ന്യൂഡൽഹി : പ്രധാനമന്ത്രി നരേന്ദ്ര മോദി പ്രതിമാസ റേഡിയോ പ്രോഗ്രാമായ മൻ കി ബാത്തിൽ പേരെടുത്ത് പരാമർശിച്ച ഒരു ഫ്രഞ്ച് അദ്ധ്യാപികയെയാണ് ഇപ്പോൾ എല്ലാവരും തിരയുന്നത്. 100 വയസുകാരിയായ ഷാർലെറ്റ് ചോപിൻ ഫ്രാൻസിലെ പ്രശസ്തയായ യോഗ അദ്ധ്യാപികയാണ്. നാൽപ്പത് വർഷമായി ഇവർ യോഗാഭ്യാസം നടത്തുന്നു. തന്റെ ആരോഗ്യത്തിന്റെ രഹസ്യവും യോഗ തന്നെയാണെന്ന് ഇവർ തുറന്നുസമ്മതിക്കുന്നു.
അടുത്തിടെ ഫ്രാൻസിലേക്ക് നടത്തിയ സന്ദർശനത്തിനിടെയാണ് ഷാർലെറ്റിനെ പരിചയപ്പെട്ടത് എന്ന് പ്രധാനമന്ത്രി പറഞ്ഞു. ”നൂറ് വയസിലധികം പ്രായമുള്ള ഇവർ യോഗ അദ്ധ്യാപികയാണ്. കഴിഞ്ഞ നാൽപ്പത് വർഷമായി യോഗ പരിശീലിച്ച് വരികയാണ്. ഈ പ്രായത്തിലും ആരോഗ്യത്തോടെ ഇരിക്കാനുള്ള പ്രധാന കാരണം യോഗയാണെന്ന് ഷാർലെറ്റ് പറയുന്നു” മോദി വ്യക്തമാക്കി.
In Paris, I had the opportunity to meet the remarkable Charlotte Chopin. She began practising Yoga at the age of 50. She’s going to turn hundred soon but her passion towards Yoga and fitness has only increased over the years. pic.twitter.com/zrWkMMTck9
— Narendra Modi (@narendramodi) July 14, 2023
”ഇന്ത്യയുടെ യോഗ ശാസ്ത്രത്തിന്റെയും അതിന് ലോകത്തെ സ്വാധീനിക്കാനുള്ള കഴിവിന്റെയും മുഖമായി ഷാർലെറ്റ് മാറിയിരിക്കുകയാണ്. അവരിൽ നിന്ന് നിരവധി കാര്യങ്ങൾ പഠിക്കാനുണ്ട്. നമുക്ക് നമ്മുടെ പൈതൃകത്തെ ഉൾക്കൊള്ളുകയും, അത് ഉത്തരവാദിത്തത്തോടെ ലോകത്തിന് മുന്നിൽ അവതരിപ്പിക്കുകയും ചെയ്യാം,” അദ്ദേഹം കൂട്ടിച്ചേർത്തു.
50-ാം വയസിലാണ് ഷാർലെറ്റ് യോഗാഭ്യാസം തുടങ്ങിയത്. 1982 മുതൽ അവർ യോഗ പഠിപ്പിക്കുന്നുണ്ട്. ജൂലൈ 14 ന് പ്രധാനമന്ത്രി പാരീസിൽ എത്തിയപ്പോഴാണ് ഷാർലെറ്റുമായി കൂടിക്കാഴ്ച നടത്തിയത്. യോഗയിലൂടെ എങ്ങനെ സന്തോഷം കണ്ടെത്താമെന്നും ക്ഷേമം കൈവരിക്കാമെന്നുമുള്ള കാര്യങ്ങൾ അവർ പ്രധാനമന്ത്രിയുമായി പങ്കുവെച്ചിരുന്നു. അന്താരാഷ്ട്ര യോഗ ദിനാചരണത്തോടനുബന്ധിച്ച് ആളുകൾക്ക് യോഗയോടുള്ള താൽപര്യം വർദ്ധിക്കുന്നതിനെക്കുറിച്ചും അവർ പറഞ്ഞിരുന്നു.
ചോപ്പിന്റെ യോഗയിലുള്ള അഗാധമായ വിശ്വാസത്തെ പ്രകീർത്തിച്ച പ്രധാനമന്ത്രി ഫ്രാൻസിൽ യോഗയുമായി ബന്ധപ്പെട്ട് ഇവർ നടത്തുന്ന പ്രവർത്തനങ്ങളെ പ്രശംസിക്കുകയും ചെയ്തു.
