‘എവിടെത്തിരിഞ്ഞൊന്ന് നോക്കിയാലും അവിടെല്ലാം പൂത്ത മരങ്ങള് മാത്രം’, ഗാര്ഡന് എന്ന് കേള്ക്കുമ്പോള് ചങ്ങമ്പുഴയുടെ ഈ വരികള് ഓര്ക്കുന്നതില് തെറ്റില്ല. പക്ഷേ വിയറ്റ്നാമിലെ ഡോങ് താം ഫാമിനെ കുറിച്ച് പറയുമ്പോള്, വരികള് മാറ്റിയെഴുതേണ്ടി വരും. എവിത്തിരിഞ്ഞൊന്ന് നോക്കിയാലും അവിടെല്ലാം ചുറ്റിപ്പിണഞ്ഞ് കിടക്കുന്ന പാമ്പുകള് മാത്രം! ഇപ്പറഞ്ഞത് സത്യമാണെന്ന് മനസ്സിലാക്കാന് മുകളില് കൊടുത്ത ഒരു ഫോട്ടോ മാത്രം മതി. ഒരു അസ്സല് ‘സ്നേക്സ് ഗാര്ഡന്’ എന്ന് വേണമെങ്കില് ഈ ഫാമിനെ വിളിക്കാം, കാരണം കുറ്റിച്ചെടികളിലും നീര്ച്ചാലുകളിലും മരങ്ങളിലും നിലത്തുമെല്ലാം പാമ്പുകള് ഒന്നിനു മീതെ ഒന്നായി അട്ടിക്കട്ടിയായി കിടക്കുകയാണ്.
വിയറ്റ്നാമിലെ തെയ്ന് ഗിയാങ് പ്രവശ്യയിലുള്ള ചൗ താന്ഹ് ജില്ലയിലാണ് ഈ അസാധാരണ സ്നേക്സ് ഗാര്ഡന് സ്ഥിതി ചെയ്യുന്നത്. ടിയെന് നദിയുടെ കരയില് വിശാലമായ 12 ഹെക്ടറിലുള്ള ഡോങ് താം ഫാം, സ്നേക്സ് ഫാമിംഗിന് മാത്രമുള്ളതാണ്. 1977ല് സ്ഥാപിക്കപ്പെട്ട ഈ ഫാമില് വിഷപ്പാമ്പുകളും അല്ലാത്തതും അടക്കം അമ്പതിലധികം ഇനങ്ങളിലുള്ള പാമ്പുകളുണ്ട്. പ്രധാനമായും പാമ്പ് സംരക്ഷണത്തിനും ശാസ്ത്രീയാവശ്യങ്ങള്ക്കും വേണ്ടിയാണ് ഇവിടെ പാമ്പുകളെ പാര്പ്പിച്ചിരിക്കുന്നതെന്ന് ഫാം അധികൃതര് പറയുന്നു.
രാജവെമ്പാലയും മൂര്ഖനും അടക്കം പത്തിലധികം വിഷപ്പാമ്പ് ഇനങ്ങള് ഇവിടെയുണ്ട്. പ്രത്യേക പരിചരണം ആവശ്യമുള്ള മൂര്ഖന് അടക്കമുള്ള പാമ്പുകളെ പ്രത്യേകം കൂടുകളിലാണ് പാര്പ്പിച്ചിട്ടുള്ളത്. മറ്റ് വിഷപ്പാമ്പുകളെ അപേക്ഷിച്ച് മൂര്ഖന് വളരെ വലുതും നീളമുള്ളവയുമാണ്. ഏറ്റവും വിഷമുള്ള പാമ്പ് വര്ഗ്ഗമാണിവ. ഇവയുടെ ഒരു ഗ്രാം വിഷത്തിന് 166 ആളുകളെ കൊല്ലാന് കഴിയുമെന്നാണ് പറയപ്പെടുന്നത്. രാജവെമ്പാലയാണ് ഈ ഫാമിലെ ഏറ്റവും പ്രധാനപ്പെട്ട പാമ്പ്. അവയില് പലതും 10 കിലോഗ്രാമിലധികം ഭാരമുള്ളവയാണ്. ഏറ്റവും വലിയ പാമ്പിന് 27 കിലോഗ്രാം ഭാരവും 4.2 മീറ്റര് നീളവും ഉണ്ട്. ഇവയ്ക്ക് 17 വര്ഷം വരെയാണ് ആയുസ്സ് കല്പ്പിക്കപ്പെടുന്നത്. സാധാരണയായി ഉയര്ന്നുള്ള വനപ്രദേശങ്ങളിലും മഴക്കാടുകളിലും പുല്മേടുകളിലും തടാകങ്ങളിലുമൊക്കെയാണ് ഇവയെ കാണാറ്. വര്ഷത്തില് 20-50 മുട്ടകള് വരെ ഈ പാമ്പുകള് ഇടാറുണ്ട്. മറ്റ് പാമ്പുകള്, പക്ഷികള്, പല്ലികള് എന്നിവയാണ് പ്രധാന ഭക്ഷണം.
