ബാങ്കോക്ക്: 2023 ഏഷ്യന്‍ അത്ലറ്റിക്സ് ചാമ്പ്യന്‍ഷിപ്പിന്റെ ഭാഗ്യചിഹ്നമായി ഹനുമാന്‍. തായ്ലൻഡ് ആണ് 2023 ഏഷ്യൻ അത്ലറ്റിക്സ് ചാമ്പ്യൻഷിപ്പിന് ആതിഥേയത്വം വഹിക്കുന്നത്. തായ്‌ലൻഡിന്റെ തലസ്ഥാനമായ ബാങ്കോക്കിലാണ് മത്സരങ്ങൾ നടക്കുക. ജൂലൈ 11 മുതലാണ് ഈ വർഷത്തെ ഏഷ്യന്‍ അത്ലറ്റിക്സ് ചാമ്പ്യന്‍ഷിപ്പ് ആരംഭിക്കുന്നത്.
തായ് ഹനുമാന്റെ ചിത്രമാണ് അത്ലറ്റിക്സ് ചാമ്പ്യന്‍ഷിപ്പിൽ ഭാഗ്യചിഹ്നമായി ഉപയോഗിച്ചിരിക്കുന്നത്. ” ഹനുമാന്‍ ഭഗവാന്‍ ശ്രീരാമനെ സേവിക്കുന്നതിനായി തന്റെ ശക്തിയും ധൈര്യവും അറിവുമെല്ലാം ഉപയോഗിച്ചു. ഹനുമാന്റെ ഏറ്റവും പ്രധാനപ്പെട്ട സവിശേഷതകള്‍ ധൈര്യവും അർപ്പണ മനോഭാവവും ആണ്. ഇതെല്ലാം കണക്കിലെടുത്താണ് ഹനുമാനെ ഏഷ്യൻ അത്ലറ്റിക്സ് ചാമ്പ്യൻഷിപ്പിന്റെ ഭാഗ്യചിഹ്നമായി തിരഞ്ഞെടുത്തത് ” എന്ന് ഏഷ്യൻ അത്ലറ്റിക്സ് അസോസിയേഷൻ സൈറ്റിൽ അറിയിച്ചു. എല്ലാ കായികതാരങ്ങളും ഹനുമാനെ പോലെ ആത്മസമർപ്പണവും ധൈര്യവും ശക്തിയും മികച്ച രീതിയിൽ ഉപയോഗിക്കണമെന്നും ഏഷ്യൻ അത്ലറ്റിക്സ് അസോസിയേഷൻ പറയുന്നു.
ഏഷ്യൻ അത്ലറ്റിക്സ് ചാമ്പ്യൻഷിപ്പിൽ ഇത്തവണ ഇന്ത്യയെ നയിക്കുന്നത് ഷോട്ട്പുട്ട് താരമായ തജീന്ദർപാൽ സിംഗ് ആണ്. മുരളി ശ്രീശങ്കർ അടക്കമുള്ള നിരവധി മലയാള താരങ്ങളും ചാമ്പ്യൻഷിപ്പിൽ പങ്കെടുക്കുന്നുണ്ട്. മത്സരങ്ങളിൽ പങ്കെടുക്കുന്നതിനായി ഇന്ത്യൻ താരങ്ങളെല്ലാം തന്നെ ശനിയാഴ്ച രാത്രിയോടെ യാത്ര പുറപ്പെട്ടിരുന്നു. ജൂലൈ 12 മുതൽ 16 വരെയാണ് ഏഷ്യൻ അത്ലറ്റിക്സ് ചാമ്പ്യൻഷിപ്പ് നടക്കുന്നത്.
Discussion about this post