തത്തിലൂടെ പുറത്ത് വരാറുണ്ട്. ഈ ജനിതക കഷണങ്ങൾ (Abnormal DNA fragments) അളവിൽ വളരെ കുറവായതിനാൽ മുൻപ് രക്ത പരിശോധന കൊണ്ട് കണ്ടെത്താനാകുമായിരുന്നില്ല. എന്നാൽ ഈ അർബുദ DNA കഷണങ്ങളെ കണ്ടെത്താൻ ഗല്ലേരി പരിശോധന വഴി കഴിയും.
ഈ രക്തപരിശോധനയിൽ കാൻസർ ഉണ്ടെന്ന് കണ്ടെത്തിയ 75% ആൾക്കാരിലും മറ്റ് പരിശോധനകൾ നടത്തി നോക്കിയപ്പോൾ അതാത് അവയവങ്ങളിൽ അർബുദ രോഗത്തിൻ്റെ തുടക്കം കണ്ടെത്താനായി.എന്നാൽ മറ്റ് പരിശോധനകളിൽ അർബുദം കണ്ടെത്തിയ 2.5% രോഗികൾക്ക് ഗല്ലേരി രക്ത പരിശോധനയിൽ രോഗം കണ്ടെത്താനായില്ല.
എന്നാലും 75% പേർക്കും രോഗംകണ്ടെത്താനായത് വലിയ മുന്നേറ്റമായാണ് ശാസ്ത്രജ്ഞർ വിലയിരുത്തുന്നത്. മാത്രവുമല്ല ഈ രക്ത പരിശോധന വഴി 85% രോഗികളിലും ഏത് അവയവത്തിലാണ് അർബുദ ബാധയെന്ന് കൃത്യമായി കണ്ടെത്താനും സാധിച്ചു. നേരത്തേ കണ്ടെത്തിയാൽ പൂർണ്ണമായും ചികിത്സിച്ച് ഭേദമാക്കാനാവുന്ന അർബുദങ്ങൾ ഈ രക്ത പരിശോധന നിലവിൽ വരുന്നതോടെ വൈദ്യശാസ്ത്രത്തിൻ്റെ കൈപ്പിടിയിലൊതുങ്ങും.
“85% രോഗികളിലേയും അർബുദ ബാധ എവിടെയാണെന്ന് ഒരു ചെറിയ രക്ത പരിശോധന നടത്തിയാൽ മനസ്സിലാവും. മുന്നിലിരിക്കുന്ന രോഗികൾക്ക് എന്തൊക്കെ പരിശോധനകൾ നടത്തിയാലാണ് രോഗനിർണ്ണയം ചെയ്യാനാവുക എന്ന് ഡോക്ടർമാർക്ക് ഇനി സംശയിക്കേണ്ടതില്ല. പ്രധാന ഗവേഷകൻ പ്രൊഫസർ മാർക് മിഡിൽടൺ മാദ്ധ്യമങ്ങളോട് പറഞ്ഞു.
ലക്ഷക്കണക്കിനാൾക്കാരാണ് രോഗനിർണ്ണയത്തിനായുള്ള സ്കാനുകളും ബയോപ്സികൾക്കുമായി കാത്തിരിക്കുന്നത്. ഈ പരിശോധന നടപ്പിലാകുന്നതോടെ രോഗനിർണ്ണയം അതിവേഗത്തിലാകും, അദ്ദേഹം അറിയിച്ചു.
“രോഗം നേരത്തേ കണ്ടെത്തുക എന്നതാണ് കാൻസർ ചികിത്സയിലെ പരമപ്രധാനമായ കാര്യം. ഈ പരിശോധന നിലവിൽ വരുന്നതോടെ ലക്ഷക്കണക്കിനാൾക്കാർക്ക് കൃത്യമായ ചികിത്സ നൽകി രോഗം പൂർണ്ണമായും ഭേദമാക്കാൻ കഴിയും”. ബ്രിട്ടീഷ് സർക്കാരിൻ്റെ കാൻസർ ചികിത്സയുടെ നാഷണൽ ഡയറക്ടർ പ്രൊഫസർ പീറ്റർ ജോൺസൻ പറഞ്ഞു. 2024-2025 ഓടെ പരീക്ഷണങ്ങൾ പൂർത്തിയാക്കി ഈ രക്ത പരിശോധന വിപണിയിൽ ലഭ്യമാകും എന്ന് പ്രതീക്ഷിക്കുന്നതായി ഗ്രെയിൽ ബയോ മാദ്ധ്യമങ്ങളെ അറിയിച്ചു.
Discussion about this post