തിരുവനന്തപുരംL വർക്കലയിൽ വിവാഹവീട്ടിലുണ്ടായ ആക്രമണത്തിൽ വധുവിന്റെ പിതാവ് കൊല്ലപ്പെട്ടു. കല്ലമ്പലം വടശേരികോണം സ്വദേശിയായ രാജു(61) ആണ് കൊല്ലപ്പെട്ടത്. പെൺകുട്ടിയുടെ മുൻകാമുകനും സുഹൃത്തുക്കളും ചേർന്നാണ് രാജുവിനെ കൊലപ്പെടുത്തിയത്.
ഇന്ന് ശിവഗിരിയിൽ വച്ച് മകൾ ശ്രീലക്ഷ്മിയുടെ വിവാഹം നടക്കാനിരിക്കെയാണ് രാജു കൊല്ലപ്പെടുന്നത്. ഇന്നലെ അർദ്ധരാത്രി കല്യണവുമായി ബന്ധപ്പെട്ട സ്വീകരണച്ചടങ്ങുകൾ നടക്കുകയായിരുന്നു. ചടങ്ങുകൾ അവസാനിച്ച് ആളുകൾ മടങ്ങിയപ്പോഴാണ് സംഭവം. പെൺകുട്ടിയെ കാണണമെന്ന് പറഞ്ഞ് ബഹളം വച്ചു. പെൺകുട്ടിയെ അടക്കം ഇവർ മർദ്ദിച്ചു. തർക്കത്തിനിടെ മൺവെട്ടി കൊണ്ട് പെൺകുട്ടിയുടെ അച്ഛനെ അടിക്കുകയായിരുന്നു. ബോധരഹിതനായ രാജുവിനെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.
സംഭവത്തിൽ പെൺകുട്ടിയുടെ മുൻ കാമുകനും ഇയാളുടെ സഹോദരനും സുഹൃത്തുക്കളും അടക്കം നാല് പേരെ പോലീസ് കസ്റ്റഡിയിൽ എടുത്തിട്ടുണ്ട്. വടശ്ശേരിക്കോണം സ്വദേശിയായ ജിഷ്ണു, ജിജിൻ , ശ്യം, മനു എന്നിവരെയാണ് വർക്കല പോലീസ് കസ്റ്റഡിയിലെടുത്തത്. ഓട്ടോഡ്രൈവറാണ് കൊല്ലപ്പെട്ട രാജു.
വധുവായ ശ്രീലക്ഷ്മിയും ജിഷ്ണുവും തമ്മിൽ നേരത്തെ അടുപ്പത്തിലായിരുന്നു. എന്നാൽ വിവാഹത്തിന് മുൻപേ ഈ അടുപ്പം പെണ്കുട്ടി അവസാനിപ്പിച്ചിരുന്നു. എന്നാൽ ഇന്നലെ അർദ്ധ രാത്രിയോടെ എത്തിയ യുവാക്കൾ പ്രശ്നമുണ്ടാക്കുകയും കൊലപാതകം നടത്തുകയുമായിരുന്നു, പ്രണയ നൈരാശ്യമാണ് കൊലപാതകത്തിന് പിന്നിലെന്നാണ് പോലീസ് പറയുന്നത്. പ്രതികളെ ചോദ്യം ചെയ്തുവരികയാണ്.
Discussion about this post