ന്യൂഡൽഹി : അഖണ്ഡ ഭാരതത്തെക്കുറിച്ച് മനസിലാക്കാൻ പാകിസ്താന് സാധിക്കില്ലെന്ന് വിദേശകാര്യ മന്ത്രി എസ് ജയ്ശങ്കർ. പുതിയ പാർലമെന്റ് മന്ദിരത്തിൽ സ്ഥാപിച്ചിരിക്കുന്ന അഖണ്ഡ ഭാരതത്തിന്റെ ചുവർ ചിത്രത്തെ പാകിസ്താൻ വിമർശിച്ചിരുന്നു. ഇതിന് ജയ്ശങ്കർ ചുട്ട മറുപടി നൽകി.
”വിഭജിക്കപ്പെടാത്ത ഇന്ത്യയുടെ ചുവർചിത്രം അശോക സാമ്രാജ്യത്തെയും, ഉത്തരവാദിത്വവും ജനാധിഷ്ഠിതവുമായ ഭരണത്തെയുമാണ് കാണിക്കുന്നത്. പാകിസ്താന് ഇത് മനസിലാവില്ല, കാരണം അവർക്ക് അതിനുള്ള ശക്തിയില്ല” ജയശങ്കർ പറഞ്ഞു.
”പാക് അധീന കശ്മീരിനെക്കുറിച്ച് ഇന്ത്യ നേരത്തെ നിലപാട് വ്യക്തമാക്കിയതാണ്. ഇത് ഞങ്ങളുടേത് മാത്രമല്ല, രാജ്യത്തിന്റെയും പാർലമെന്റിന്റെയും നിലപാടാണ്” അദ്ദേഹം പറഞ്ഞു.
മെയ് 28 ന് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്ത പുതിയ പാർലമെന്റ് കെട്ടിടത്തിൽ പുരാതന ഇന്ത്യയുടെ ഭൂപടം കാണിക്കുന്ന ഒരു ചുവർ ചിത്രം സ്ഥാപിച്ചിട്ടുണ്ട്. തക്ഷശില ഉൾപ്പെടെയുള്ള ഭാഗങ്ങൾ ഉൾക്കൊള്ളിക്കുന്നതാണ് ഈ ചിത്രം. പ്രധാനപ്പെട്ട രാജ്യങ്ങളും പുരാതന നഗരങ്ങളും ഇതിൽ പ്രത്യേകം അടയാളപ്പെടുത്തിയിട്ടുണ്ട്. ഈ നഗരങ്ങളുടെ പേരുകളും ഈ ചിത്രത്തിൽ പരാമർശിച്ചിട്ടുണ്ട്.
Discussion about this post