കൊച്ചി: ചുരുങ്ങിയ കാലം കൊണ്ട് തന്നെ മലയാള സിനിമാലോകത്ത് തന്റെതായ സ്ഥാനം നേടിയെടുത്ത യുവ നടനാണ് ഉണ്ണി മുകുന്ദൻ. ഒരു പിടി വിജയ ചിത്രങ്ങളുമായി ഉണ്ണിയുടെ കരിയർ ഗ്രോസ് ഉയരുകയാണ്. ഇപ്പോഴിതാ ഉണ്ണിയുടെ പരിശ്രമങ്ങളെ പ്രശംസിച്ച് രംഗത്തെത്തിയിരിക്കുകയാണ് സിബി മലയിൽ. ലോഹിതദാസിൻറെ സിനിമയിലൂടെ അരങ്ങേറേണ്ടിയിരുന്ന ഉണ്ണി മുകുന്ദൻ ലോഹിയുടെ വിടവാങ്ങലിലും തളരാതെ മുന്നോട്ട് പോവുകയായിരുന്നെന്ന് സിബി പറഞ്ഞു. ഗോഡ്ഫാദർമാരുടെ പിൻബലമില്ലാതെയാണ് ഉണ്ണി കരിയറിൽ വളർന്നതെന്നും ഫൈറ്ററാണ് താരമെന്നും അദ്ദേഹം പറഞ്ഞു. ഒരു താരത്തിന്റെ വളർച്ചയുടെ ഏറ്റവും പ്രധാനപ്പെട്ട ഘട്ടത്തിലൂടെയാണ് ഉണ്ണി മുകുന്ദൻ കടന്ന് പോകുന്നതെന്ന് സബിബി മലയിൽ പറഞ്ഞു. കൊച്ചിയിലെ നിയോ ഫിലിം സ്‌കൂളിലെ ബിരുദദാന ചടങ്ങിൽ സംസാരിക്കുകയായിരുന്നു അദ്ദേഹം. ഉണ്ണി മുകുന്ദൻ ആയിരുന്നു ചടങ്ങിലെ മുഖ്യാതിഥി.
നിങ്ങൾക്കറിയാം ഞാനും ലോഹിതദാസും തമ്മിലുള്ള ബന്ധത്തിന്റെ കഥകൾ. അദ്ദേഹം നമ്മെ വിട്ടുപിരിയുന്നതിന് മൂന്നാഴ്ച മുൻപ്, വലിയ ഇടവേളയ്ക്കു ശേഷം ഞങ്ങൾ ഒരുമിച്ച് ചെയ്യാൻ പോകുന്ന ഒരു സിനിമയുടെ ചർച്ചകളുമായി ലോഹിയുടെ ലക്കിടിയിലെ വീട്ടിൽ ഒരു പകൽ മുഴുവൻ ഞങ്ങൾ ഒരുമിച്ച് ഉണ്ടായിരുന്നു. അന്ന് അദ്ദേഹം എന്നോടു പറഞ്ഞൊരു കാര്യമുണ്ട്. താൻ ഒരു ചെറുപ്പക്കാരനെ കണ്ടെത്തിയിരിക്കുകയാണെന്നും അയാളെ വച്ച് ഒരു സിനിമ ചെയ്യാൻ പോവുകയാണെന്നും ലോഹി അന്ന് എന്നോട് പറഞ്ഞു. അദ്ദേഹം വളരെ പ്രതീക്ഷയോടെയാണ് ഈ ചെറുപ്പക്കാരനെക്കുറിച്ച് പറഞ്ഞത്. ചെറിയ റോളുകളിലൊന്നും വരണ്ട, മറിച്ച് തൻറെ സിനിമയിലെ ഒരു പ്രധാനപ്പെട്ട വേഷത്തിലൂടെ അയാൾ വരണമെന്നാണ് അദ്ദേഹം ആഗ്രഹിച്ചത്. പക്ഷേ മൂന്നാഴ്ച കഴിഞ്ഞ് നമ്മെയൊക്കെ വേദനിപ്പിച്ചുകൊണ്ട് അദ്ദേഹം പോയി.
അന്ന് മരണവീട്ടിലെ സന്ധ്യയിൽ ഒരാൾ എൻറെ അടുത്തേക്ക് വന്നു. സാർ ഞാനാണ് ഉണ്ണി മുകുന്ദൻ. ലോഹി സാറിൻറെ സിനിമയിൽ അഭിനയിക്കാനായി കാത്തിരിക്കുകയായിരുന്നു എന്ന് പറഞ്ഞു. ഒറ്റ ദിവസം കൊണ്ട് ആ പ്രതീക്ഷകൾ ഇല്ലാതെയായെന്നും. അങ്ങനെയാണ് ഞാൻ ഉണ്ണി മുകുന്ദനെ ആദ്യം കാണുന്നത്. ഒരു മനുഷ്യനെ ഏറ്റവും നിരാശപ്പെടുത്തുന്ന, സങ്കടപ്പെടുത്തുന്ന നിമിഷത്തിലാണ് ഉണ്ണിയെ ഞാൻ ആദ്യം കണ്ടുമുട്ടിയത്. പക്ഷേ അവിടെ തോറ്റ് പിന്മാറാൻ ഉണ്ണി തയ്യാറായില്ല. ഉണ്ണി ഒരു ഫൈറ്റർ ആണെന്ന് ബോധ്യപ്പെടുത്തിയിട്ടുണ്ട്. എല്ലാ പ്രതികൂലങ്ങളെയും മറികടന്നുകൊണ്ട് ഒരു ഗോഡ്ഫാദറിൻറെയും പിൻബലമില്ലാതെ സ്വയം പൊരുതി ജയിച്ച ആളാണ് ഉണ്ണി മുകുന്ദനെന്ന് സിബി മലയിൽ പറയുന്നു.
മേപ്പടിയാൻ എന്ന സിനിമ താൻ ഒടിടിയിലാണ് കാണുന്നതെന്ന് സിബി മലയിൽ പറഞ്ഞു. അത്തരമൊരു സിനിമ നിർമ്മിക്കാനും അതിൽ അഭിനയിക്കാനും ഉണ്ണി കാണിച്ച ഒരു കോൺഫിഡൻസ് ഉണ്ടല്ലോ എന്നും, അത് ആ കഥയോടുള്ള വിശ്വാസമാണെന്ന് സിബി മലയിൽ പറഞ്ഞു. മേപ്പടിയാൻ കണ്ട ഓരോരുത്തരുടെയും ഉള്ളുലക്കുന്ന രീതിയിലുള്ള കഥയാണ് ആ സിനിമയുടേത്. അത് ഏറ്റവും നന്നായി ചെയ്യാൻ ഉണ്ണിക്ക് കഴിഞ്ഞു. ആക്ഷൻ ഹീറോ ഇമേജിൽ നിന്ന് മാറി കിട്ടിയ ഒരു അവസരത്തെ നന്നായി ഉപയോഗിക്കാൻ ഉണ്ണിക്ക് കഴിഞ്ഞു. പിന്നീട് ഏറ്റവുമൊടുവിൽ മാളികപ്പുറം. ഒരു താരത്തിൻറെ വളർച്ചയിലെ ഏറ്റവും പ്രധാന ഘട്ടത്തിലൂടെയാണ് ഉണ്ണി കടന്നുപോകുന്നത്. ആ യാത്ര ഏറ്റവും പെട്ടെന്ന് സാധിക്കട്ടെയെന്ന് ആശംസിക്കുകയാണ്’, സിബി മലയിൽ കൂട്ടിച്ചേർത്തു.
Discussion about this post