ന്യൂഡൽഹി: ഗ്ലോബൽ സൗത്തിനെയും യൂറോപ്പിനെയും പരസ്പരം കൂട്ടിയിണക്കുന്ന കണ്ണിയാണ് ഇന്ത്യയെന്ന് ഫ്രഞ്ച് മാദ്ധ്യമത്തിന് നൽകിയ അഭിമുഖത്തിൽ പ്രധാനമന്ത്രി നരേന്ദ്ര മോദി. ലോകത്തിലെ ഏറ്റവും വലിയ ജനാധിപത്യ രാജ്യമായ ഇന്ത്യയെ ഉൾപ്പെടുത്താതെ ഐക്യരാഷ്ട്ര രക്ഷാസമിതി അപൂർണമാണെന്നും അദ്ദേഹം പറഞ്ഞു.
യോഗ ഇന്ന് എല്ലാ രാജ്യങ്ങൾക്കും സുപരിചിതമായിരിക്കുന്നു. ഇന്ത്യയുടെ പരമ്പരാഗത ചികിത്സാ രീതിയായ ആയുർവേദം ഇന്ന് എല്ലാ ലോകരാജ്യങ്ങളിലും പ്രചാരം കൈവരിക്കുന്നു. യുദ്ധവും അധിനിവേശവുമല്ല, മറിച്ച് യോഗയും ആയുർവേദവും ആത്മീയതയും ശാസ്ത്രവും ഗണിതവുമാണ് ലോകത്തിന് ഇന്ത്യ നൽകിയ അമൂല്യമായ സംഭാവനകൾ. ലെ എകോസ് എന്ന ഫ്രഞ്ച് മാദ്ധ്യമത്തിന് നൽകിയ അഭിമുഖത്തിൽ പ്രധാനമന്ത്രി വ്യക്തമാക്കി.
ഐക്യരാഷ്ട്ര രക്ഷാസമിതിയിലെ ഇന്ത്യയുടെ സ്ഥിരാംഗത്വം എന്ന ആവശ്യത്തെ മിക്ക ലോകരാജ്യങ്ങളും പിന്തുണയ്ക്കുകയാണ്. സുസ്ഥിരവും സമാധാനപൂർണവുമായ ഒരു നവലോകം സൃഷ്ടിക്കുന്നതിന് ഇന്ത്യക്ക് എന്ത് ചെയ്യാൻ കഴിയും എന്ന കാര്യത്തിൽ വലിയ പ്രതീക്ഷയാണ് സമാധാനകാംക്ഷികളായ രാജ്യങ്ങൾക്ക് ഉള്ളതെന്നും പ്രധാനമന്ത്രി ചൂണ്ടിക്കാട്ടി.
ഇന്തോ പസഫിക് മേഖലയിലെ ഇന്ത്യയുടെ താത്പര്യങ്ങൾ വിശാലവും ഇടപെടലുകൾ ആഴമേറിയതുമാണ്. മേഖലയിലെ ഏവർക്കും സുരക്ഷയും ഉയർച്ചയും എന്നതാണ് സാഗർ എന്ന ആശയത്തിലൂടെ ഇന്ത്യ മുന്നോട്ട് വെക്കുന്നതെന്നും പ്രധാനമന്ത്രി നരേന്ദ്ര മോദി കൂട്ടിച്ചേർത്തു.
Discussion about this post