വിയറ്റ്നാമിലെയും ലോകത്തിലെ തന്നെയും പാമ്പ് ഗവേഷണത്തില് വലിയ പങ്ക് വഹിക്കുന്ന ഫാം ആണിത്. പാമ്പുകടിയേറ്റുള്ള വിഷബാധയ്ക്ക് ഫലപ്രദമായ ചികിത്സകള് കണ്ടെത്തുന്നതിനുള്ള പരീക്ഷണങ്ങള് ദിവസേന ഇവിടെ നടന്നുവരുന്നു. മാത്രമല്ല, ഫാമിലെ വിഷപ്പാമ്പുകളില് നിന്ന് വിഷം ശേഖരിച്ച് മരുന്നുകള്ക്കും വിഷത്തിനുള്ള മറുമരുന്ന് ഉണ്ടാക്കുന്നതിനും ഉപയോഗിക്കുന്നു. ഇത് മറ്റുരാജ്യങ്ങളിലേക്ക് കയറ്റി അയക്കാറുമുണ്ട്. 3-6 മാസത്തിലൊരിക്കലാണ് പാമ്പുകളില് നിന്നും വിഷം ശേഖരിക്കുക. രണ്ട് വയസ്സില് കൂടുതല് പ്രായമുള്ള ആരോഗ്യമുള്ള പാമ്പുകളില് നിന്നാണ് വിഷമെടുക്കുക.
ഈ ഫാമില് ഉള്ള മിക്ക വിഷപ്പാമ്പുകളുടെയും വിഷത്തിനെതിരെ പ്രയോഗിക്കേണ്ട മറുമരുന്നുകള് ഇവിടെ വികസിപ്പിച്ചിട്ടുണ്ട്. മേഖലയിലെ പ്രധാന പാമ്പുചികിത്സാകേന്ദ്രം കൂടിയാണ് ഈ ഫാം. പ്രതിവര്ഷം കുറഞ്ഞത് 1,500 പേരെങ്കിലും പാമ്പുകടിക്ക് ചികിത്സ തേടി ഇവിടെ എത്താറുണ്ട്.
നേരത്തെ ഗവേഷണ ആവശ്യങ്ങള്ക്ക് മാത്രമായി പാമ്പിനെ വളര്ത്തിയിരുന്ന ടോങ് താം പാര്ക്ക് ഇപ്പോള് വിയറ്റ്നാമിലെ പ്രസിദ്ധ ടൂറിസ്റ്റ് ലക്ഷ്യസ്ഥാനം കൂടിയാണ്. ഓരോ വര്ഷവും ദശലക്ഷക്കണക്കിന് സഞ്ചാരികളാണ് കണ്നിറയെ പാമ്പുകളെ കാണാന് ഇങ്ങോട്ട് ഒഴുകിയെത്തുന്നത്. വിഷപ്പാമ്പുകള്ക്കിടയില് നിന്നുകൊണ്ട് വളരെ സുരക്ഷിതമായി ഫാമിലെ അപൂര്വ്വ കാഴ്ചകള് ആസ്വദിക്കാനുള്ള സൗകര്യങ്ങള് ഇവിടെ ഒരുക്കിയിട്ടുണ്ട്. യൂറോപ്പില് നിന്നും അമേരിക്കയില് നിന്നുമുള്ള സഞ്ചാരികളാണ് ഇവിടേക്ക് കൂടുതലായി എത്തുന്നത്.
View this post on Instagram
അടുത്തിടെ ഈ ഫാമില് നിന്നുള്ള ഒരു വീഡിയോ ഓണ്ലൈനില് തരംഗമായിരുന്നു. ഇങ്ങനെയൊരു പാമ്പ് ഫാം ലോകത്ത് ഉണ്ടെന്ന് അറിയാതിരുന്നവര് ചെടിക്കൊമ്പുകളില് പുളയുന്ന നൂറുകണക്കിന് പാമ്പുകളുടെ കാഴ്ച കണ്ട് അക്ഷരാര്ത്ഥത്തില് ഞെട്ടി.
Discussion about this post