പാലക്കാട്: പുതുശ്ശേരിയിൽ വാഹനാപകടത്തിൽ നവവധു മരിച്ചു. കണ്ണന്നൂർ പുതുക്കോട് സ്വദേശിനി അനീഷ (20) ആണ് മരിച്ചത്. പരിക്കേറ്റ അനീഷയുടെ ഭർത്താവും കോയമ്പത്തൂർ സ്വദേശിയുമായ ഷക്കീർ ഗുരുതരമായി പരിക്കേറ്റ് ആശുപത്രിയിൽ ചികിത്സയിലാണ്.
രാവിലെ 11 മണിയോടെയായിരുന്നു സംഭവം. കുരുടിക്കോടുവച്ച് അനീഷയും ഷക്കീറും സഞ്ചരിച്ചിരുന്ന ഇരുചക്ര വാഹനം കണ്ടെയ്‌നർ ലോറിയിൽ ഇടിക്കുകയായിരുന്നു. കുനിശ്ശേരിയിലെ ബന്ധു വീട്ടിൽ നിന്നും കോയമ്പത്തൂരിലേക്ക് പോകുകയായിരുന്നു ഇരുവരും. ഇതിനിടെയായിരുന്നു അപകടം ഉണ്ടായത്.
അപകടത്തിൽ ഇരുവർക്കും ഗുരുതരമായി പരിക്കേറ്റിരുന്നു. അനീഷയുടെ ശരീരത്തിലൂടെ വാഹനം കയറിയിറങ്ങിയെന്നാണ് ദൃക്‌സാക്ഷികൾ പറയുന്നത്. ഉടനെ ഇവരെ ആശുപത്രിയിൽ എത്തിച്ചെങ്കിലും അനീഷ മരിക്കുകയായിരുന്നു.
നിർത്തിയിട്ട കണ്ടെയ്‌നർ എടുക്കുന്ന സമയം ദമ്പതികൾ ഇടത് ഭാഗത്ത് കൂടി ഓവർടേക്ക് ചെയ്തതാണ് അപകട കാരണം എന്നാണ് പോലീസ് പറയുന്നത്. സംഭവത്തിൽ കസബ പോലീസ് കേസ് എടുത്തിട്ടുണ്ട്. ജൂലൈ നാലിനായിരുന്നു അനീഷയുടെയും ഷക്കീറിന്റെയും വിവാഹം.
