വാഷിംഗ്ടൺ ഡിസി: യുഎസിൽ സന്ദർശനം നടത്തുന്ന മുഖ്യമന്ത്രി പിണറായി വിജയനും ധനമന്ത്രി കെഎൻ ബാലഗോപാലും ഉൾപ്പെടുന്ന സംഘം ലോകബാങ്ക് ഓപ്പറേഷൻസ് വിഭാഗം മാനേജിംഗ് ഡയറക്ടർ അന്ന ബി യർദെയുമായി വാഷിങ്ടണിൽ കൂടിക്കാഴ്ച്ച നടത്തി. നിലവിൽ ലോകബാങ്കിന്റെ സഹകരണമുള്ള റീ ബിൽഡ് കേരള ഇനിഷ്യേറ്റീവ് അടക്കമുള്ള പദ്ധതികളിലെ പുരോഗതി കൂടിക്കാഴ്ച്ചയിൽ ചർച്ചയായി.
കേരളത്തിന്റെ അടിസ്ഥാന സൗകര്യമേഖലകളിൽ നിക്ഷേപത്തിന് തയ്യാറാണെന്ന് ലോകബാങ്ക് അധികൃതർ പറഞ്ഞതായി മുഖ്യമന്ത്രി ഫേസ്ബുക്ക് പോസ്റ്റിൽ അറിയിച്ചു. കൂടിക്കാഴ്ചയുടെ ചിത്രവും അദ്ദേഹം പങ്കുവെച്ചു.
റീബിൽഡ് കേരള ഇനിഷ്യേറ്റീവിന്റെ ഭാഗമായി കേരളത്തിൽ നടപ്പിലാക്കി വരുന്ന വിവിധ വികസന, നയ പരിപാടികൾ ലോകബാങ്ക് വൈസ് പ്രസിഡന്റിന്റെ നേതൃത്വത്തിലുള്ള ഉന്നതതല സംഘം കേരളത്തിലെത്തി നേരത്തെ അവലോകനം ചെയ്തിരുന്നു. ഇതിന്റെ തുടർച്ചയായാണ് വാഷിംഗ്ടൺ ഡി.സിയിൽ ലോക ബാങ്കിന്റെ മുതിർന്ന ഉദ്യോഗസ്ഥരുമായി കേരള സംഘം കൂടിക്കാഴ്ച നടത്തിയത്.
2018 ലെ പ്രളയത്തിന് പിന്നാലെ കേരളത്തിന്റെ അടിസ്ഥാന സൗകര്യമേഖലയുടെ പുനരുദ്ധാരണമാണ് റീബിൽഡ് കേരളയിലൂടെ നടപ്പാക്കുന്നത്.
